యువభారత యుగోదయంలో
    
    యువభారత యుగోదయంలో
    నవభారత మహోదయంలో
    పూచిందొక అరుణతరంగం
    లేచిందొక క్రాంతి విహంగం                       ||యువ||

    కంఠంలో విప్లవరాగం
    గమనంలో విద్యుద్వేగం
    దేశానికి నవసందేశం
    లోకానికి నూత్నాలోకం                          ||యువ||

    త్యాగోజ్జ్వుల మహిమా మండిత
    రాగారుణ రక్తపతాకం
    నవభారత హృదయాంబరమున
    ప్రసరించిన మహేంద్రచావం                     || యువ||

    చైతన్యం జీవితలక్ష్యం
    స్వాతంత్ర్యం అంతస్సాక్ష్యం
    ప్రాచీ దిగ్ద్రగంచలంలో
    రోచిస్సులు చిలికే కిరణం                         ||యువ||

    అజ్ఞాతం అతిక్రమించిన    
    ప్రజ్జామయ విజయవిహారం
    కురుక్షేత్ర సంగ్రామానికి
    గురిపెట్టిన ఘనగాండీవం                         | |యువ||

    
                              అదిగో మన విజయ పతాకం

    అదిగో మన విజయపతాకం
    అదిగో మన వీరపతాకం
    దిగంతముల విరిసిందదిగో
    దృగంతముల మెరిసిందదిగో                    ||అదిగో||

    మువ్వన్నెల మేలు పతాకం
    ముల్లోకము లేలు పతాకం
    నవభారత రాజ్యపతాకం
    యువభారత పూజ్యపతాకం                     ||అదిగో||

    త్రివర్ణములు మెరయు పతాకం
    సువర్ణములు కురియు పతాకం
    త్యాగరుణ తరుణపతాకం
    రాగారుణ కరుణ పతాకం                          ||అదిగో||

    స్వాతంత్ర్యం మించు పతాకం
    చైతన్యం పంచు పతాకం
    జాతీయాభ్యుదయం పతాకం
    జ్యోతిర్మయ జయప్రతీకం                          ||అదిగో||
                   
                            దీనుల ప్రేమించరా
    
    దీనుల ప్రేమించరా దేవుని కృపగాంచరా
    దిక్కులేని మనుజులలో దేవుని దర్శించరా                  ||దీనుల||

    కన్నతల్లి మమతలోన గంగానది ప్రవహించును
    చిన్నిచెల్లి ప్రేమలోన సిరిమల్లెలు వికసించును
    ప్రేమే దైవంమురా ప్రేమే స్వర్గమురా
    ప్రేమ లేని బందబ్రతుకు భీకర నరకమమ్మురా              ||దీనులు||

    ఆర్తుల మొరలాలింపుము ఆపన్నుల పాలింపుము
    వెనుకబడ్డ శ్రమ జీవుల వెన్ను దట్టి లాలింపుము
    ప్రజాసేవయే నిజమగు భగవంతుని సేవరా
    నిజాయితీ గల నడవడి విజయానికి త్రోవరా                  ||దీనుల||

    బీదసాదలను దయతో ఆదుకోనుట మనకందం
    తోడివారి కష్టములో తోడుపడుట అనందం
    ఆ అందం అనందం ఆ జ్ఞానం ఆ ధ్యానం
    శుభముగోరు మానవులకు ప్రభువిచ్చే వరదానం            ||దీనుల||

                           నల్లనయ్య నవ్వితే

    నల్లనయ్య నవ్వితే
    ఇల్లంతా వెన్నెలే
    వెన్నదొంగ కన్నులేత్తితే
    విరజాజుల వన్నెచిన్నేలె                        ||నల్లనయ్య||

    శిఖిపించం ఊగితే
    అఖిలవిశ్వ మూగునే
    వనమాలిక పరిమళించితే
    వనమంతా పరవశించునే                       ||నల్లనయ్య||

    యదుకిశోరు డాడితే
    యమున పొంగిపోవునే
    బాలమురళి పాడితే
    బండలు చివురించునే                          ||నల్లనయ్య||

    బృందావన లోలుడే
    నందగోప బాలుడే
    కందోయికి విందోనరించే    
    అందాల ముకుందుడే                           ||నల్లనయ్య||

    
                                                 కల్యాణ జానకి

    జగము లేలే తల్లి సర్వమంగళ గౌరీ
    గగన గంగాధరుని గారాలు దేవేరి                       ||జగము||

    రాజిల్లు శ్రీరాజరాజేశ్వరివి నీవు
    తెజరిల్లెడు మహా త్రిపురసుందరి వీవు
    జయ కంచి కామాక్షి! జయ మధుర మీనాక్షి!
    కయి మోడ్పు లివె నీకు కాశీ విశాలాక్షి!                ||జగము||

    నీ ప్రేమ మందాకినీ ప్రవాహము గదే    
    నీ ప్రావు కల్పవల్లీ ప్రరోహము గదే
    ఏ ప్రొద్దు నీ సేవలే కటాక్షింపవే
    నా ప్రార్ధనమ్ము విని నిన్ను రక్షింపవే                   ||జగము||

    నల్లనల్లని స్వామి విల్లెక్కు పెట్టాలి
    ఎల్లలోకాలు చేయెత్తి జయపెట్టాలి
    కోదండరాము సిరిగులుకు పేరురము పయి
    పూదండనై నేను పులకించిపోవాలి                     ||జగము||

    
                          నమో నమో నటరాజా

    నమో నమో నటరాజా జయజయ
    నమో జాగ్రత్తయ నాట్యసమాజా                           ||నమో||

    రక్తి ముక్తి అనురక్తియు నీవే
    గీతమీవే సంగీతము నీవే
    రాగ తాళ లయ రసార్ద్రమూర్తీ
    నిత్య సత్య సాహిత్యస్పూర్తీ                                   ||నమో||

    ఢమ ఢమ ఢమ ఢమ డమరుకనాదం
    భం భం భం భం శంఖారావం
    ధిమిం ధిమిత మంగళమృదంగమో
    ఘుమం ఘుమిత గంగాతరంగమో                            ||నమో||

    చెదరిపోవునో శేషుని శిరములు
    బెదరిపోవునో దిక్కుంజరములు
    అదరిపోవునో అవనీతలమే
    పదము కదల్చకు కరము విడల్చకు                          |నమో||

                                         ***