శ్రీమతి మంజులత, డి.

    బంగారపు గాజులు

    ఒకరోజున ఎంతో ప్రేమతో కొని యిచ్చాను
    నీవు కోరిన బంగారపు గాజులజత ఒకటి!
    ఆ తరువాత మళ్ళీ నేను నేటివరకూ
    నీకేమి యివ్వలేకనే పోయాను!

        నిజం చెప్పు చెల్లీ!
        నీ సోదరు డిచ్చిన
        ఆ బంగారపు గాజులు నేడు
        నీ చేతులకు శోభను కలిగిస్తాయంటావా?

    నా ముద్దుల చెల్లీ!
    నా మాట వినుతల్లీ!
    ఆ గాజులను వెంటనే అమ్మివేసి
    కొన్ని పౌనుల ఉన్ని కొని తీసుకురా!
    మంచుకొండల భీకర శీతల వాయువుల్లో
    నీ సోదరుల శరీరరక్తం
    మంచువలె గడ్డకట్టుకుపోతున్న
    ఈ విపత్కర తరుణంలో

        నిజం చెప్పు చెల్లీ!
        నీ సోదరు డిచ్చిన
        ఆ బంగారపు గాజులు నేడు
        నీ చేతులకు శోభను కలిగిస్తాయంటావా?

    అందుకే నా చిట్టిచెల్లీ!
    ఆ గాజులను అమ్మివేయమంటున్నాను
    అల్లడానికి వున్ని, సూదులు కొనమంటున్నాను!
    నీవు కాలేజీకి ఈ రోజున
    వెళ్ళకపోయినా మించిపోయిందేమీ లేదు
    తక్షణం నీవు చేయవలసింది-
    స్వెట్టర్లూ, మఫ్లర్లూ అల్లడమే!
    పిచ్చాపాటి కబుర్లతో
    కాలాన్ని వృధాచేయక
    విలాసాలను విడనాడి
    కాలపు విలువను గ్రహించు చెల్లీ!
    నీ సోదరులు భయంకర శీతలంలో
    పిస్తోలు, తుపాకిని చేబూని
    ఏహ్యుడు, నీచుడు, రక్తపిపాసి అయిన
    పశువులాంటి శత్రువుతో పోరాడుతున్నారు!
    ఈ వీరులకోసం-
    నా చిట్టిచెల్లీ!
    ఈరోజు రాత్రి నీవు విశ్రమించకపోయినా
    మించిపోయినదేమీ లేదు
    నీవుమాత్రం స్వెట్టర్లూ, మఫ్లర్లూ
    అల్లి పంపించు తక్షణం!
    గడగడ వణికించే చలిలో
    నీ ప్రేమలోని వెచ్చదనాన్ని
    దేశంకోసం పోరాడుతున్న
    నీ సోదరులు కొంచమైనా అనుభవించకపోతే

         నిజం చెప్పు నా చిట్టిచెల్లీ!
        నీ సోదరు డిచ్చిన
        ఆ బంగారపు గాజులు నేడు
        నీ చేతులకు శోభను కలిగిస్తాయంటావా?

                                                                         మూలం: దీపక్ గంగోపాధ్యాయ

                                       *  *  *  *