మెగా పవర్‌స్టార్ రామ్ చరణ్ (Ram Charan) నటించిన లేటెస్ట్ స్పోర్ట్స్ యాక్షన్ డ్రామా 'పెద్ది' (Peddi) బాక్సాఫీస్ వద్ద సరికొత్త రికార్డులను సృష్టిస్తోంది. కేవలం 11 రోజుల్లోనే ప్రపంచవ్యాప్తంగా ఏకంగా 393 కోట్ల రూపాయల భారీ గ్రాస్ వసూళ్లను సాధించి 400 కోట్ల క్లబ్‌ వైపు శరవేగంగా అడుగులు వేస్తోంది. ముఖ్యంగా తెలుగునాట ఈ సినిమా సంచలన వసూళ్లతో దూసుకుపోతోంది.  ఓవర్సీస్ లోనూ సత్తా చాటుతోంది. నార్త్ అమెరికా బాక్సాఫీస్ వద్ద ఈ చిత్రం ఇప్పటికే 3.4 మిలియన్ డాలర్లకు పైగా ($3.4 M+) గ్రాస్ వసూలు చేసింది. 

నిజానికి నార్త్ అమెరికాలో పెద్దికి ఇప్పటికే 5 మిలియన్ డాలర్లు రాబట్టగల సత్తా ఉందనేది ట్రేడ్ అభిప్రాయం. అయితే అధిక రేట్లు, నెగటివ్ రివ్యూలు, ప్రస్తుతం అమెరికాలో నెలకొన్న పరిస్థితులు వసూళ్లపై ప్రభావం చూపించాయి. అయినప్పటికీ 3.4 మిలియన్ డాలర్లతో సత్తా చాటడం విశేషం. ఫుల్ రన్ లో 4 మిలియన్ మార్క్ ని అందుకునే అవకాశముంది. 

దర్శకుడు బుచ్చిబాబు తెరకెక్కించిన ఈ చిత్రం 1980ల నాటి గ్రామీణ నేపథ్యం, గిరిజన ప్రాంత ప్రజల హక్కులు, మరియు క్రీడా నేపథ్యంలో సాగే ఒక ఎమోషనల్ అండ్ ఇన్‌స్పైరింగ్ జర్నీగా రూపొందింది. రామ్ చరణ్ తన కెరీర్‌లోనే మునుపెన్నడూ చూడని సరికొత్త మాస్ అవతారంలో, అద్భుతమైన క్రికెట్ నైపుణ్యాలు కలిగిన 'ఆట కూలీ' పెద్ది పాత్రలో జీవించేశారు. ఈ చిత్రంలో కన్నడ సూపర్ స్టార్ శివ రాజ్‌కుమార్, సీనియర్ నటుడు జగపతి బాబు, జాన్వీ కపూర్ కీలక పాత్రల్లో అద్భుతమైన ప్రదర్శన ఇచ్చారు. ఆస్కార్ విజేత ఏఆర్ రెహమాన్ అందించిన సంగీతం, రత్నవేలు సినిమాటోగ్రఫీ ఈ చిత్రానికి ప్రధాన అసెట్స్‌గా నిలిచాయి. వృద్ధి సినిమాస్ నిర్మించిన ఈ భారీ బడ్జెట్ యాక్షన్ డ్రామా, ఈ ఏడాదిలోనే అత్యధిక వసూళ్లు సాధించిన సౌత్ ఇండియన్ సినిమాగా నిలిచింది.