మలయాళ చిత్ర పరిశ్రమ నుంచి వచ్చే సినిమాలకు తెలుగు ప్రేక్షకుల్లో ఎప్పుడూ ఒక ప్రత్యేకమైన క్రేజ్ ఉంటుంది. ఒక చిన్న పాయింట్‌ను తీసుకుని, దానికి ఎమోషన్స్‌ను జోడించి సహజత్వానికి దగ్గరగా తెరకెక్కించడంలో మలయాళ దర్శకులు సిద్ధహస్తులు. 'మంజుమ్మల్‌ బాయ్స్' చిత్రంతో పాన్ ఇండియా స్థాయిలో సంచలన విజయాన్ని అందుకున్న దర్శకుడు చిదంబరం దర్శకత్వంలో, 'రోమాంచం', 'ఆవేశం' వంటి బ్లాక్‌బస్టర్ హిట్స్‌తో మెప్పించిన జీతు మాధవన్ కథ అందించిన సరికొత్త చిత్రం 'బాలన్‌- ది బాయ్‌'. ఈ సర్వైవల్ డ్రామా, రెండు తెలుగు రాష్ట్రాల్లో ప్రముఖ నిర్మాణ సంస్థ అన్నపూర్ణ స్టూడియోస్ ద్వారా విడుదలైంది. మరి ఈ చిత్రం ప్రేక్షకులను ఏ మేరకు ఆకట్టుకుందో ఇప్పుడు చూద్దాం. (Balan The Boy Review Telugu)

కథ:
ఈ సినిమా కథ మొత్తం తల్లీకొడుకుల బంధం చుట్టూ తిరుగుతుంది. కేరళలోని కన్నూర్ జైలు నుంచి ఒక మహిళ (ఫర్జానా పాలత్గింగల్) తన ఆరేళ్ల కొడుకు బాలన్‌(ఆది శేషన్)తో కలిసి బయటకు రావడంతో కథ ప్రారంభమవుతుంది. గతం ఇచ్చిన చేదు జ్ఞాపకాల వల్ల ఏ బంధాలు వద్దనుకుని, నిత్యం మారుపేర్లు, తప్పుడు ఐడెంటిటీలతో ఒక ఊరి నుంచి మరో ఊరికి పిల్లి పిల్లల్ని మార్చినట్లు తిరుగుతూ ఉంటుంది. ప్రతి అడుగులోనూ భయం, అనుమానంతో సాగే వారి జీవితంలో అనుకోకుండా ఓ 70 ఏళ్ల వృద్ధురాలి దగ్గర కేర్ టేకర్ ఉద్యోగం దొరుకుతుంది. బాలన్ స్కూల్లో చేరతాడు. ఇక అంతా బాగుంటుంది అనుకునే లోపే కథ ఊహించని మలుపు తిరుగుతుంది. డబుల్ మర్డర్ కేసులో పోలీసులు ఆ తల్లిని మళ్లీ అరెస్ట్ చేస్తారు. అక్కడి నుంచి స్కూల్ వయసులో ఉన్న బాలన్ తన తల్లి కోసం చేసే అన్వేషణ, ఆమె నిర్దోషిత్వాన్ని నిరూపించే క్రమం గుండెలను పిండేస్తుంది. తన తల్లిని కలుసుకోవడానికి ఆ ఆరేళ్ల చిన్నారి ఎలాంటి పోరాటం చేశాడు? ఈ ప్రయాణంలో అతనికి ఎదురైన అబ్బాస్(టోవినో థామస్) ఎవరు? చివరికి తల్లీకొడుకుల జీవితాలు ఏ తీరానికి చేరాయి? అనేది సినిమా చూసి తెలుసుకోవాలి.

విశ్లేషణ:
ఈ సినిమా ఓ తల్లి మరియు కొడుకు సమాజంతో చేసిన నెత్తుటి పోరాటాన్ని అద్భుతంగా ఆవిష్కరించింది. ఈ చిత్రంలో తల్లి, కొడుకుల సైకాలజీని దర్శకుడు చిదంబరం, రచయిత జితూ మాధవన్ చూపించిన తీరు అద్భుతం. జైలు నుండి బయటకు రాగానే జైలర్ ఇచ్చిన స్వచ్ఛంద సంస్థ కార్డును వారు చెత్తబుట్టలో వేసే తొలి సన్నివేశమే, సమాజంపై వారికి ఉన్న నమ్మకాన్ని స్పష్టం చేస్తుంది. పిల్లి తన పిల్లలను పది చోట్లు మార్చినట్లు, ఆ తల్లి తన కొడుకును రక్షించుకోవడానికి పడే తపన, ఇచ్చే కఠినమైన శిక్షణ గుండెలను పిండేస్తుంది. 

