మెగాస్టార్ చిరంజీవి (Megastar Chiranjeevi) కథానాయకుడిగా 'బింబిసార' ఫేమ్ మల్లిడి వశిష్ట దర్శకత్వంలో రూపొందుతోన్న చిత్రం 'విశ్వంభర' (Vishwambhara). యు.వి. క్రియేషన్స్ నిర్మిస్తున్న ఈ సోషియో ఫాంటసీ ఫిల్మ్ పై మంచి అంచనాలు ఉన్నాయి. ఈ మూవీ షూటింగ్ ఇటీవల పూర్తయింది. ప్రస్తుతం పోస్ట్ ప్రొడక్షన్ వర్క్ శరవేగంగా జరుగుతోంది. ఈ క్రమంలో మేకర్స్ రిలీజ్ డేట్ ని లాక్ చేసినట్లు సమాచారం.

నిజానికి 'విశ్వంభర' ఈ ఏడాది సంక్రాంతి కానుకగా విడుదల కావాల్సి ఉండగా.. వాయిదా పడింది. వేసవిలో విడుదలయ్యే అవకాశముందని ఆ మధ్య వార్తలొచ్చాయి. ఆ తర్వాత చిరంజీవి పుట్టినరోజు కానుకగా ఆగస్టు 22 లేదా దసరా కానుకగా సెప్టెంబర్ 25న విడుదలయ్యే ఛాన్స్ ఉందని ప్రచారం జరిగింది. ఇప్పుడు మరో కొత్త తేదీ తెరపైకి వచ్చింది. 

'విశ్వంభర'ను జులై 24న విడుదల చేయాలని మేకర్స్ నిర్ణయించినట్లు తెలుస్తోంది. మెగాస్టార్ కెరీర్ లో ఈ డేట్ కి ప్రత్యేకత ఉంది. ఆయన నటించిన ఇండస్ట్రీ హిట్ ఫిల్మ్ 'ఇంద్ర' 2002 లో జులై 24నే విడుదలైంది. సెంటిమెంట్ డేట్ కి వస్తున్న చిరంజీవి.. అదే రిజల్ట్ ని రిపీట్ చేస్తారేమో చూడాలి. 

ఎం. ఎం. కీరవాణి సంగీతం అందిస్తున్న 'విశ్వంభర' సినిమాలో త్రిష కథానాయికగా నటిస్తోంది. ఛోటా కె. నాయుడు కెమెరా బాధ్యతలు నిర్వహిస్తుండగా.. కోటగిరి వెంకటేశ్వరరావు, సంతోష్ కామిరెడ్డి ఎడిటర్స్ గా వ్యవహరిస్తున్నారు.