ఈ జనరేషన్ టాలీవుడ్ స్టార్స్ లో ఇప్పటిదాకా ఇద్దరు హీరోలు బాలీవుడ్ సినిమాలు చేయగా.. ఇద్దరూ పరాజయాలు చూశారు. 2013 లో రామ్ చరణ్ 'జంజీర్' సినిమాతో బాలీవుడ్ ఎంట్రీ ఇవ్వగా.. అది డిజాస్టర్ అయింది. ఇక 2023 లో 'ఆదిపురుష్'తో ప్రభాస్ ప్రేక్షకులను పలకరించగా.. అది కూడా నిరాశపరిచింది. ముఖ్యంగా ప్రభాస్ లుక్స్, వీఎఫ్ఎక్స్ పై ట్రోల్స్ వచ్చాయి. మన హీరోలను ఆడియన్స్ మెచ్చేలా ప్రజెంట్ చేయడంలో బాలీవుడ్ డైరెక్టర్స్ ఫెయిల్ అవుతున్నారని, అందుకే మన హీరోలు డైరెక్ట్ హిందీ సినిమాలు చేయకపోవడం బెటర్ అని తెలుగు సినీ అభిమానులు అభిప్రాయపడ్డారు. అయినప్పటికీ జూనియర్ ఎన్టీఆర్ బాలీవుడ్ లో తన అదృష్టాన్ని పరీక్షించుకోవడానికి సిద్ధమయ్యాడు. (War 2)

'ఆర్ఆర్ఆర్'తో పాన్ ఇండియా స్టార్ గా అవతరించిన ఎన్టీఆర్.. 'వార్-2'తో బాలీవుడ్ ఎంట్రీ ఇస్తున్నట్లు వార్తలు వచ్చినప్పుడు అభిమానులు కూడా ఆశ్చర్యపోయారు. ఎందుకంటే, అది సోలో ఫిల్మ్ కూడా కాదు. హృతిక్ రోషన్ తో కలిసి నటిస్తున్నాడు. సోలో ఫిల్మ్ చేస్తేనే మన హీరోలను సరిగా చూపించట్లేదు. ఇక హృతిక్ ఉంటే మన హీరోని సరిగా చూపిస్తారా అనే అనుమానాలు వ్యక్తమయ్యాయి. అయితే ప్రచార చిత్రాల్లో మాత్రం ఇద్దరినీ ఢీ అంటే ఢీ అన్నట్టుగా చూపించారు. ఎన్టీఆర్ లుక్ కూడా బాగుంది. ఇక సినిమా ఎలా ఉంది? అందులో ఎన్టీఆర్ పాత్ర ఎలా ఉంటుంది? అనేది తెలియాల్సి ఉంది.

'వార్-2' మూవీ ఆగస్టు 14న ప్రేక్షకుల ముందుకు రానుంది. ఈ సినిమాకి, ఇందులో ఎన్టీఆర్ రోల్ కి మంచి రెస్పాన్స్ వస్తే.. బాలీవుడ్ సినిమాలు చేయడానికి మిగతా టాలీవుడ్ స్టార్స్ కూడా ఆసక్తి చూపే అవకాశముంది. అలా కాకుండా 'జంజీర్', 'ఆదిపురుష్' బాటలో 'వార్-2' కూడా షాకిస్తే మాత్రం.. డైరెక్ట్ హిందీ సినిమా అంటేనే తెలుగు హీరోలు భయపడే పరిస్థితి వస్తుంది. మొత్తానికి 'వార్-2' రిజల్ట్ ని బట్టి పలువురు తెలుగు హీరోలు బాలీవుడ్ ఎంట్రీపై నిర్ణయం తీసుకునే అవకాశముంది.