Telugu Comedy Audio Serial

18 భాగం

 " అట్లాగా అని ఆప్టరాలన్నట్టు తీసిపారేస్తావే ? మా ఆంటీకి ఎంత పేరుందో తెలుసా ? పెద్ద పెద్ద పట్నాలన్నిట్లోనూ నాట్య ప్రదర్శనలిచ్చింది. నాగిని నాట్యం చేస్తే గీస్తే ఆంటీయే చేయాలి "

" నాగిని నాట్యమంటే ?"

" పాము డాన్సన్నమాట. ఆంటీ నాగిని నాట్యం చేస్తే, ఆ నాట్యానికి తప్పనిసరిగా పాము వస్తుంది "

" ఎందుకు ?"

" ఎందుకేమిటి ? అదంతా ఆంటీ నాట్య మహిమన్న మాట ?"

" అబ్బా...అయితే మీ ఆంటీ గొప్ప డాన్సరే ! అవునూ ఆమె ఎక్కడ ఆ డేన్సు చేసినా వస్తుందా పాము "

" వస్తుంది. బొంబాయిలో వచ్చింది.కలకత్తాలో వచ్చింది. మనదేశంలోనే కాదు లండన్, పారీస్, న్యూయార్క్ "

" అక్కడా కూడానా ?"

" ఎక్కడ చేసినా వస్తుందని చెప్పెనుగా "

" మీరు పాములేమైనా పెంచుతున్నారా "

" ఛీ పాడు..అదేం అట్లా అడిగావు "

" పెంపుడు పాములైతే ఎక్కడ చేసినా వస్తాయి గదా "

" అంటే ఏమిటి నీ ఉద్దేశం ? పెంపుడు పాములతో జనాన్ని మోసగిస్తున్నామనుకుంటూన్నావా ?" అని మూతి ముడుచుకుంది వసుంధర.

నోరు జారినందుకు బాధపడ్డాడు కిష్ణుడు.అప్పుడు చూసేడు. నడిరోద్దుమీద జనాలు ఆగిపోయి తననీ, వసుంధరని తమాషాగా చూస్తున్న ఘట్టాన్ని! వెంటనే మాట మార్చి వసుంధరతో అన్నాడు " మనమిట్లా మాట్లాడుకుంటుంటే వాళ్లకి చోద్యంలా ఉంది. సైకిలేక్కు ఇంటికి పోదాం " అని.

వసుంధర కూడా జనాన్ని చూసి సిగ్గుపడింది. వెంటనే సైకిల్ ఎక్కింది. ఇద్దరూ మెల్లిగా సైకిళ్ళూ తొక్కుకుంటూ వస్తున్నారు. దార్లో కిష్ణుడు ప్రారంభించేడు " వరూధినీ ప్రవరాఖ్య నృత్య నాటికంటే నాకెంతో ఇష్టం " అని.

" అట్లాగా ! మా ఆంటీకి ఆ నాటిక ఆరో ప్రాణం. ప్రతి ప్రోగ్రాంలో ఆ నాటికలో ఒక భాగం తప్పని సరిగా చేస్తుంది "

" ప్రవరాఖ్యుడిగా ఎవరు నటిస్తారు "

" ఒక్కరే అనే మాటేముంది ? ఎవరు దొరికితే వారే "

" మగవాళ్ళేనా "

" ఉహూ...ఆడవాళ్ళతోనే చేయిస్తుంది. ఆంటీ ట్రూపులో అందరూ ఆడవాళ్లే ?"

" అంటే ?ఇంతవరకు మీ ఆంటీ మగ ప్రవరాఖ్యుడిని పెట్టుకోలేదా "

" ఎప్పుడో కాలేజిలో చదివేటప్పుడు ఒకసారి మాత్రం మగ ప్రవరాఖ్యుడే చేశాడట ?

" ఎవరతను ?"

" నాకేం తెలుసు ? అయినా ఈ వివరాలన్నీ నీకు ఎందుకు ?"

" తోచక! అదిసరే నీక్కూడా డాన్స్ వచ్చా ?"

" మా ఆంటీ అంత పెద్ద డాన్సర్ అయితే నాకు ఆ మాత్రం డేన్స్ రాకుండా పోతుందా ?"

" నాకు నేర్పుతావా "

" నేర్చుకోవాలనుకుంటే మా ఆంటీ వుంది కదా "

" ఆవిడ వద్దు. నువ్వు నేర్పితేనే నేర్చుకుంటా " వసుంధర ఆమాటకి కిలకిలా నవ్వేసింది.

నవ్వి అన్నది " అట్లాగే " అని కిష్ణుడు ఆకస్మాత్తుగా ఆగిపోయాడు.

" ఆగిపోయావే ?" వసుంధర అడిగింది.

" ఇల్లు దగ్గర పడ్డాయిగ, ముందు నువ్వెళ్ళు. తర్వాత నే వస్తా "

" మా ఇంటికి రావూ ? మా ఆంటీని పరిచయం చేస్తాను "

" అమ్మో "

" అమ్మో ఏమిటి ?"

" అదంతేలే ! ఆడవాళ్ళతో మాట్లాడితే మా అన్నయ్య వూరుకోడు "

" అదేం పాపం "

" అదో రకమైన పాపం ! అదంతా తర్వాత చెబుతాను గానీ నువ్వెళ్ళిపొ ! రేపు సరిగ్గా తొమ్మిది గంటలకు కాలేజీకి కలిసే వెళదాం "

" ఓకే ! చర్చిలో తొమ్మిది గంటలు వినిపించగానే నీ సైకిల్ నా సైకిల్ రోడ్డు మీద వుండాలి "

" సైకిళ్ళతో పాటు మనం కూడా వుండాలి. బై బై " అన్నాడు కిష్ణుడు.

వసుంధర చెయ్యూపి వెళ్ళిపోయింది.