ఎస్ ఒరిజిన‌ల్స్‌తో క‌లిసి టికెట్ ఫ్యాక్ట‌రీ తొలి య‌త్నంగా నిర్మిస్తోన్న చిత్రం 'పంచ‌తంత్రం'. హ‌ర్ష పులిపాక డైరెక్ట్ చేస్తోన్న ఈ సినిమా టైటిల్ పోస్ట‌ర్‌ను శుక్ర‌వారం విడుద‌ల చేశారు. దాంతో పాటు ప్ర‌ధాన పాత్ర‌ధారుల‌ను వెల్ల‌డిచేస్తూ ఓ వీడియోను రిలీజ్ చేశారు. ఆ న‌టీన‌టుల‌ను చూస్తే సో ఇంట్రెస్టింగ్ అనిపించ‌క మాన‌దు. 'మ‌త్తు వ‌ద‌ల‌రా' ఫేమ్ న‌రేశ్ అగ‌స్త్య‌, సూర్య‌కాంతం ఫేమ్ రాహుల్ విజ‌య్‌, శివాత్మిక‌, స‌ముద్ర‌క‌ని, స్వాతిరెడ్డి, బ్ర‌హ్మానందం, దివ్య శ్రీపాద, శ్రీవిద్య, వికాస్, ఆదర్శ్ బాలకృష్ణ ‌ఈ సినిమాలో న‌టిస్తున్నారు. వివాహానంత‌రం ఇంత‌దాకా సినిమాల్లో క‌నిపించ‌ని క‌ల‌ర్స్ స్వాతి ఈ సినిమాతో రి-ఎంట్రీ ఇస్తోంది. శివాత్మిక పుట్టిన‌రోజు సంద‌ర్భంగా ఆమె క్యారెక్ట‌ర్ పేరును కూడా రివీల్ చేస్తూ ఓ పోస్ట‌ర్ విడుద‌ల చేశారు. హీరోయిన్ లేఖ క్యారెక్ట‌ర్‌లో శివాత్మిక క‌నిపించ‌నున్న‌ది.

ఈ చిత్రాన్ని సంయుక్తంగా నిర్మిస్తోన్న అఖిలేష్‌ వర్ధన్‌, సృజన్‌ ఎరబోలు "శివాత్మిక గారికి పుట్టినరోజు శుభాకాంక్షలు. 'దొరసాని'గా ఆకట్టుకున్న ఆమె, లేఖగా మరోసారి ప్రేక్షకుల మనసు దోచుకుంటారు. ఆమె పాత్రతో పాటు బ్రహ్మానందం, స్వాతి, రాహుల్ విజయ్, నరేష్ అగస్త్య పాత్రలు సినిమాలో కీలకం. 'కలర్‌ ఫొటో'తో ప్రేక్షకులతో పాటు పరిశ్రమ దృష్టిని ఆకర్షించిన దర్శకుడు సందీప్‌ రాజ్‌ మా చిత్రానికి మాటలు రాయడం సంతోషంగా ఉంది. అలాగే, వరుస విజయాల్లో ఉన్న సంగీత దర్శకుడు ప్రశాంత్‌ ఆర్‌. విహారి సంగీతం అందిస్తున్నారు’’ అని అన్నారు.

శివాత్మిక రాజశేఖర్ మాట్లాడుతూ "ఈ సినిమాలో నేను ఓ భాగం కావడం గర్వంగా, ఎంతో సంతోషంగా ఉంది. లేఖ పాత్రలో నటించడం నా అదృష్టం" అని అన్నారు.

ఈ చిత్రంతో రచయితగా, దర్శకుడిగా పరిచయమవుతున్న హర్ష పులిపాక మాట్లాడుతూ ‘‘ప్రతి జీవికి అవసరమైన పంచేంద్రియాలు - చూపు, వినికిడి, రుచి, స్పర్శ, వాసన... ఏవైతే ఉన్నాయో వాటి చుట్టూ అల్లుకున్న కథతో ఈ సినిమా తెరకెక్కిస్తున్నాం. ఐదు భావోద్వేగాలు మిళితమైన చక్కటి కథ ఇది. యువతరం ఆలోచనలు, వాళ్ల దృక్పథాలకు అద్దం పట్టేలా కథ, కథనాలు ఉంటాయి" అని అన్నారు.

ఈ చిత్రానికి మాటలు: హర్ష పులిపాక, ‘కలర్‌ ఫొటో’ సందీప్‌ రాజ్‌, పాటలు: కిట్టు విస్సాప్రగడ, సంగీతం: ప్రశాంత్‌ ఆర్‌. విహారి, సినిమాటోగ్రఫీ: రాజ్‌ కె. నల్లి, ఎడిటర్‌: గ్యారీ బీహెచ్‌, సహ నిర్మాతలు: రమేష్ వీరగంధం, రవళి కలంగి.