సినిమా ప్రపంచంలో ఎన్నో విభిన్నమైన మర్డర్ మిస్టరీ కథలు చూసుంటాం. కానీ, ఎప్పుడైనా ఒక హత్య కేసును మనుషులు కాకుండా గొర్రెల మంద దర్యాప్తు చేయడం చూశారా? వినడానికే చాలా వింతగా, ఆసక్తికరంగా ఉంది కదూ! సరిగ్గా ఇదే వినూత్నమైన కాన్సెప్ట్‌తో హాలీవుడ్ బాక్సాఫీస్ వద్ద భారీ విజయాన్ని అందుకుని, విమర్శకుల ప్రశంసలు పొందిన చిత్రం 'ది షీప్ డిటెక్టివ్స్' (The Sheep Detectives). ప్రముఖ రచయిత్రి లియోనీ స్వాన్ రాసిన 'త్రీ బ్యాగ్స్ ఫుల్' అనే నవల ఆధారంగా, ప్రముఖ దర్శకుడు కైల్ బాల్డా  అద్భుతమైన లైవ్ యాక్షన్ యానిమేషన్ టెక్నాలజీతో తెరకెక్కించారు. థియేటర్లలో విడుదలైనప్పుడు సంచలనం సృష్టించిన ఈ కామెడీ ఇన్వెస్టిగేషన్ థ్రిల్లర్, ఇప్పుడు ప్రముఖ ఓటీటీ ప్లాట్‌ఫామ్ అమెజాన్ ప్రైమ్ వీడియోలో తెలుగు ఆడియోతో స్ట్రీమింగ్ అవుతోంది.

కథ విషయానికి వస్తే, డెన్‌బ్రూక్ అనే ఒక ప్రశాంతమైన గ్రామంలో జార్జ్ హార్డీ (హ్యూ జాక్‌మన్) అనే గొర్రెల కాపరి ఒంటరిగా జీవిస్తూ ఉంటాడు. అతనికి తను పెంచుకునే గొర్రెలంటే ప్రాణం. ప్రతిరోజూ రాత్రి పూట ఆ గొర్రెలన్నింటికీ అగాథా క్రిస్టీ రాసిన క్రైమ్ నవలలు, రకరకాల సస్పెన్స్ డిటెక్టివ్ స్టోరీలను చదివి వినిపించడం జార్జ్ అలవాటు. అయితే, ఆ గొర్రెలకు చాలా తెలివితేటలు ఉన్నాయని, తను చదివే ప్రతి ముక్కా వాటికి స్పష్టంగా అర్థమవుతోందని ఆ కాపరికి అస్సలు తెలియదు. అలా రోజురోజుకూ క్రైమ్ కథలు వింటూ, ఆ గొర్రెలన్నీ షెర్లాక్ హోమ్స్ తరహాలో పెద్ద డిటెక్టివ్ మైండ్స్‌లా మారిపోతాయి. కానీ ఒకరోజు హఠాత్తుగా జార్జ్ తన పొలంలోనే అనుమానాస్పద స్థితిలో చనిపోయి కనిపిస్తాడు. స్థానిక పోలీసులు వచ్చి ఇదొక సాధారణ ప్రమాదం అని కేసును క్లోజ్ చేయాలని చూస్తారు.

కానీ, తమ ప్రియమైన యజమాని జార్జ్‌ను ఎవరో పక్కా ప్లాన్‌తోనే హత్య చేశారని ఆ తెలివైన గొర్రెలకు అర్థమవుతుంది. జార్జ్‌కు ఎలాగైనా న్యాయం చేయాలని, హంతకుడిని పట్టుకోవాలని ఆ గొర్రెలన్నీ ఒక డిటెక్టివ్ టీమ్‌గా ఏర్పడతాయి. తాము విన్న క్రైమ్ నవలల నాలెడ్జ్ మొత్తాన్ని ఉపయోగించి, మానవ ప్రపంచంలోకి అడుగుపెట్టి రహస్యంగా కేసు ఇన్వెస్టిగేషన్ మొదలుపెడతాయి. జార్జ్ రాసిన వీలునామా ద్వారా అతని కూతురు రెబెక్కాతో పాటు చర్చి ఫాదర్, హోటల్ యజమాని బెత్ పెన్నాక్ ఇలా 5 నుండి 6 గురు అనుమానితుల లిస్ట్ బయటకు వస్తుంది. ఈ క్రమంలో ఆ గొర్రెలు ఎదుర్కొన్న సవాళ్లు ఏంటి, అసలు హంతకుడు ఎవరు అనేదే మిగిలిన కథ.

Also read: sree vishnu: బై వన్ గెట్ వన్ ఆఫర్ ప్రకటించిన శ్రీవిష్ణు.. ఫ్యాన్స్ కి ఇక పండగే  

ఈ 109 నిమిషాల నిడివి గల సినిమాలో గొర్రెల క్యారెక్టరైజేషన్లు, వాటికి ఇచ్చిన వాయిస్ ఓవర్లు అద్భుతంగా కుదిరాయి. ప్రతి విషయాన్ని గుర్తుపెట్టుకునే మోపుల్, చాలా తెలివైన లిల్లీ, లీడర్‌షిప్ క్వాలిటీస్ ఉన్న సెబాస్టియన్ వంటి పాత్రలు ప్రేక్షకులను ఎంతగానో నవ్విస్తాయి. హాలీవుడ్ స్టార్ నటుడు హ్యూ జాక్‌మన్ జార్జ్ పాత్రలో ఒదిగిపోగా, ఎమ్మా థాంప్సన్ తన నటనతో మెప్పించారు. సినిమా ఫస్టాఫ్ అంతా పొట్టచెక్కలయ్యే కామెడీతో సాగిపోతే, సెకండాఫ్ మాత్రం ఎమోషనల్ ఎలిమెంట్స్‌తో కంటితడి పెట్టిస్తుంది. కేవలం చిన్న పిల్లలకే కాకుండా అన్ని వర్గాల పెద్దలకు కూడా నచ్చేలా ఈ సినిమాను మలిచారు. టైమ్స్ ఆఫ్ ఇండియా 4/5 రేటింగ్ ఇవ్వగా, ఇండియా టుడే మరియు ఇండియన్ ఎక్స్‌ప్రెస్ పత్రికలు ఈ చిత్రానికి 3.5/5 రేటింగ్‌లు ఇచ్చి ప్రశంసించాయి. వీకెండ్‌లో కుటుంబంతో కలిసి ఒక మంచి వినోదభరితమైన మిస్టరీ సినిమా చూడాలనుకుంటే, అమెజాన్ ప్రైమ్‌లో ఉన్న 'ది షీప్ డిటెక్టివ్స్' ఒక బెస్ట్ ఛాయిస్.