కరోనా ఎఫెక్ట్ తో ప్రస్తుతం ఓటీటీ ట్రెండ్ నడుస్తోంది. ఓటీటీ వేదికలు పోటాపోటీగా సిరీస్ లు, సినిమాలు రిలీజ్ చేస్తూ సందడి చేస్తున్నాయి. ఓటీటీ వేదిక‌ల డిమాండ్ విప‌రీతంగా పెరిగిపోవడంతో.. ఓటీటీలో విచ్చలవిడిగా ప్రోగ్రామ్స్ నిర్వర్తిస్తున్నారు. ఈ పరిణామాల నేపథ్యంలో కేరళ ప్రభుత్వం సరికొత్త ఆలోచనలతో ప్రజల ముందుకు వస్తోంది. సొంతంగా ఓటీటీ ప్లాట్​ఫామ్​ను తీసుకొచ్చేందుకు ప్రభుత్వం సిద్ధమవుతోంది.

ఇప్పటివరకు ప్రైవేట్​ సంస్థలు మాత్రమే నిర్వహిస్తున్న ఓటీటీ తరహా మాధ్యమాన్ని కేరళ ప్రభుత్వమే త్వరలో అందుబాటులోకి తీసుకురానుంది. ఈ విషయాన్ని ఆ రాష్ట్ర సాంస్కృతిక శాఖ మంత్రి సాజీ చెరియన్ ఓ టీవీ ఛానల్​లో వెల్లడించారు. అలాగే టీవీ ప్రోగ్రామ్స్, సీరియళ్లను సెన్సార్​ పరిధిలోకి తీసుకురానున్నామని తెలిపారు.

కరోనా ప్రభావంతో మలయాళ చిత్రపరిశ్రమ నష్టాల్లో ఉందని, దీనిని చాలా తీవ్రంగా పరిశీలిస్తున్నామని సాజీ చెరియన్ అన్నారు. నిర్మాతలే కాకుండా కళాకారులందరూ ఇబ్బందుల్లో ఉన్నారని పేర్కొన్నారు. వారందరికీ సహాయపడేలా ఓ కొత్త ప్రాజెక్టును అమల్లోకి తీసుకొస్తామని సాజీ చెరియన్ స్పష్టం చేశారు.