శ్రీ భీమన్న, బోయి

    విశ్వేశ్వరునికి హెచ్చరిక

    ఎవరులోపల? గడియబిగించుకొని, ప
    రుండినాడవె, శివశివా, ఒడలు,మరచి?
    భరతభువి నెత్తిమీద కుంపట్లు మండ,
    గుబులుపుట్టుట లేదొకో గుండెలోన?

    "ఇల్లును వాకిలిన్ కలుగ,
        దేర్పడ రూపము కూడలేదు, మా
    యల్లున" కన్నదేయనుము,
        అత్త! పరాయిదె? కోపమూనగా
    చెల్లునె? నీవు పోవగని,
        ఛీ నరహట్టులు నీదు అత్త వా
    రిల్లును ముట్టడించిరి! స
        హింతువె? పార్వతి నూరడించవే?

    అలిగివచ్చి కాశి నదివసిస్తివె కాని
    హిమగిరీంద్రుడన్న హితవులేదె?
    ఏది పాశుపతము? ఏది త్రిశూలమ్ము?
    పారవైచినావె ప్రాతవనుచు?

    ధరణిన్ గల్గిన సర్వ మానవులకున్
        తత్త్వామృతమ్మిచ్చి, ని
    ర్జర తేజస్వుల జేసినట్టి హిమవత్
        క్ష్మాదేవి రక్షింప నీ
    వురుకంగావలెగాని-సాధనములే
        దో? ముష్టి వీబూదిలో
    పరమూణ్వాయుధ కోటి పుట్టదో? రిపు
        వ్రాతమ్ము గోల్మాలదో?

    వేద వేదాంత సుధలుద్భవించె నిందు,
    బ్రహ్మ విష్ణీశ్వరాశ్రయారామమిద్ది,
    సర్వ చైతన్యశక్తి నీ సతికి వసతి
    ఈ హిమాలయ శ్రేణి, రక్షించుకొమ్ము!

    కాశిని వీడనక్కరయు
        కల్గదు; మేల్కొని, నీ లలాట స
    ర్వాశనభూతి కొంచెమిటు
        రాల్పుము; కైకొని, వీరభద్రులై
    దేశములోని మేటి యువ
        తీయువకోటి సమస్త ఛీనులన్
    నాశముచేసి వత్తురు, ఘ
        నమ్ముగ నీ విభుతన్ భజించుచున్!

                                                                *  *  *  *