సినిమా ఇండస్ట్రీలో ఒకటికి మించి పెళ్లిళ్లు చేసుకోవడం అనేది ఎంతో సహజం. పాత రోజుల నుంచి ఇప్పటివరకు అలాంటి వివాహాలు మనం చూస్తూనే ఉన్నాం. ఇప్పుడు ఓ ప్రముఖ నటి రెండో పెళ్లి చేసుకుంది. ఇందులో విశేషం ఏమిటంటే ఆ పెళ్లికి పెద్ద ఆమె కూతురే. 12 ఏళ్ళ కూతురి సమక్షంలో ఈ పెళ్లి వైభవంగా జరిగింది. దీనికి సంబంధించిన ఫోటోలు, వీడియో సోషల్‌ మీడియాలో వైరల్‌గా మారుతున్నాయి. ఈ వివాహానికి సంబంధించిన వివరాల్లోకి వెళితే...

కొన్ని మలయాళ సూపర్‌హిట్‌ సినిమాల్లో నటించి ఆ తర్వాత బుల్లితెరపై వ్యాఖ్యాతగా పలు షోలు నిర్వహించిన ఆర్య.. బిగ్‌ బాస్‌ షోలో కూడా పాల్గొని సందడి చేసింది. ఇటీవల నటుడు, కొరియోగ్రాఫర్‌ సిబిన్‌ బెంజమిన్‌ను ప్రేమించి పెళ్లి చేసుకుంది. అయితే వీరిద్దరికీ ఇది రెండో వివాహమే. ఇరు కుటుంబాల సభ్యులు ఈ వివాహానికి అంగీకరించడంతో మేలో నిశ్చితార్థం చేసుకున్నారు. ఇటీవల వీరి పెళ్లి కొందరు సన్నిహితులు, కుటుంబ సభ్యుల సమక్షంలో జరిగింది. 

సాధారణంగా తల్లిగానీ, తండ్రిగానీ రెండో పెళ్లి చేసుకోవడానికి పిల్లలు ఇష్టపడరు. ఎందుకంటే ఆ వచ్చేవారు తమని ఎలా చూస్తారోననే సందేహం వారికి ఉంటుంది. కానీ, ఆర్య కూతురు మాత్రం అందుకు భిన్నంగా ఈ రెండో పెళ్లికి పూర్తిగా తన అంగీకారాన్ని తెలియజేయడమే కాకుండా, దగ్గరుండి మరీ పెళ్లి చేసింది. 12 ఏళ్ళ రోయా ఈ పెళ్లిలో అందర్నీ ఆకర్షించింది. తల్లిని పెళ్లి మంటపానికి వెంటపెట్టుకొని తీసుకొచ్చింది. తల్లి మెడలో సిబిన్‌ మూడు ముళ్లు వేస్తున్నప్పుడు రోయా ముఖం ఆనందంతో వెలిగిపోయింది. ఈ వివాహానికి సంబంధించిన ఫోటోలు, వీడియోలు సోషల్‌ మీడియాలో బాగా వైరల్‌ అయ్యాయి. సినీ ప్రముఖులతోపాటు నెటిజన్లు కూడా  కొత్త జంటకు శుభాకాంక్షలు తెలియజేస్తున్నారు. ముఖ్యంగా తల్లికి దగ్గరుండి పెళ్లి చేసిన రోయాను అందరూ అభినందిస్తున్నారు.