మూవీ : రేఖా చిత్రం
నటీనటులు: అసిఫ్ అలీ, అనస్వర రాజన్, మమ్ముట్టి, మనోజ్ కె జయన్ తదితరులు
కథ: రాము సునీల్
ఎడిటింగ్:  సమీర్ మహమ్మద్
మ్యాజిక్: ముజీబ్ మజీద్
సినిమాటోగ్రఫీ: అప్పు ప్రభాకర్
నిర్మాతలు: వేణు కున్నపిల్లి
దర్శకత్వం: జోఫిన్ టి. చాకో
ఓటీటీ : సోనిలివ్

కథ:

రాత్రి వేళ వర్షం పడుతున్న సమయంలో ఒక ఇంట్లో నుండి ఓ నలుగురు కలిసి గుర్తుతెలియని అమ్మాయిని చాపలో చుట్టేసి తీసుకెళ్తారు. కొంతదూరం వెళ్ళాక ఒక గొయ్యి తీసి అందులో పూడ్చిబెడతారు. అదంతా ఒక కుర్రాడు దూరం నుండి చూస్తాడు. ఓ ఇరవై సంవత్సరాల తర్వాత రాజేంద్రన్(సిద్దిఖీ) కారులో అడవి నుండి వెళ్తూ ఓ దగ్గర ఆపి లోపలికి వెళ్ళి ఓ చెట్టు కింద కూర్చొని వీడియో రికార్డ్ చేసి ఆత్మహత్య చేసుకుంటాడు. అదే సమయంలో గత కొంతకాలంగా సస్పెన్షన్ కి గురి అయిన పోలీస్ ఆఫీసర్ వివేక్ (అసిఫ్ అలీ) విధుల్లోకి వస్తాడు. ఇక రాజేంద్రన్ సూసైడ్ చేసుకున్నాడని తెలుసుకొని అక్కడికి వస్తాడు. ఇక తన టీమ్ అంతా కలిసి ఇన్వెస్టిగేషన్ మొదలెడతారు. అసలు రాజేంద్రన్ అక్కడే ఎందుకు సూసైడ్ చేసుకున్నాడు? చనిపోయిన ఆ అమ్మాయి ఎవరు? ఆ అమ్మయిని ఎందుకు చంపారనేది తెలియాలంటే ఈ మూవీ చూడాల్సిందే.

విశ్లేషణ:

ఈ కథ చాలా సింపుల్.. మొదటి పది నిమిషాల్లోనే కథని చూపించేశాడు దర్శకుడు. ఓ అమ్మాయిని కొంతమంది చంపారు. ఎందుకు చంపారు? ఎవరు చంపారో తెలుసుకోవాలనే క్యూరియాసిటీని రెకెత్తిస్తూ దర్శకుడు కథని ముందుకు తీసుకెళ్ళాడు. ఇక ఆ అమ్మాయి గురించి పోలీసులు చేస్తున్న ఇన్వెస్టిగేషన్ అంతగా మెప్పించిందా అంటే లేదనే చెప్పాలి. ఎందుకంటే ఆమెని ఎవరు చంపారో ? ఎందుకు చంపారో చూపించకుండా ఆమె సినిమాల్లోకి ఎలా వచ్చిందంటూ.. సినిమాల్లో నటించిన వారికి తనకి మధ్యగల సంభాషణలు, సీన్లు అన్నీ కూడా బోరింగ్ గా ఉంటాయి.

ఒకానొక సిచువేషన్ లో ఇది మర్డర్ మిస్టరీనా లేక ఆమె జీవిత కథనా అనే భావన కలుగుతుంది. తన ఫ్యామిలీ.. తను మొదటగా నటించిన రోల్.. ఇలా అన్నింటిని డీటేయిలింగ్ గా చూపిస్తూ అసలు కథని పక్కన పెట్టేశారు. దాంతో కథ గాడితప్పింది.. ఆడియన్స్ కి అప్పటికే ఓపిక ఉండదు. అందులోను ఈ సినిమా నిడివి రెండు గంటల ఇరవై నిమిషాలు.. నలభై నిమిషాల కంటెంట్ ని ఇంత స్లోగా సాగదీస్తూ చిత్ర విచిత్ర సన్నివేశాలతో గందరగోళం చేశారు.  ఇరవై సంవత్సరాల క్రితం జరిగిన హత్యకి ప్రతీకారం ఇంకా ఉందంటూ చివరిలో చూపించడం కూడా కాస్త అతి అనిపిస్తుంది.

ఆ అమ్నాయిని చంపింది నలుగురు అయితే ఇద్దరిని హైలైట్ చేసి చూపించారు. ఆ ఇద్దరి క్యారెక్టర్స్  కూడా పెద్దగా ఇంపాక్ట్ చూపించలేదు. పోలీసుల దగ్గర సరైన ఆధారాలు లేకపోయిన తీసుకెళ్ళి ఇన్వెస్టిగేషన్ చేయడం.. ఆ అమ్మాయిని చంపడానికి దారితీసిన పరిస్థితులని అర్థమయ్యేలా చెప్పలేకపోయాడు దర్శకుడు. 

కథలో ఎంతసేపు ఆ అమ్మాయి తరపు నుండే ఇన్వెస్టిగేషన్ సాగుతుంది. రాజేంద్రన్ చెప్పిన వాటిని పరిగణలోకి తీసుకొని ఒక సీరియస్ ఇన్వెస్టిగేషన్ ని చూపిస్తారనుకుంటే అది వదిలేసి ఏవో ఏవో చూపిస్తూ కథని నత్తనడకగా సాగదీసారు. అసలు కథకి వస్తున్న సీన్లకి సంబంధం లేదేమో అనిపించేలా అనిపిస్తుంది. అశ్లీల పదాలు వాడలేదు. అడల్ట్ సీన్లు లేవు.. ఫ్యామిలీతో కలిసి చూడొచ్చు. అయితే ఈ చిత్రం చూడాలంటే ఓపిక చాలా అవసరం. 

నటీనటుల పనితీరు:
రేఖాగా అనస్వర రాజన్, రాజేంద్రన్ గా సిద్దిఖీ,  వివేక్ గా అసిఫ్ అలీ చక్కగా నటించారు. ఇక మిగతావారు వారి పాత్రల పరిధి మేర నటించారు.

ఫైనల్ గా : స్లోగా సాగే ఎంగేజింగ్ థ్రిల్లర్. జస్ట్ వన్ టైమ్ వాచెబుల్

రేటింగ్: 2.25  / 5

✍️. దాసరి మల్లేష్