బాహుబలి తరవాత దర్శకధీరుడు రాజమౌళి రూపొందిస్తోన్న చిత్రం ఆర్ఆర్ఆర్. యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ హీరోలుగా నటిస్తున్నారు. భారీ బడ్జెట్ తో పాన్ ఇండియా మూవీగా తెరకెక్కుతోన్న ఈ సినిమాపై భారీ అంచనాలున్నాయి. ఇప్పటికే విడుదలైన పోస్టర్స్, టీజర్స్ మూవీపై అంచనాలను మరింత పెంచాయి. అయితే ఇప్పుడు ఈ మూవీ ప్రమోషన్ కోసం రాజమౌళి ఓ మాస్టర్ ప్లాన్ వేసాడట.

'ఆర్ఆర్ఆర్' ప్రమోషనల్ సాంగ్ కోసం.. ప్రముఖ తమిళ సంగీత దర్శకుడు అనిరుధ్ రవిచంద్రన్ ‏ను రంగంలోకి దించుతున్నట్లుగా తెలుస్తోంది. సాధారణంగా రాజమౌళి చిత్రాలకు ఎంఎం కీరవాణి సంగీతం అందిస్తుంటారు. 'ఆర్ఆర్ఆర్'కి కూడా ఆయనే సంగీతాన్ని అందిస్తున్నారు. అయితే, ప్రమోషనల్ సాంగ్ ని అనిరుధ్ తో చేయిస్తే బాగుంటుందన్న ఉద్దేశంతో ఆయన్ని రంగంలోకి దించారని ప్రచారం జరుగుతోంది. ఈ పాటను ఎన్టీఆర్, చరణ్, అలియా భట్ లతో పాటు ఇతర ప్రధాన తారాగణంపై చిత్రీకరించడానికి ఏర్పాట్లు చేస్తున్నారట. ఇక ఈ ప్రమోషనల్ సాంగ్ లో అనిరుధ్ కూడా తనదైన స్టైల్లో సాంగ్ పాడుతూ స్టెప్పులేయనున్నాడట. 

'ఆర్ఆర్ఆర్'లో రామ్ చరణ్, ఎన్టీఆర్ సరసన బాలీవుడ్ భామ అలియా భట్, హాలీవుడ్ బ్యూటీ ఓలీవియా హీరోయిన్స్‏గా నటిస్తున్నారు. అలాగే బాలీవుడ్ స్టార్ అజయ్ దేవగన్ కీలక పాత్రలో నటిస్తున్నాడు. ఈ సినిమాను అక్టోబర్ 13న విడుదల చేసేందుకు సన్నాహాలు చేస్తున్నారు.