వెండితెరపై ఆయన కనిపిస్తే చాలు.. థియేటర్లలో చప్పట్లు, ఈలలు మారుమోగిపోతాయి. ఎలాంటి బ్యాక్‌గ్రౌండ్ లేకుండా, కేవలం తన విలక్షణ నటనతో కోట్లాది మంది గుండెల్లో 'మక్కల్ సెల్వన్' గా స్థానం సంపాదించుకున్నారు విజయ్ సేతుపతి. 'సూదు కవ్వమ్', 'విక్రమ్ వేద', 'పిజ్జా', 'మహారాజా' వంటి బ్లాక్‌బస్టర్ చిత్రాలతో నేడు సౌత్ సినిమా ఇండస్ట్రీలోనే అత్యంత క్రేజ్ ఉన్న స్టార్ హీరోగా దూసుకుపోతున్నారు. కానీ, ఈ రంగుల ప్రపంచం వెనుక ఉన్న విజయ్ సేతుపతి అసలు జీవితం కన్నీళ్లు, ఆకలి, అప్పులు, కఠినమైన పోరాటాలతో నిండి ఉంది.

విజయ్ సేతుపతి స్వయంగా వెల్లడించిన వివరాల ప్రకారం.. ఆయన చిన్నతనంలో కుటుంబం తీవ్రమైన ఆర్థిక ఇబ్బందుల్లో ఉండేది. కుటుంబ పోషణ కోసం వాళ్ల నాన్న చాలా అప్పులు చేశారు. అప్పులు తీర్చలేక సతమతమవుతున్న సమయంలో అప్పులవాళ్లు నేరుగా ఇంటిపైకే వచ్చి గొడవలు చేసేవారు. ఆ భయానక వాతావరణంలో నాన్న ఒంటరిగా బాధపడకూడదని, ధైర్యంగా ఆయన పక్కనే నిలబడేవాడినని విజయ్ గుర్తుచేసుకున్నారు. ఎన్ని కష్టాలు ఉన్నప్పటికీ, ప్రతిరోజూ రాత్రి 9:30 గంటలకు వాళ్ల నాన్న బుల్లెట్ బండిపై వస్తూ తెచ్చే ఫ్రైడ్ రైస్ ప్యాకెట్ కోసం కుటుంబం అంతా ఆశగా ఎదురుచూసేదట. ఆ కొద్దిపాటి ఆహారాన్ని అందరూ పంచుకుని ఆనందంగా తిన్న ఆ క్షణాలే తన జీవితంలో అత్యంత మధుర జ్ఞాపకాలుగా మిగిలిపోయాయని ఆయన ఎమోషనల్ అయ్యారు.

నిజానికి విజయ్ సేతుపతికి నటుడు కావాలనే కల ఎప్పుడూ లేదు. కేవలం కుటుంబ ఆర్థిక కష్టాలను తీర్చడానికి, అప్పుల ఊబి నుంచి బయటపడటానికి మాత్రమే ఆయన వెండితెర వైపు అడుగులు వేశారు. తన స్కూల్ చదువుకునే రోజుల్లోనే ఆయన ఒక సాధారణ కూలీగా పనిచేశారు. ఆ తర్వాత రిటైల్ స్టోర్‌లో సేల్స్‌మ్యాన్‌గా, ఫాస్ట్‌ఫుడ్ సెంటర్‌లో క్యాషియర్‌గా, ఫోన్ బూత్ ఆపరేటర్‌గా ఎన్నో చిన్న చిన్న పనులు చేస్తూ పైసా పైసా కూడబెట్టారు. ఆపై కాస్త ఎక్కువ సంపాదించవచ్చనే ఆశతో దుబాయ్‌ వెళ్ళి అక్కడ అకౌంటెంట్‌గానూ ఉద్యోగం చేశారు.

దుబాయ్ నుండి తిరిగి వచ్చిన తర్వాత నాటక రంగానికి చెందినవారితో ఏర్పడిన పరిచయం ఆయన జీవితాన్ని మలుపు తిప్పింది. మొదట్లో చిన్న చిన్న క్యారెక్టర్లు చేస్తూ, 'తెన్మేర్కు పరువకాట్రు' చిత్రంతో హీరోగా పరిచయమయ్యారు. నిరంతర శ్రమ, అంకితభావంతో నేడు అత్యున్నత స్థాయికి చేరుకున్న విజయ్ సేతుపతి, ప్రస్తుతం తన తదుపరి చిత్రాలైన 'ట్రైన్', 'స్లమ్ డాగ్' చిత్రాలతో ప్రేక్షకుల ముందుకు రావడానికి సిద్ధమవుతున్నారు. ఒకప్పుడు అప్పులవాళ్లకు భయపడిన ఆ చిన్న కుర్రాడు.. నేడు కోట్ల మందికి ఆదర్శంగా నిలవడం నిజంగా ప్రతి ఒక్కరికీ ఒక గొప్ప స్ఫూర్తిదాయక పాఠం!