'నేనింతే' సినిమాలో ఒక సీన్ ఉంటుంది. రవితేజ కష్టపడి డైరెక్ట్ చేసిన సినిమాకి సుప్రీత్ తన పేరు వేసుకుంటాడు. నిజ జీవితంలోనూ ఓ దర్శకుడికి అలాంటి అనుభవమే ఎదురైంది. ఆ దర్శకుడు ఎవరో కాదు వి. సముద్ర.

రాజశేఖర్ హీరోగా నటించిన 'సింహరాశి'తో దర్శకుడిగా పరిచయమైన సముద్ర.. మొదటి సినిమాతోనే ఘన విజయాన్ని అందుకున్నారు. ఆ తర్వాత వీరి కలయికలో 'ఎవడైతే నాకేంటి' సినిమా రాగా.. అది కూడా విజయం సాధించింది. అయితే 'ఎవడైతే నాకేంటి' సమయంలో రాజశేఖర్, ఆయన సతీమణి జీవిత తనను ఇబ్బంది పెట్టారని తాజాగా తెలుగువన్ కి ఇచ్చిన ఇంటర్వ్యూలో సముద్ర తెలిపారు.

'ఎవడైతే నాకేంటి' సినిమా దర్శకులుగా సముద్రతో పాటు జీవిత పేరు కూడా కనిపిస్తుంది. కానీ, ఆ సినిమా మొత్తం సముద్రనే తెరకెక్కించారట. ఆ సినిమా సమయంలో జరిగిన సంఘటనల గురించి ఇంటర్వ్యూలో మొత్తం ఓపెన్ అయ్యారు సముద్ర.

"సింహరాశి సినిమా 2001లో వస్తే.. ఎవడైతే నాకేంటి 2007లో వచ్చింది. ఈమధ్యలో రాజశేఖర్ గారు నా దగ్గరకు కొన్ని కథలు పంపించారు. ఆ కథలు నచ్చక నేను దర్శకత్వం చేయనని చెప్పా. రాజశేఖర్ గారంటే నాకు గౌరవం. ఆయనతో మంచి సినిమా చేయాలనే ఉద్దేశంతో ఆ కథలు నచ్చలేదని నిజాయితీగా చెప్పా. కానీ, రాజశేఖర్ గారు మాత్రం నేను పంపిన కథలే సముద్ర రిజెక్ట్ చేస్తాడా అని ఇగోకి పోయారు. నిజానికి నేను కథ నచ్చలేదని రిజెక్ట్ చేసిన ఐదు సినిమాలూ రాజశేఖర్ గారు చేశారు.. కానీ, అవి ఆడలేదు. 

ఆ తర్వాత తాను డైరెక్ట్ గా చెప్పకుండా, పరుచూరి గారితో కబురు పంపారు రాజశేఖర్. మలయాళం చిత్రం లయన్ కథ పరుచూరి గారితో చెప్పించారు. అది నాకు బాగా నచ్చి, సినిమా చేస్తానని చెప్పాను. అయితే ఒక కండిషన్ పెట్టాను. కథలో 60 శాతం మార్పులకు ఒప్పుకుంటేనే చేస్తానని చెప్పాను. సముద్ర సినిమా చేస్తానన్నాడు కదా.. అది చాలు అని రాజశేఖర్ వెంటనే ఓకే అన్నారు.

నేను కోరుకున్నట్టుగా లయన్ కథలో మార్పులు చేసి, ఎవడైతే నాకేంటి కథ రెడీ చేశాం. కథ అద్భుతంగా వచ్చింది. షూటింగ్ స్టార్ చేశాం. సినిమా కూడా బాగా వస్తోంది. దీంతో రాజశేఖర్, జీవిత.. దర్శకుడిగా నా పేరు తొలగించి.. వారి పేర్లు వేసుకుందాం అనుకున్నారు. ఈ విషయం నాకు ఒక రచయిత ద్వారా తెలిసింది. 

షూటింగ్ మధ్యలో 'ఈ సీన్ బాలేదు, ఆ సీన్ బాలేదు' అంటూ రాజశేఖర్ సెట్ లో ఓవరాక్షన్ చేసేవారు. జీవిత ఆయన్ని కూల్ చేస్తున్నట్లు నటించేవారు. 'పేరు వేసుకోవడం కోసం ఇలా నన్ను ఇబ్బంది పెట్టడం ఎందుకు.. మీరే సినిమా తీసుకొని, మీ పేరే వేసుకోండి' అని బయటకు వచ్చేశాను. ఆ తర్వాత సినీ పెద్దలు కలుగజేసుకోవడంతో.. మళ్ళీ నన్ను డైరెక్ట్ చేయమని రిక్వెస్ట్ చేశారు. దీంతో సినిమా నేనే కంప్లీట్ చేశాను. కానీ చివరిలో మళ్ళీ నన్ను డిస్టర్బ్ చేసే ప్రయత్నం చేశారు. నాతో పాటు వాళ్ళ పేరు కూడా వేసుకున్నారు. ఆ సినిమాకి రెమ్యూనరేషన్ కూడా నాకు సగమే వచ్చింది.

రాజశేఖర్ గారు, జీవిత గారు మనుషులు మంచోళ్ళే. కానీ దర్శకులుగా హిట్లు లేవు. అందుకే ఎవడైతే నాకేంటి సినిమా బాగా వస్తుండటంతో.. హిట్ అవుతుందన్న నమ్మకంతో వారి పేరు వేసుకోవడానికి ప్రయత్నించారు. దేవుడు ఏదిస్తే అది తీసుకోవాలి. నేను హీరో అంటే జనాలు యాక్సెప్ట్ చేయరు కదా. అలాగే వాళ్ళు యాక్టర్స్ గా గొప్పోళ్ళు. ఒకవేళ డైరెక్టర్ కావాలనుకుంటే.. వాళ్లే సినిమా స్టార్ట్ చేసి ఫినిష్ చేయాలి. అంతేకానీ వేరేవాళ్ళ సినిమాకి పేరు వేసుకోవడం కరెక్ట్ కాదు. 

ఇంత జరిగినా నేను మనసులో ఏం పెట్టుకోను. రాజశేఖర్ గారిని ఒక సోదరుడిగానే భావించి, ఇప్పటికీ మాట్లాడుతూనే ఉంటాను. మొదటి అవకాశం ఇచ్చిన వ్యక్తిగా ఆయనంటే నాకు ఎప్పటికీ గౌరవం ఉంటుంది." అని సముద్ర చెప్పుకొచ్చారు.