2019 అక్టోబర్‌లో అల్లు అర్జున్‌, సుకుమార్‌ల ‘పుష్ప’ సిరీస్‌ ప్రారంభమైంది. 2024 నవంబర్‌ వరకు షూటింగ్‌ జరిగింది. అంటే ‘పుష్ప1’, ‘పుష్ప2’ కోసం చిత్ర యూనిట్‌లోని అందరూ 5 సంవత్సరాలు కష్టపడ్డారు. అందులో సుకుమార్‌ శ్రమ ఎంతో ఉంది. అయితే ఆ శ్రమకు తగ్గట్టుగానే ప్రేక్షకులు భారీ ఫలితాన్ని అందించారు. ‘పుష్ప’ సంచలన విజయం సాధించడమే కాకుండా, అల్లు అర్జున్‌కు ఉత్తమ నటుడిగా జాతీయ అవార్డును తెచ్చిపెట్టింది. ఇప్పుడు ‘పుష్ప2’ ప్రపంచవ్యాప్తంగా విడుదలై కలెక్షన్లపరంగా కొత్త రికార్డులు సృష్టిస్తోంది. ఇప్పుడు అందరి మనసుల్లోనూ మెదులుతున్న ప్రశ్న.. సుకుమార్‌ నెక్స్‌ట్‌ చెయ్యబోయే సినిమా ఏమిటి? దీని గురించి సోషల్‌ మీడియాలో కూడా చర్చ జరుగుతోంది. 

రామ్‌చరణ్‌, సుకుమార్‌ కాంబినేషన్‌లో వచ్చిన ‘రంగస్థలం’ ఎంత పెద్ద హిట్‌ అయిందో అందరికీ తెలిసిందే. ‘పుష్ప2’ తర్వాత వీరిద్దరి కాంబినేషన్‌లో సినిమా ప్రారంభం కావాల్సి ఉంది. కానీ, ‘పుష్ప2’ షూటింగ్‌ బాగా డిలే కావడంతో బుచ్చిబాబు సానాతో ఓ సినిమా కమిట్‌ అయ్యారు చరణ్‌. అది పూర్తయితేనేగానీ సుకుమార్‌తో సినిమా చేసే అవకాశం లేదు. ప్రస్తుతం సుకుమార్‌ దగ్గర కథ కూడా సిద్ధంగా లేదని తెలుస్తోంది. బుచ్చిబాబు సినిమా పూర్తవ్వడానికి ఇంకా చాలా టైమ్‌ ఉంది కాబట్టి ఈలోగా సబ్జెక్ట్‌ రెడీ చేసుకోవచ్చు. అయితే ఈలోగా సుకుమార్‌ రైటింగ్స్‌, శ్రీవెంకటేశ్వర క్రియేషన్స్‌ బేనర్స్‌లో నిర్మిస్తున్న ‘సెల్ఫిష్‌’ చిత్రానికి కొన్ని మరమ్మతులు చెయ్యాల్సిన అవసరం ఉందట. సెకండాఫ్‌ ఆశించిన స్థాయిలో లేదని, దాన్ని ఒకదారికి తీసుకు రావాల్సిన బాధ్యత సుకుమార్‌పైనే ఉందని తెలుస్తోంది. ఈ సినిమాలో దిల్‌రాజు మేనల్లుడు ఆశిష్‌రెడ్డి హీరోగా నటిస్తున్న విషయం తెలిసిందే.

అంతేకాకుండా సుకుమార్‌ రైటింగ్స్‌ బేనర్‌లో రెండు సినిమాలు సెట్స్‌పైకి వెళ్లబోతున్నాయి. ఆ సినిమాలకు సంబంధించి కథలు కూడా సుకుమార్‌ ఓకే చెయ్యాల్సి ఉంది. వీటన్నింటినీ మించి సుకుమార్‌కి కొన్ని ఆరోగ్య సమస్యలు ఉన్నాయి. కొంతకాలంగా అతను బ్యాక్‌పెయిన్‌తో బాధపడుతున్నారు. ఇంతకాలం షూటింగులతో బిజీగా ఉన్న సుకుమార్‌ దాన్ని పట్టించుకోలేదు. ఇప్పుడు ఆ బ్యాక్‌పెయిన్‌కి చికిత్స తప్పనిసరి. అందుకే త్వరలోనే అమెరికా వెళ్లేందుకు ఏర్పాట్లు చేసుకుంటున్నట్టు తెలుస్తోంది. అక్కడే కొన్ని నెలలు ఉండి ట్రీట్‌మెంట్‌ తీసుకుంటారు. దీన్నిబట్టి 2025 మొత్తం సుకుమార్‌ సినిమాలకు దూరంగా ఉంటారని తెలుస్తోంది. సుకుమార్‌ రైటింగ్స్‌లో సినిమాలు ప్రారంభం కాబోతున్నాయి. కానీ, సుకుమార్‌ డైరెక్ట్‌ చేసే సినిమా మాత్రం ఇప్పట్లో లేనట్టే.