"అడిగేదేముంది? మధ్యాహ్నం రెండు నుంచీ రాత్రి పదిన్నర వరకూ నేను నా రూమ్ లో టీవీ చూస్తుంటాను. ఆ టైమ్ లో ఇంటిపనంతా అమ్మాయే చూసుకోవాలి- అందుకు ఒప్పుకుంటావమ్మా?" అడిగిందామె.
    "అలా నాక్కుదరదండీ! ఈవెనింగ్ ఎయిట్ టు టెన్ నేను నా రూమ్ లోనే టీవీ చూస్తుంటాను. నన్నెవరూ డిస్టర్బ్ చేయకూడదు. నాకు పని చెప్పకూడదు" అంది ఆ అమ్మాయ్.
    "మరి నాకు డిన్నర్ ఎప్పుడు సర్వ్ చేస్తావ్? రాత్రి పదకొండింటికా?" కోపంగా అడిగాడు పెళ్ళికొడుకు.
    "అందుకే వంటమనిషిని పెట్టుకోమన్నాను"
    మధ్యలో పనిమనిషి కల్పించుకుంది.
    "అమ్మగారూ- రోజుకొక్కసారయినా మీరిద్దరూ కలిసి భోజనం చేస్తే బాగుంటుంది కదా? పోనీ డైనింగ్ రూమ్ లో కూడా రెండు టీవీలు పెట్టుకుని ఎవరి ప్రోగ్రాం వాళ్ళు చూస్తే సరిపోతుంది కదండీ. ఎలాగూ రాజకీయ పార్టీలన్నీ టీవీలు పంచిపెట్టే స్కీం లు మొదలుపెట్టారు కదా!" అంటూ సజెషన్ ఇచ్చింది.
    మా అందరికీ కూడా ఆ సజెషన్ నచ్చింది.
    "ఇంతకూ నీ అభిప్రాయం ఏంటమ్మా? అబ్బాయి నచ్చాడా?" అడిగాడు హనుమంతు.
    "లేదు" అందామె ఖండితంగా.
    "ఎందుకని"
    "నా సీరియల్ని అవమానపరచాడు"
    "నాకూ ఆ అమ్మాయి నచ్చలేదు. నా సీరియల్ని ఇన్సల్ట్ చేసింది" అన్నాడు పెళ్ళికొడుకు.
    "అయితే ఇంకా మనందరం ఎందుకిక్కడ- ఎవరి ఇంటికి వాళ్ళెళ్ళి సీరియల్స్ చూసుకుందాం" అన్నాడు హనుమంతు. అందరూ బయల్దేరారు.
    "ఒక చిన్న రిక్వెస్ట్ సార్" అన్నాడు పెళ్ళికొడుకు. అందరూ ఆగిపోయారు.
    "ఏమిటది?" అడిగాడు శంకరమూర్తి.
    "ఆ పనమ్మాయ్ పేరేంటో నాకు తెలీదు. నాకా అమ్మాయి నచ్చింది. మీకూ-ఆమెకీ, ఎవరికీ అభ్యంతరం లేకపోతే ఆ అమ్మాయిని పెళ్ళి చేసుకోవాలనుకుంటున్నాను-"
    అందరూ షాకయ్యాం. పనమ్మాయి మొఖం ఆనందంతో వెలిగిపోయింది.
    "మా ఇద్దరికీ ఇండియన్ ఐడల్ ప్రోగ్రాం ఇష్టం గనుక ఇద్దరం కలసి ప్రోగ్రాం చూస్తూ ఒకటే రూమ్ లో గడపొచ్చు. కలసి డైనింగ్ రూమ్ లో భోజనం చేయవచ్చు" అన్నాడతను.

            
    "అంతే కద్సార్! రెండు పోర్టబుల్ టీవీ సెట్లుంటే ఇద్దరం ఒకటే బెడ్ రూమ్ లో గడపొచ్చు. అయితే నాదో కండిషన్ సార్" అంది పనమ్మాయి.
    "ఏమిటది?"
    "నాకు ఇంటర్నెట్ ఉన్న మొబైల్ కొనివ్వాలి అందులోనే టీవీ చూసుకుంటా."
    "ఓ రేపే కొనిస్తా" అన్నాడు పెళ్ళికొడుకు.
    "మరి మా ఇంట్లో పనంతా చేస్తావా" అడిగింది పెళ్ళికొడుకు తల్లీ.
    "మరి అంతా కాదుగానీ కొంతవరకు చేస్తా! మిగతాది వంటమనిషి చేస్తుంది."
    "నో- ప్రాబ్లెమ్" అన్నాడు కోటేశ్వర్రావ్.
    "శుభం" అన్నాడు హనుమంతు.