నేచురల్ స్టార్ నాని లైనప్ ఎప్పుడూ ఆసక్తికరంగానే ఉంటుంది. ప్రస్తుతం ఆయన చేతిలో పలు ఆసక్తికర ప్రాజెక్ట్ లు ఉన్నాయి. అయితే అందులో ఒక క్రేజీ ప్రాజెక్ట్ ని నాని హోల్డ్ లో పెట్టినట్లు తెలుస్తోంది.

'దసరా', 'హాయ్ నాన్న' చిత్రాలతో బ్యాక్ టు బ్యాక్ హిట్స్ అందుకున్న నాని.. ప్రస్తుతం వివేక్ ఆత్రేయ దర్శకత్వంలో 'సరిపోదా శనివారం' సినిమా చేస్తున్నాడు. దీని తర్వాత సుజీత్ డైరెక్షన్ లో ఒక మూవీ చేయనున్నాడు. అనంతరం 'బలగం' దర్శకుడు వేణు, 'దసరా' దర్శకుడు శ్రీకాంత్ ఓదెల ప్రాజెక్ట్ లు లైన్ లో ఉన్నాయని టాక్. అలాగే వీటితో పాటు 'హిట్-3' కూడా చేయాల్సి ఉంది. కానీ ఇప్పట్లో ఆ ప్రాజెక్ట్ పట్టాలెక్కే పరిస్థితి కనిపించడం లేదు.

నానికి చెందిన నిర్మాణ సంస్థ వాల్ పోస్టర్ సినిమా బ్యానర్ లో రూపొందే 'హిట్' ప్రాంఛైజ్ చిత్రాలకు మంచి క్రేజ్ ఉంది. ఈ ప్రాంఛైజ్ లో ఇప్పటిదాకా రెండు సినిమాలు రాగా, రెండూ మంచి విజయాలు సాధించాయి. మొదటి భాగంలో విశ్వక్ సేన్, రెండో భాగంలో అడివి శేష్ నటించారు. మూడో భాగంలో నాని నటించనున్నాడు. ఇప్పటికే హిట్-2 చివరిలో నాని పాత్ర పరిచయమై ప్రేక్షకులను మెప్పించింది. దీంతో హిట్-3 కోసం అభిమానులు ఎంతగానో ఎదురుచూస్తున్నారు. కానీ ఇది ఇప్పట్లో వచ్చే అవకాశంలేదు. ఎందుకంటే 'సరిపోదా శనివారం'తో పాటు సుజీత్, వేణు, శ్రీకాంత్ ప్రాజెక్ట్ లు పూర్తి కావాలంటే చాలా సమయం పడుతుంది. వీటితో పాటు మరికొన్ని ప్రాజెక్ట్ లు కూడా చర్చల దశలో ఉన్నాయట. అందుకే నాని ప్రస్తుతం 'హిట్-3'ని హోల్డ్ లో పెట్టే ఆలోచనలో ఉన్నాడట.

దర్శకుడు శైలేశ్ కొల‌ను సైతం వేరే హీరోలను పట్టే పనిలో పడిపోయాడట. 'హిట్-2' తర్వాత వెంకటేష్ తో 'సైంధవ్' సినిమా చేశాడు శైలేశ్. ఈ మూవీ ప్రమోషన్స్ టైంలో నిర్మాతలు దిల్ రాజు, నాగవంశీ బ్యానర్స్ లో కమిట్ మెంట్స్ ఉన్నాయని శైలేష్ తెలిపాడు. ఆ కమిట్ మెంట్స్ తర్వాత.. నాని ఓకే అన్న దానిని బట్టి 'హిట్-3' ఉండే అవకాశముందని సమాచారం.