సినిమా తారలంటే జనంలో ఎంత క్రేజ్‌ ఉంటుందో అందరికీ తెలిసిందే. వారిని సినిమాల్లో చూసి ఎంతో ఇన్‌స్పైర్‌ అయ్యే అభిమానులు తమకు నచ్చిన నటుడు ఎదురుగా కనిపిస్తే వారి ప్రవర్తన ఎలా ఉంటుంది? వారితో మాట్లాడాలని, సెల్ఫీలు దిగాలని తెగ ముచ్చటపడిపోతూ ఉంటారు. అయితే కొందరు అభిమానులు మాత్రం ఈ విషయంలో హద్దు మీరి ప్రవర్తిస్తుంటారు. హీరోల విషయం ఎలా ఉన్నా, హీరోయిన్ల విషయంలో ఇది చాలా దారుణంగా ఉంటుంది. అందుకే పబ్లిక్‌లోకి రావాలంటే హీరోయిన్లు భయపడుతుంటారు. జనంలోకి వచ్చిన హీరోయిన్లతో అభిమానులు అసభ్యంగా ప్రవర్తించిన సందర్భాలు చాలా ఉన్నాయి. ఇక హీరోల విషయానికి వస్తే కొంతమంది అభిమానుల తాకిడి తట్టుకోలేక చేయి చేసుకున్న సందర్భాలూ ఉన్నాయి. తాజాగా అటువంటి ఘటనే బాలీవుడ్‌ నటుడు నానా పటేకర్‌ విషయంలో జరిగింది. 

ఎన్నో అవార్డులు, రివార్డులు సాధించిన నానా పటేకర్‌ కొంత విరామం తర్వాత మళ్ళీ నటుడిగా కొనసాగుతున్నాడు. ఇటీవల ఉత్తర ప్రదేశ్‌లోని వారణాసిలో జరుగుతున్న తన తదుపరి సినిమా షూటింగ్‌ కోసం హాజరయ్యాడు నానా. షూటింగ్‌ జరుగుతున్న విషయం తెలుసుకున్న చుట్టుపక్కల ఊళ్ళవాళ్ళు వేలాదిగా అక్కడికి చేరుకున్నారు. ఓ అభిమాని అతని దగ్గరకు వెళ్లి సెల్ఫీ దిగేందుకు ప్రయత్నించగా, అతని తలపై ఒక్కటి పీకాడు నానా. వెంటనే అతని సిబ్బంది ఆ అభిమానిని అక్కడి నుంచి పక్కకు తీసుకెళ్లిపోయారు. ఈ వీడియో ఇప్పుడు సోషల్‌ మీడియాలో వైరల్‌గా మారింది. ఈ విషయంలో అందరూ నానా పటేకర్‌పై విమర్శలు గుప్పిస్తున్నారు. ఎంతో అభిమానంగా దగ్గరికి వచ్చిన వ్యక్తి అలా కొట్టడం చాలా తప్పు అంటున్నారు. వివాదాలు నానా పటేకర్‌కి కొత్తేమీ కాదని మరికొందరు కామెంట్‌ చేస్తున్నారు.