సినిమా తారలందరికీ అభిమానులు ఉంటారు. ఇక స్టార్‌ హోదాలో ఉన్నవారికైతే చెప్పక్కర్లేదు. వారికి మామూలు ఫాలోయింగ్‌ ఉండదు. ఒకప్పుడు అలాంటి ఫాలోయింగ్‌ తెచ్చుకోవాలంటే ఎన్నో సినిమాలు చేసేవారు. వారి అభిమానాన్ని పొందేందుకు ఎంతో కృషి చెయ్యాల్సి వచ్చేది. కానీ, ఇప్పుడా పరిస్థితి లేదు. ఒక్కసారిగా తారాథంలో దూసుకెళ్ళడానికి కేవలం ఒక్క సినిమా చాలు. ఇది ఈమధ్యకాలంలో చాలామంది హీరోలు, హీరోయిన్ల విషయంలో ప్రూవ్‌ అయింది. సినిమా ఇండస్ట్రీలో ఎప్పటి నుంచో ఉన్నప్పటికీ ఆ ఒక్క సినిమా వారి జీవితాన్ని మార్చేస్తుంది. అలా ఒక్కసారిగా స్టార్‌డమ్‌ను పొందిన హీరోయిన్‌ మమిత బైజు. ‘ప్రేమలు’ చిత్రంతో హీరోయిన్‌గా లైమ్‌లైట్‌లోకి వచ్చిన ఆమెకు మంచి ఫ్యాన్‌ ఫాలోయింగ్‌ ఏర్పడిరది. 

‘ప్రేమలు’ చిత్రం మలయాళంలో రూపొందిన సినిమా. అక్కడ సూపర్‌ డూపర్‌హిట్‌ అయిన ఈ సినిమాను తమిళ్‌లో, తెలుగులో కూడా రిలీజ్‌ చేశారు. రెండు భాషల్లోనూ ఘనవిజయం సాధించింది. ముఖ్యంగా తమిళనాడులో ఆమెకు వీరాభిమానులు పెరిగిపోయారు. మలయాళంలో కొన్ని సంవత్సరాలుగా సినిమాలు చేసినా ‘ప్రేమలు’ మాత్రమే ఆమెను స్టార్‌ హీరోయిన్‌గా చేసింది. సాధారణంగా హీరోయిన్లు పబ్లిక్‌లోకి వస్తే ఎన్ని ఇబ్బందులు ఎదుర్కోవాల్సి వస్తుందో అందరికీ తెలిసిందే. వారు బాడీ గార్డ్స్‌ లేకుండా బయటికి అడుగుపెట్టే అవకాశం లేదు. అయినప్పటికీ వారికి కొన్ని చేదు అనుభవాలు ఎదురవుతూ ఉంటాయి. అలాంటి అనుభవమే ఇటీవల మమిత బైజుకి ఎదురైంది. 

కొన్ని ఫంక్షన్స్‌కి, షాపింగ్‌ మాల్‌ ఓపెనింగ్స్‌కి హీరోయిన్లను గెస్టులుగా ఆయా షాపుల యాజమాన్యం ఆహ్వానిస్తుంటారు. ఇటీవల చెన్నయ్‌లోని వి.ఆర్‌.మాల్‌లో ఓ గోల్డ్‌ షోరూమ్‌ ప్రారంభోత్సవానికి మమిత హాజరైంది. ఆమె రాక గురించి ముందే తెలుసుకున్న అభిమానులు వేల సంఖ్యలో అక్కడికి చేరుకున్నారు. ఆ బ్యూటీని దగ్గరగా చూసేందుకు, ఆమెతో కలిసి సెల్ఫీలు దిగేందుకు సిద్ధమయ్యారు. ఆమె రాగానే ఒక్కసారిగా అక్కడ కలకలం మొదలైంది. ఆమెను చూసేందుకు జనం ఎగబడ్డారు. సెక్యూరిటీ కట్టుదిట్టంగా ఏర్పాటు చేసినప్పటికీ ఆమె దగ్గరకు వెళ్ళేందుకు ట్రై చేశారు. పరిస్థితిని గమనించిన మమిత సన్నిహితులు, బాడీ గార్డులు ఒక వలయంలా ఏర్పడి ఆమెను సురక్షితంగా మాల్‌లోకి తీసుకెళ్లారు. ప్రారంభోత్సవం పూర్తయిన తర్వాత పరిస్థితి మరింత దారుణంగా మారడంతో ఆమెను మరింత జాగ్రత్తగా బయటికి తీసుకు రావాల్సి వచ్చింది. దీనికి సంబంధించిన వీడియో ఇప్పుడు వైరల్‌గా మారింది. మమిత భయం భయంగా బయటికి రావడం, తనకు ఏం జరుగుతుందోననే ఆందోళన ఆమెలో కనిపించింది. అయితే ఎలాంటి అవాంఛనీయ ఘటన జరగకుండా క్షేమంగా ఆమెను అక్కడి నుంచి పంపించి ఊపిరి పీల్చుకున్నారు గోల్డ్‌ షాప్‌ అధినేతలు.