నటసింహం నందమూరి బాలకృష్ణ తన 109వ సినిమాని బాబీ కొల్లి దర్శకత్వంలో చేస్తున్న సంగతి తెలిసిందే. 'అఖండ', 'వీరసింహ రెడ్డి', 'భగవంత్ కేసరి' వంటి హ్యాట్రిక్ హిట్స్ తర్వాత బాలయ్య నటిస్తున్న సినిమా కావడంతో 'NBK 109'పై భారీ అంచనాలే ఉన్నాయి. ఫార్చూన్ ఫోర్ సినిమాస్ తో కలిసి సితార ఎంటర్టైన్మెంట్స్ నిర్మిస్తున్న ఈ యాక్షన్ ఫిల్మ్ లో బాబీ డియోల్ విలన్ గా నటిస్తున్నాడు.

మార్చి 8న మహాశివరాత్రి పర్వదినాన్ని పురస్కరించుకుని 'NBK109'(వర్కింగ్ టైటిల్) నుండి చిత్ర బృందం ఫస్ట్‌ గ్లింప్స్ ను విడుదల చేసింది. బాలకృష్ణ-బాబీ కాంబినేషన్ కారణంగా ఇప్పటికే ఏర్పడిన భారీ అంచనాలను.. ఈ గ్లింప్స్ మరో స్థాయికి తీసుకెళ్లేలా ఉంది. గ్లింప్స్ లో బాలయ్య కూల్‌గా కనిపిస్తూనే తనదైన శైలిలో రెచ్చిపోయాడు. ఓ వైపు అడవి దగ్దమవుతుంటే బాలయ్య కార్ లో వచ్చి.. కూల్ గా టూల్ బాక్స్‌ పట్టుకొని దిగుతాడు. ఆ టూల్ బాక్స్‌లో ఆయుధాలతో పాటు మాన్షన్ హౌస్ ఆల్కహాల్ బాటిల్‌ ఉండటం విశేషం. ఓ వైపు గూండాలు ఆయుధాలు పట్టుకొని తన వైపు పరుగెత్తుకుంటూ వస్తుంటే, ఆయన మాత్రం కూల్ గా ఆల్కహాల్ తాగడం ఆకట్టుకుంది. "ఏంట్రా వార్ డిక్లేర్ చేస్తున్నావా?" అని ప్రత్యర్థి గ్యాంగ్ లోని వ్యక్తి అడగగా.. "సింహం నక్కల మీదకు వస్తే వార్ అవ్వదురా లఫూట్.. ఇట్స్ కాల్డ్ హంటింగ్" అంటూ పవర్ ఫుల్ డైలాగ్ తో బాలకృష్ణ వేట మొదలుపెట్టడం గూస్ బంప్స్ తెప్పించేలా ఉంది. నందమూరి బాలకృష్ణ(NBK)ను దర్శకుడు బాబీ "నేచురల్ బోర్న్ కింగ్"గా చూపించడం ఫ్యాన్స్ కిక్ ఇచ్చేలా ఉంది.

ఎస్.థమన్ ఈ చిత్రానికి సంగీతం అందిస్తుండగా, 'జైలర్' ఫేమ్ విజయ్ కార్తీక్ సినిమాటోగ్రఫీ అందిస్తున్నాడు. ఎడిటర్ గా నిరంజన్, ప్రొడక్షన్ డిజైనర్ గా అవినాష్ కొల్లా వ్యవహరిస్తున్నారు.