క్రికెట్ కింగ్ హర్భజన్ సింగ్, యాక్షన్ కింగ్ అర్జున్ కలయికలో... రూ. 25 కోట్ల భారీ బడ్జెట్ తో తమిళంలో రూపొందుతున్న క్రేజీ చిత్రం 'ఫ్రెండ్‌షిప్'. జాన్ పాల్ రాజ్, శ్యామ్‌ సూర్య సంయుక్తంగా దర్శకత్వం వహిస్తున్న ఈ చిత్రాన్ని 'ఫ్రెండ్‌షిప్' పేరుతోనే.. 'సింగ్ అండ్ కింగ్' అనే ట్యాగ్ లైన్ జోడించి.. శ్రీ లక్ష్మీ జ్యోతి క్రియేషన్స్ పతాకంపై ఏ.ఎన్. బాలాజీ తెలుగులో అందిస్తున్నారు.

ఈ సినిమా టీజ‌ర్ ఇటీవ‌ల విడుద‌లైంది. "భ‌యం అనే స్పంద‌న ఒక‌సారి మ‌న‌ల్ని వ‌దిలి వెళ్లిపోతే మ‌ళ్లీ రానే రాదు" అనే వాయిస్ వినిపిస్తుండ‌గా హ‌ర్భ‌జ‌న్ సింగ్ ఎట్రీ ఇవ్వ‌డంతో టీజ‌ర్ మొద‌లైంది. ఇప్ప‌టిదాకా బౌలింగ్ లెజెండ్‌గా మ‌న‌కు తెలిసిన హ‌ర్భ‌జ‌న్ ఈ మూవీలో పాట‌లు పాడాడు, లుంగీ క‌ట్టి డాన్సులు చేశాడు, అద‌ర‌గొట్టేలా ఫైట్లు చేశాడు. టీజ‌ర్ ప్ర‌కారం ఆయ‌న స్టూడెంట్‌లా క‌నిపించాడు. 

ఇక యాక్ష‌న్ కింగ్ ఓ మిస్టీరియ‌స్ రోల్ పోషించిన‌ట్లు టీజ‌ర్ చూస్తే తెలుస్తోంది. హ‌ర్భ‌జ‌న్ జోడీగా త‌మిళ బిగ్ బాస్ విన్న‌ర్‌, మాజీ మిస్ శ్రీ‌లంక‌ లోస్లియా గ్లామ‌ర‌స్ రోల్ చేసిన‌ట్లు అర్థ‌మ‌వుతోంది. ఈ సీన్‌లో త‌న ఫ్రెండ్స్‌కు హ‌ర్భ‌జ‌న్ దేని గురించో వివ‌రిస్తుండ‌టాన్ని బ‌ట్టి వాళ్లేదో సీరియ‌స్ ఆప‌రేష‌న్ మీద ఉన్న‌ట్లు ఊహించ‌వ‌చ్చు. అలాగే త‌న నిజ జీవిత పాత్ర‌కు సంబంధించిన క్రికెట్‌ను కూడా ఈ సినిమాలో భ‌జ్జీ ఆడాడు. దానికి ఫ్రెండ్‌షిప్ ప్రీమియ‌ర్ లీగ్ స‌మ్మ‌ర్ 2021 అనే పేరు కూడా పెట్టారు. అంటే సినిమా ఈ స‌మ్మ‌ర్‌లోనే ప్రేక్ష‌కుల ముందుకు వ‌స్తోంది. 

బ్యాగ్రౌండ్ మ్యూజిక్ లౌడ్‌గా వినిపిస్తుండ‌టాన్ని బ‌ట్టి సినిమా కూడా లౌడ్‌గానే మాస్ ఆడియెన్స్‌ను ఎట్రాక్ట్ చేసేలా ఉంటుంద‌ని అనిపిస్తోంది. ఈ మూవీలో విల‌న్‌గా ప్రముఖ తమిళ నిర్మాత జె. సతీష్ కుమార్ (జెఎ స్ కె) నటిస్తున్నారు. 

నిర్మాత, శ్రీలక్ష్మి జ్యోతి క్తియేషన్స్ అధినేత ఏ.ఎన్.బాలాజీ మాట్లాడుతూ.. "ఇప్పటివరకు నేను తెలుగు, తమిళ, మలయాళ భాషల్లో 50కి పైగా సినిమాలు నిర్మించాను. నా కెరీర్ లో తొలిసారి "ఫ్రెండ్ షిప్" చిత్రాన్ని భారీ బడ్జెట్ తో, ఎంతో ప్రతిష్టాత్మకంగా నిర్మిస్తున్నాను. ఈ చిత్రం టీజర్ విడుదల చేశాం. త్వరలోనే ట్రైలర్ రిలీజ్ చేసేందుకు ప్లాన్ చేస్తున్నాం" అన్నారు.

ఈ చిత్రానికి మాటలు: రాజశేఖర్ రెడ్డి, సంగీతం: డి.ఎం. ఉదయ్ కుమార్, సినిమాటోగ్రఫీ: శాంతకుమార్, పి.ఆర్.ఓ: ధీరజ్-అప్పాజీ, నిర్మాత: ఏ.ఎన్.బాలాజీ, దర్శకత్వం: జాన్ పాల్ రాజ్, శ్యామ్ సూర్య.