త్యాగమయి
                                                                    అనురాగమయి
                                                                    అనసూయాదేవికి

    నీవొక 'సాఖి'వై మధువు నింపితి వీ రసహీనమైన నా
    జీవితపాత్రలో; పరవశించితి నీయనురాగపూర్ణ బృం
    దావనమందు చిందు కవితామకరంద రసమ్ము త్రావి నా
    భావ మధువ్రతాలు ప్రభు పాదసరోజములందు వ్రాలెడిన్.

    పోయిన జంటగా కలిసిపోయెదమంటివిగాదె! ముందుగా
    పోయితి వేమిటో మునిగిపోయినయట్లుగ నన్నువీడి అ
    మ్మాయిని వీడి నీ ప్రియకుమారుల మన్మల వీడి ఎవ్వరో
    'రా'యని పిల్చినట్టు లవురా! విధి చెయ్దము లెంతవింతలో!!

    మంచి ఫలాలు రెండు గొని, మంజుల పుష్పమొకండు పూని, ని
    ర్వంచితభక్తి మాసశివరాత్రికి కోవెల కేగి - స్వామి న
    ర్చించి నమస్కరించి వినుతించి ప్రసాదము తెచ్చి చేతి కం
    దించి - క్షణమ్ములో సురలు తెచ్చిన పుష్పక మెక్కిపోతివా!

    త్యాగమయీ! త్వదీయ సముదాత్త మహత్తర చిత్తశుద్ధియే
    లోగొనె నన్ను నా యెడదలో బడబాగ్నిని నీ దయాసుధా
    సాగర వీచితో ఒక ప్రశాంతివనమ్ముగ మార్చినావు; దే
    వీ! గయికొమ్ము నీవు మొలపించిన మొక్కల వీప్రసూనముల్!!