హైదరాబాద్ లో సినీ నటి సోహాని కుమారి కాబోయే భర్త సవాయ్ సింగ్‌ ఆత్మహత్య చేసుకున్నాడు. రాజస్థాన్ కి చెందిన సోహాని కుమారికి ఇన్‌స్టాగ్రామ్ ద్వారా సవాయ్ పరిచయమయ్యాడు. ఆ పరిచయం స్నేహంగా, తర్వాత ప్రేమగా మారింది. జూలైలో వీరి ఎంగేజ్ మెంట్ కూడా జరిగింది. కొద్ది రోజులుగా జూబ్లీహిల్స్‌లో ఇరువురు కలిసి ఉంటున్నారు. అయితే తాజాగా తాము నివాసముంటున్న ఫ్లాట్‌లోనే ఫ్యాన్‌కు ఉరివేసుకుని ప్రాణాలు తీసుకున్నాడు సవాయ్. బయటకు వెళ్ళిన సోహానీ.. ఇంటికి తిరిగి వచ్చేసరికి సవాయ్ ఫ్యాన్‌కు ఉరివేసుకుని కనిపించాడు. దీంతో ఆమె వెంటనే పోలీసులకు సమాచారం ఇచ్చింది. ఘటనా స్థలాన్ని పరిశీలించిన పోలీసులు.. మృతదేహాన్ని పోస్టుమార్టం నిమిత్తం ఆస్పత్రికి తరలించారు.

ఆత్మహత్య చేసుకోవడానికి ముందు సవాయ్ సింగ్‌.. ఒక సెల్ఫీ వీడియోను రికార్డు చేశాడు. గతంలో చేసిన తప్పుల వల్ల ఇబ్బందులు పడుతున్నట్లు ఆ వీడియోలో చెప్పుకొచ్చాడు. మరోవైపు పోలీసుల ప్రాథమిక విచారణలో.. సవాయ్ సింగ్‌ మాజీ ప్రేయసిని మరిచిపోలేకపోతున్నాడని, ఆర్థిక ఇబ్బందులు కూడా ఉన్నాయని.. అందుకే సూసైడ్ చేసుకొని ఉంటాడని సోహాని కుమారి చెప్పినట్లు సమాచారం.

కాగా, సోహాని కుమారి టాలీవుడ్, బాలీవుడ్ లో సినిమాలు చేస్తోంది. ఇప్పుడిప్పుడే సినీ రంగంలో ఎదుగుతున్న ఆమె.. కాబోయే భర్త సూసైడ్ తో ఒక్కసారిగా వార్తల్లో నిలిచింది.