శ్రీ లక్ష్మీనారాయణ, చర్ల

    హెచ్చరిక

    ఆసియాపై ఆధిపత్యం
    ఆశించి పెంచుకొని పైత్యం
    మంచిచెడ్డలు మరిచిపోయి
    వంచనకు దిగినావా భాయీ?

    పెక్కు వేల యేండ్లనుండి
    మిక్కుటమౌ ప్రేమతోడ
    ఒక్కటిగా మెలగిన మా
    ప్రక్కలోని పామైతివ!

    అందరి స్నేహంబుకోరి    
    అభ్యుదయ పథము ఏరి
    ముందున కడుగిడు మమ్ము
    ముంచగ నెంచుట నీచము!
    
    తరతరాల దాస్యముతో
    తరగని మా శౌర్యముతో
    నివురుగప్పి నిప్పుందని
    నిశ్చయముగ కాల్తుందని
    నీకు నిజాము తెలుస్తుంది
    నీవంటివారికి పాఠమౌతుంది!

    ప్రపంచమందు నీకు
    ప్రతిపత్తిని గోరిన మాకు
    వెన్నుపోటు పొడిచావు; నిను
    వెనకేసుకెళ్ళినందుకుగాను,
    దురాక్రమణ కాంక్షను మరగి
    భారతీయులను తిరిగి
    బానిసశృంఖలాల బంధించాలని
    ప్రయత్నం చేసే నీవు
    ప్రపంచంలో అవహేళన పొందుతావు
    వినాశకాలే విపరీత బుద్ధిః
    విజయం నీదని విశ్వసించకు కుబుద్ధి.
    ఫిరంగులంటే పెండ్లి బాజాలుగా
    మోర్టారులంటే హార్టుకు ప్రియంగా
    స్వేచ్చనుకోరి ఐచ్చికంగా
    ఆహ్వానించే అసమాన వీరులు
    శిక్షించే మా స్వేచ్చాభూమిని
    భక్షించాలని భ్రమపడకు మదిని
    నలుబదికోట్ల భారతీయులు
    ఇలలోగల స్వేచ్చాప్రియులు
    మా స్వేచ్చాజ్యోతికి రక్ష
    దాని జోలికి వస్తే తప్పదు నీకు శిక్ష!

                                                               *  *  *  *