సూపర్ స్టార్ రజినీకాంత్(Super Star Rajinikanth) కీలక పాత్రలో విష్ణు విశాల్, విక్రాంత్ ప్రధాన పాత్రధారులుగా నటించిన చిత్రం ‘లాల్ సలామ్’(Lal Salaam). ప్రముఖ నిర్మాణ సంస్థ లైకా ప్రొడక్షన్స్ బ్యానర్‌ ఈ చిత్రాన్ని నిర్మిస్తోంది. ప్రపంచ వ్యాప్తంగా ఈ సినిమాను ఫిబ్రవరి 9న తెలుగు, తమిళ, హిందీ, కన్నడ, మలయాళ భాషల్లో గ్రాండ్ రిలీజ్ చేయబోతున్నారు. విడుదల తేదీని ప్రకటిస్తూ చిత్ర నిర్మాణ సంస్థ లైకా ప్రొడక్షన్స్ పోస్టర్‌ను విడుదల చేసింది. 

‘జైలర్’ వంటి బ్లాక్ బస్టర్ తర్వాత రజినీకాంత్ నటిస్తోన్న సినిమా కావటంతో ‘లాల్ సలామ్’పై మంచి బజ్ క్రియేట్ అయ్యింది. అదీ కాకుండా ఆయన 'బాషా' చిత్రం తర్వాత ముంబై బ్యాక్ డ్రాప్‌లో చేసిన సినిమా ఇది. 

ఇందులో ఆయన  మెయినుద్దీన్ అనే పవర్‌ఫుల్ పాత్రలో కనిపించబోతున్నారు. మంచి క్రికెట‌ర్స్‌, ఫ్రెండ్స్ అయిన హిందూ, ముస్లిం యువ‌కులు వారెంతగానో ప్రేమించే క్రికెట్ ఆట‌ను మ‌తం పేరుతో గొడ‌వ‌లు ప‌డుతూ ఉంటే ఆ గొడ‌వ‌ల‌ను మొయిద్దీన్ భాయ్ ఎలా స‌ర్దుబాటు చేశారు. ప్ర‌జ‌ల మ‌ధ్య ఎలాంటి స‌ఖ్య‌త‌ను కుదిర్చార‌నేది ‘లాల్ స‌లామ్‌’ సినిమా ప్రధాన కథాంశంగా రూపొందింది. 
 
ర‌జినీకాంత్ కీల‌క పాత్ర‌లో న‌టిస్తోన్న ఈ చిత్రంలో విష్ణు విశాల్‌, విక్రాంత్‌, జీవితా రాజశేఖర్, క్రికెట్ లెంజెండ్ క‌పిల్ దేవ్ త‌దిత‌రులు న‌టించారు. విష్ణు రంగస్వామి సినిమాటోగ్రఫీీ అందిస్తోన్న ఈ చిత్రానికి ఆస్కార్ విన్నర్ ఎ.ఆర్.రెహమాన్ సంగీతాన్ని అందిస్తున్నారు. 

అయితే ఫిబ్రవరి 9న 'లాల్ సలామ్' విడుదల కానుండటం ఓ రకంగా మాస్ మహారాజా రవితేజ(Raviteja)కి షాక్ అనే చెప్పాలి. సంక్రాంతికి విడుదల కావాల్సిన 'ఈగల్'(Eagle).. ఆ సమయంలో ఎక్కువ సినిమాల విడుదల ఉండటంతో.. థియేటర్ల సమస్య రాకూడదన్న ఉద్దేశంతో వాయిదాకి అంగీకరించింది. దీంతో 'ఈగల్' టీంకి మిగతా నిర్మాతలు సోలో రిలీజ్ హామీ ఇచ్చారు. అందుకు తగ్గట్టుగానే ఫిబ్రవరి 9న విడుదల కావాల్సిన 'టిల్లు స్క్వేర్'ను వాయిదా వేసి, ఆ డేట్ ని 'ఈగల్'కి కేటాయించారు. అయితే అదే తేదీపై 'ఊరు పేరు భైరవకోన' కర్చీఫ్ వేసింది. దానికితోడు ఇప్పుడు సూపర్ స్టార్ నటిస్తున్న 'లాల్ సలామ్' రంగంలోకి దిగుతోంది. దీంతో 'ఈగల్'కి సోలో రిలీజ్ అవకాశం లేకుండా పోతోంది.