సినిమాలో విషయం ఉంటే వసూళ్లు వాటంతట అవే రోజురోజుకి పెరుగుతాయి అనడానికి తాజా నిదర్శనం 'హాయ్ నాన్న'. నేచురల్ స్టార్ నాని నటించిన ఈ రొమాంటిక్ ఫ్యామిలీ డ్రామా డిసెంబర్ 7న ప్రేక్షకుల ముందుకు వచ్చింది. అయితే క్లాస్ సినిమా కావడంతో నాని స్థాయి ఓపెనింగ్స్ ని రాబట్టలేకపోయింది. అయినప్పటికీ సినిమాకి పాజిటివ్ టాక్ రావడం, కుటుంబ ప్రేక్షకులు సినిమా చూడటానికి ఆసక్తి చూపిస్తుండటంతో వసూళ్లు క్రమంగా పెరుగుతున్నాయి. మొదటి రోజుతో పోలిస్తే మూడో రోజు కలెక్షన్లు ఎక్కువగా ఉండటం దానికి నిదర్శనం.

తెలుగు రాష్ట్రాల్లో మొదటి రోజు రూ.2.91 కోట్ల షేర్, రెండో రోజు రూ.2.04 కోట్ల షేర్ రాబట్టిన హాయ్ నాన్న మూవీ.. మూడో రోజు రూ.3.80 కోట్ల షేర్ తో సత్తా చాటింది. దీంతో తెలంగాణ, ఆంధ్రప్రదేశ్ లో కలిపి మూడు రోజుల్లో రూ.8.75 కోట్ల షేర్ వసూలు చేసింది. ఇక కర్ణాటక+రెస్టాఫ్ ఇండియా రూ.1.70 కోట్ల షేర్, ఓవర్సీస్ లో రూ.4.30 కోట్ల షేర్ కలిపి.. మూడు రోజుల్లో వరల్డ్ వైడ్ గా రూ.14.75 కోట్ల షేర్ రాబట్టింది.

వరల్డ్ వైడ్ గా రూ.27.60 కోట్ల థియేట్రికల్ బిజినెస్ చేసిన హాయ్ నాన్న.. మొదటి రోజు రూ.5.51 కోట్ల షేర్, రెండో రోజు రూ.3.54 కోట్ల షేర్, మూడో రోజు రూ.5.70 కోట్ల షేర్ తో.. మూడు రోజుల్లో 50 శాతానికి పైగా రికవర్ చేసింది. బ్రేక్ ఈవెన్ సాధించాలంటే ఇంకా రూ.13 కోట్ల షేర్ రాబట్టాల్సి ఉంది. నాలుగో రోజు ఆదివారం కావడంతో మరో రూ.5 కోట్ల షేర్ కలెక్ట్ చేసే ఛాన్స్ ఉంది. మరోవైపు డిసెంబర్ 22 వరకు భారీ సినిమాల విడుదల లేకపోవడంతో.. హాయ్ నాన్న బ్రేక్ ఈవెన్ సాధించే అవకాశాలు పుష్కలంగా కనిపిస్తున్నాయి.