- జెట్ స్పీడ్‌లో ధనుష్

- లైన్‌లో ఉన్న క్రేజీ డైరెక్ట‌ర్స్ వీరే

- బాక్సాఫీస్ వద్ద ధనుష్ హవా

దక్షిణాది సినీ పరిశ్రమలో వైవిధ్యమైన పాత్రలకు పెట్టింది పేరు ధనుష్. నటనలో తనకంటూ ఒక ప్రత్యేకమైన ముద్ర వేసుకున్న ఈ వెర్సటైల్ యాక్టర్, ప్రస్తుతం సినిమాల వేగంలోనూ అందరినీ ఆశ్చర్యపరుస్తున్నారు. ఒక్క సినిమా పూర్తి కాకముందే మరో రెండు మూడు ప్రాజెక్టులను పట్టాలెక్కిస్తూ చిత్ర పరిశ్రమలో 'మోస్ట్ బిజీ స్టార్'గా నిలుస్తున్నారు. కేవలం స్టార్ డైరెక్టర్లకే కాకుండా, కొత్తదనాన్ని నమ్మే యంగ్ డైరెక్టర్లకు ధనుష్ ఇప్పుడు హాట్ ఫేవరెట్‌గా మారారు.

సాధారణంగా పెద్ద హీరోలు ఒక సినిమా కోసం ఏళ్ల తరబడి సమయం తీసుకుంటుంటారు. కానీ ధనుష్ రూటే వేరు. కథ నచ్చితే చాలు, మూడు నాలుగు నెలల్లోనే షూటింగ్ పూర్తి చేసి నిర్మాతలకు సేఫ్ జోన్ క్రియేట్ చేస్తారు. అందుకే కోలీవుడ్ యంగ్ టాలెంట్ అంతా ఇప్పుడు ధనుష్ ఇంటి ముందే క్యూ కడుతోంది. ఇటీవల 'పోర్ తొజిళ్' సినిమాతో మెప్పించిన విఘ్నేష్ రాజా దర్శకత్వంలో ధనుష్ నటించిన 'కర' చిత్రం విడుదలకు సిద్ధమైంది. ఏప్రిల్ 30న ఈ సినిమా ప్రేక్షకుల ముందుకు రానుంది.

ఈ క్రేజీ ప్రాజెక్ట్ లైన్లో ఉండగానే, 'అమరన్' సినిమాతో భారీ విజయాన్ని అందుకున్న దర్శకుడు రాజ్‌కుమార్ పెరియసామితో ధనుష్ తన 55వ సినిమా (D55) ప్రారంభించారు. దీనితో పాటు 'లబ్బర్ పందు' ఫేమ్ తమిళరాసన్ పచ్చముత్తుతో ఒక మూవీ, తన కెరీర్‌ను మలుపు తిప్పిన మారి సెల్వరాజ్ మరియు వెట్రిమారన్‌లతో మరికొన్ని చిత్రాలు చర్చల దశలో ఉన్నాయి. తాజాగా 'కపుల్ ఫ్రెండ్లీ' దర్శకుడు అశ్విన్ చంద్రశేఖర్ కూడా ధనుష్ కోసం ఒక ఇంట్రెస్టింగ్ స్క్రిప్ట్ సిద్ధం చేసినట్లు సమాచారం. ఈ సినిమాను ప్రముఖ నిర్మాణ సంస్థ యూవీ క్రియేషన్స్ నిర్మించే అవకాశం ఉందని టాక్ వినిపిస్తోంది.

ధనుష్ కేవలం నటుడిగానే కాకుండా, మెగాఫోన్ పట్టి దర్శకత్వంలోనూ తన సత్తా చాటుతున్నారు. బయోపిక్ చిత్రాలైన 'ఇళయరాజా', 'అబ్దుల్ కలాం' ప్రాజెక్టుల కోసం భారీ మేకోవర్ అవసరమైన నేపథ్యంలో వాటిని ప్రస్తుతానికి హోల్డ్‌లో ఉంచారు. వీటి స్థానంలో దర్శకుడిగా తన తదుపరి ప్రయత్నాలను ముమ్మరం చేశారు. ముఖ్యంగా మృణాల్ ఠాకూర్ ప్రధాన పాత్రలో ఒక లేడీ సెంట్రిక్ చిత్రాన్ని ధనుష్ తెరకెక్కించబోతున్నారనే వార్త ఇప్పుడు నెట్టింట వైరల్ అవుతోంది.

వరుస విజయాలతో దూసుకుపోతున్న ధనుష్, యంగ్ డైరెక్టర్లకు ఇచ్చే ప్రోత్సాహం పట్ల అభిమానులు హర్షం వ్యక్తం చేస్తున్నారు. సోషల్ మీడియాలో ధనుష్ లైనప్ చూసి "ఇక బాక్సాఫీస్ వద్ద ధనుష్ వేట మామూలుగా ఉండదు" అంటూ ఫ్యాన్స్ కామెంట్స్ చేస్తున్నారు. అటు కమర్షియల్ ఎలిమెంట్స్, ఇటు నటనకు ప్రాధాన్యమున్న చిత్రాలను బ్యాలెన్స్ చేస్తూ ధనుష్ సాగిస్తున్న ఈ ప్రయాణం యువ హీరోలకు ఆదర్శంగా నిలుస్తోంది. రాబోయే కాలంలో ఈ క్రేజీ కాంబినేషన్ల నుండి మరిన్ని సెన్సేషనల్ హిట్స్ రావడం ఖాయంగా కనిపిస్తోంది.