ఆమధ్య ఓ సినిమాని పిల్లలతో కలిసి చూడొద్దని గట్టిగా చెప్పారు. అంటే ఆ సినిమాలో అంత హింస ఉందనేది వారి ఉద్దేశం. ఈ విషయాన్ని ఎవరో కాదు, హీరోనే చెప్పడం విశేషం. ఇంతకీ ఏ సినిమా అది, ఆ హీరో ఎవరు? ఆ సినిమా పేరు తమిళ్‌లో ఇరైవన్‌, తెలుగులో గాడ్‌, ఆ చెప్పిన హీరో జయం రవి. ఇటీవల గాడ్‌ చిత్రం విడుదలైంది. తెలుగులో ఆశించిన స్థాయిలో ఈ సినిమా ఆకట్టుకోలేదు. అయితే తమిళ ప్రేక్షకులు మాత్రం ఈ సినిమాని పాస్‌ చేసేశారట. జయం రవి తన అద్భుతమైన పర్ఫార్మెన్స్‌, నయనతార అందం, అభినయం తమిళ్‌ ప్రేక్షకులను కట్టిపడేసింది. టెక్నికల్‌గా కూడా ఈ సినిమా హై స్టాండర్డ్స్‌లోనే ఉండడంతో సినిమా మంచి విజయం సాధించింది. దర్శకుడు ఐ.అహ్మద్‌కు డైరెక్టర్‌గా మంచిపేరు వచ్చింది. 

సినిమాలో జయం రవి, ఆండ్రూ ఏసీపీలు. చాలా ధైర్యంగా కేసులు చేధిస్తూ డిపార్ట్‌మెంట్‌లో మంచి పేరు సంపాదించుకుంటారు. నేరస్థులను పట్టుకోవడం, వారిని విచారించడం, ఆ తర్వాత కోర్టులో హాజరు పరచడం, వారికి శిక్ష పడేలా చేయడం అనేది పెద్ద తతంగమని, టైమ్‌ వేస్ట్‌ అనేది వీరిద్దరి అభిప్రాయం. అందుకే నేరస్థులను ఎన్‌కౌంటర్‌ చేస్తుంటారు. ఒకరి తప్పులను మరొకరు కప్పిపుచ్చుతూ ఉంటారు. అలాంటి వీరిద్దరికి సైకో కిల్లర్‌ కేసు అప్పగిస్తారు ఉన్నతాధికారులు. అక్కడి నుంచి సినిమా అసలు కథలోకి ఎంటర్‌ అవుతుంది. నగరంలో 10 మంది అమ్మాయిలను దారుణంగా హత్యలు చేసే సీరియల్‌ సైకో కిల్లర్‌ కేసును వారిద్దరూ ఛేదిస్తారు. అయితే ఈ క్రమంలో ఆండ్రూ ప్రాణాలు కోల్పోతాడు. కథ ఆసక్తికరంగానే ఉన్నప్పటికీ హింస పాళ్ళు అధికం కావడంతో హీరో జయం రవి సినిమా చూసిన వాళ్ళు ఏమంటారోనని భయపడినట్టున్నాడు. అందుకే పిల్లలతో కలిసి ఈ సినిమా చూడొద్దని ప్రచారం చేశాడు. ఇప్పుడు ఈ సినిమా ఓటీటీలో ప్రత్యక్షం కాబోతోంది. నెట్‌ఫ్లిక్స్‌ సంస్థ ఈ సినిమా డిజిటల్‌ రైట్స్‌ను సొంతం చేసుకుంది. తెలుగు, తమిళ్‌, హిందీ, కన్నడ, మలయాళ భాషల్లో 

ఈ సినిమా స్ట్రీమింగ్‌ అవ్వనుంది. మరి ఇప్పటివరకు థియేటర్స్‌లో కాబట్టి ఈ సినిమాను పిల్లలకు దూరంగా ఉంచగలిగారు. మరిప్పుడు ఇంటికే వచ్చేసింది. ఇప్పుడు ఈ సినిమాను చూడకుండా పిల్లల్ని ఎలా కంట్రోల్‌ చేస్తారో మరి!