దర్శకుడు చిదంబరం ఈ సైకలాజికల్ థ్రిల్లర్‌ను ఎంతో గ్రిప్పింగ్‌గా తెరకెక్కించారు. సినిమా ఫస్ట్ హాఫ్ అంతా తల్లీకొడుకుల భావోద్వేగ ప్రయాణం, వారు ఊర్లు మారడం వంటి అంశాలతో సాగుతుంది. ఫస్టాఫ్ లో వచ్చే కొన్ని సన్నివేశాలు కొంచెం నెమ్మదిగా సాగినట్లు అనిపించినా, సెకండాఫ్ లో వచ్చే ట్విస్టులు మరియు క్లైమాక్స్ లోని భావోద్వేగాలు సినిమాను మరో స్థాయికి తీసుకెళ్తాయి.

ఫస్ట్ హాఫ్ లో వచ్చే ప్రతి సీన్ సెకండ్ హాఫ్ లో ఇచ్చే ట్విస్టులకు బలమైన పునాదిగా మారుతుంది. ఎక్కడా కమర్షియల్ హంగులకు పోకుండా, రియలిస్టిక్ ఎమోషన్స్‌తో ప్రేక్షకుల హృదయాలను కదిలించడంలో దర్శకుడు సఫలమయ్యాడు. థియేటర్‌లో ఒక్కసారిగా షాక్ ఇచ్చే ట్విస్టులు కాకుండా, 'ఓహో.. అందుకేనా ఫస్టాఫ్‌లో ఆ సీన్ పెట్టారు!' అని ప్రేక్షకుడు క్లైమాక్స్ చూసి మురిసిపోయేలా స్క్రిప్ట్ వర్క్ ఉంది. 

నటీనటుల విషయానికి వస్తే, తల్లి పాత్రలో ఫర్జానా పాలత్గింగల్ విభిన్నమైన లుక్స్, అద్భుతమైన ఎమోషన్స్‌తో జీవించేసింది. చైల్డ్ ఆర్టిస్ట్ ఆది శేషన్ తన అమాయకత్వంతోనే కాకుండా, తెలివితేటలు ప్రదర్శించే సీన్లలో అద్భుతంగా నటించి సినిమాకు ప్రధాన బలంగా నిలిచాడు. టొవినో థామస్ కొద్దిసేపే కనిపించినా, ఒక స్పెషల్ ప్యాకేజీలా కథను మలుపు తిప్పే పాత్రలో మెప్పించారు. సుషిన్ శ్యామ్ అందించిన బ్యాక్‌గ్రౌండ్ స్కోర్ సన్నివేశాల తీవ్రతను పెంచగా, షిజు ఖలీద్ సినిమాటోగ్రఫీ సినిమాకు రియలిస్టిక్ లుక్‌ను తీసుకొచ్చింది. 

ఫైనల్ గా..
'మంజుమ్మల్ బాయ్స్' లాంటి వేగవంతమైన స్క్రీన్ ప్లే ఇందులో ఉండదు, ఇదొక స్లో బర్నింగ్ సైకలాజికల్ డ్రామా. ప్రతి సన్నివేశానికి మరొక సన్నివేశంతో ఉన్న ముడిని దర్శకుడు క్లైమాక్స్ లో విప్పిన తీరు అద్భుతంగా ఉంటుంది. మంచి ఎమోషనల్ మరియు ఇంటెన్స్ సర్వైవల్ డ్రామాలను ఇష్టపడే ప్రేక్షకులకు 'బాలన్ ది బాయ్' ఒక మంచి థియేట్రికల్ ఎక్స్ పీరియన్స్ ఇస్తుంది.

రేటింగ్: 2.5/5

Disclaimer: The views/opinions expressed in this review are personal views/opinions shared by the writer and organisation does not hold a liability to them. Viewers' discretion is advised before reacting to them.