హీరో రామ్ పోతినేని తన 22వ సినిమాని 'మిస్ శెట్టి మిస్టర్ పొలిశెట్టి' ఫేమ్ మహేష్ బాబు దర్శకత్వంలో చేస్తున్నాడు. మైత్రి మూవీ మేకర్స్ నిర్మిస్తున్న ఈ సినిమా, 'RAPO 22' అనే వర్కింగ్ టైటిల్ తో రూపొందుతోంది. ఇందులో సాగర్ అనే పాత్ర పోషిస్తున్నాడు రామ్. దీంతో సాగర్ పేరు వచ్చేలా టైటిల్ ఉంటుందని గతంలో ప్రచారం జరిగింది. కానీ, ఇప్పుడు ఊహించని టైటిల్ ఒకటి తెరపైకి వచ్చింది. (Ram Pothineni)

'RAPO 22'కి 'ఆంధ్ర కింగ్ తాలూకా' అనే టైటిల్ ఖరారు చేసినట్లు ప్రచారం జరుగుతోంది. ఈ టైటిల్ విన్నప్పుడు పవన్ కళ్యాణ్ గుర్తుకు రావడం సహజం. పవన్ ఆంధ్రప్రదేశ్ ఉపముఖ్యమంత్రిగా బాధ్యతలు చేపట్టినప్పుడు 'డిప్యూటీ సీఎం తాలూకా' అనే మాట మారుమోగిపోయింది. ఈ క్రమంలో ఇప్పుడు రామ్ సినిమాకి 'ఆంధ్ర కింగ్ తాలూకా' అనే టైటిల్ పెట్టారనే వార్త ఆసక్తికరంగా మారింది.

వరుస మాస్ సినిమాలు చేసి పరాజయాలు ఎదుర్కొన్న రామ్.. కొంత గ్యాప్ తర్వాత చేస్తున్న రొమాంటిక్ ఎంటర్టైనర్ ఇది. ఈ సినిమాలో భాగ్యశ్రీ బోర్సే హీరోయిన్ గా నటిస్తోంది. వివేక్-మెర్విన్ ద్వయం సంగీతం అందిస్తున్నారు.