కొంతకాలంగా నందమూరి బాలకృష్ణ (Nandamuri Balakrishna) సినిమాలకు వరుసగా తమన్ (Thaman) సంగీతం అందిస్తూ వస్తున్నాడు. బాలకృష్ణ గత నాలుగు చిత్రాలు 'అఖండ', 'వీరసింహారెడ్డి', 'భగవంత్ కేసరి', 'డాకు మహారాజ్'కు తమన్ సంగీతం అందించాడు. ఈ నాలుగు సినిమాలూ ఘన విజయం సాధించడమే కాకుండా, తమన్ సంగీతానికి ఎంతో పేరు వచ్చింది. బాలయ్య సినిమా అంటే తమన్ పూనకం వచ్చినట్టు సంగీతం అందిస్తాడనే అభిప్రాయం ప్రేక్షకుల్లో ఏర్పడింది. ఇక బాలకృష్ణ అభిమానులైతే నందమూరి తమన్ అని ప్రేమగా పిలుచుకుంటున్నారు. అలాంటి తమన్ ని ఒక సినిమా కోసం బాలకృష్ణ పక్కన పెడుతున్నారనే వార్త ఆసక్తికరంగా మారింది.

ప్రస్తుతం బోయపాటి శ్రీను దర్శకత్వంలో 'అఖండ-2' సినిమా చేస్తున్నాడు బాలకృష్ణ. ఈ సినిమాకి కూడా తమన్ సంగీతం అందిస్తున్నాడు. అయితే 'అఖండ-2' తర్వాత డైరెక్టర్ గోపీచంద్ మలినేనితో ఓ ప్రాజెక్ట్ చేయనున్నాడు. ఈ చిత్రానికి సంగీత దర్శకుడిగా తమన్ కి బదులుగా అనిరుధ్ (Anirudh)ని రంగంలోకి దింపే ప్రయత్నాలు జరుగుతున్నట్లు వార్తలొస్తున్నాయి. కానీ బాలకృష్ణ, తమన్ ని కాదని వేరే మ్యూజిక్ డైరెక్టర్ వైపు చూసే అవకాశాలు చాలా తక్కువే. దానికి తోడు అనిరుధ్ చేతిలో ఇప్పటికే దాదాపు డజను ప్రాజెక్ట్ లు ఉన్నాయి. మరికొన్ని లైన్ లో ఉన్నాయి. ఇంత బిజీ షెడ్యూల్ లో మరో కొత్త సినిమాని అనిరుధ్ అంగీకరించడం అనుమానమే. అయితే బాలయ్య-మలినేని ప్రాజెక్ట్ స్టార్ట్ కావడానికి కనీసం ఆరు నెలల సమయం పట్టే అవకాశముంది. ఈలోపు ఏదైనా మ్యాజిక్ జరిగి మ్యూజిక్ డైరెక్టర్ గా అనిరుధ్ వస్తే చెప్పలేము.

మామూలుగా అయితే తమన్ ని కాదని వేరే సంగీత దర్శకుడిని తీసుకోవడం నందమూరి అభిమానులకు నిరాశ కలిగించే విషయమే. కానీ అనిరుధ్ వస్తే మాత్రం వారు నిరాశ చెందే అవకాశం ఉండకపోవచ్చు. ఎందుకంటే అనిరుధ్ బ్యాక్ గ్రౌండ్ స్కోర్ కి ఎంతో క్రేజ్ ఉంది. స్టార్ హీరోల ఎలివేషన్ సీన్స్ కి అనిరుధ్ ఇచ్చే స్కోర్ ఓ రేంజ్ లో ఉంటుంది. అలాంటి అనిరుధ్, బాలయ్య లాంటి బడా మాస్ హీరోకి మ్యూజిక్ అందిస్తే అభిమానులకు ఖచ్చితంగా కిక్ ఇస్తుంది. మరి నిజంగా బాలయ్య-మలినేని ప్రాజెక్ట్ కోసం అనిరుధ్ రంగంలోకి దిగుతాడో లేదో చూడాలి.