శ్రీ సుబ్బారావు, రాయప్రోలు

    పిలుపు

    మేలుకోవోయి భరతపుత్రుడ!
    మేలుకోవోయ్ చిరచరిత్రుడ!

        పిలుచుచున్నది వీరభారతి
        ఎలుగు వినబడ అంతటన్,

    నీ మాతృదేశంపు సీమలన్నీ నేడు
    ఏమాయెనో చూడు ఏమరికలో నుండ.
    మంచి మాటాడుచూ వంచించి, నమ్మించి
    
        అట్టె తెగిపడ్డాడు
        పొట్టి చీనావాడు.                                                          ||మేలుకో||

    తూర్పు తలకడ దొంగ తోడేళ్లు మూగినవి,
    ఉత్తరపు వాకిండ్ల ఉద్రేక మెగసింది,
    ఎఱ్ఱ చీమలపుట్ట నెఱ్ఱిపడి పగిలింది,

        వెట్టి సేనలమంద
        చుట్టుపట్ల దిగింది.                                                         ||మేలుకో||

    లేవరా పాలుమాలిక లింక చాలించి,
    కట్టరా నీ వీరకాశె నడుము బిగించి,
    పట్టరా ఒక చేత భద్ర భగవద్గీత

        పట్టరా ఒకచేత
        పదును పెట్టిన కత్తి                                                         ||మేలుకో||

    కుల కక్షల్లో ఎన్నికల మొత్తు కోళ్ళలో
    పరిమిట్ల తెరచాటు తిరగండ్ల పాటల్లో
    చీకటి బజార్ల సినీమాల లాభాల
    
        ప్రొద్దస్తమానాలు
        పొర్లి తేలడమాయె.                                                         ||మేలుకో||

    కసిపోని ముసలినక్కను చూడు నట్టింట,
    కనిపెట్టు తలకొఱివి కామ్రేళ్లు పుట్టింట,
    కల్ల వేదాంతాలు కపట సిద్ధాంతాలు

        పడగ ముడిచిన పాము
        పగ నమ్మరాదోయి!                                                          ||మేలుకో||
    
    ఈ హిమాలయ సీమ - ఈ నదీనద పంక్తి -
    ఈ మహారణ్యాలు - ఈ చరాచరకోటి
    ఏనాడు వెలిసెనో - ఏ ఋషులు పెంచిరో
    
        నేడు నాదంటాడు
        నెట్టుకొని వచ్చాడు.                                                           ||మేలుకో||

    తలచీర చెరిగినా - పొలిమేర జరిగినా
    జాతిపేరు ప్రతిష్ఠ సన్నగిలి అడగారు
    త్రిప్పించి మళ్లించి తిరగరాని విధాన
    
        కొట్టరా చీనీల
        గట్టు దాటేదాక.                                                                 ||మేలుకో||

    నూరు పువ్వులు పూచి - నూరు వన్నెలు విచ్చి
    ఇరుగు పొరుగుల తోట లెదగాలె నంటాడు!
    చీనా దగాదారి జిత్తు పన్నాగ మిది.

        కాడి విరిగినగాని
        కథ పూర్తి కాదోయి!                                                             ||మేలుకో||

    స్నేహాల ముచ్చట్లు-ద్రోహాల మంత్రాలు
    కల్లకపటాలొక్క కడవలో నింపాడు
    బయిసిమాలి పరాకు పడరాదు - విడరాదు

        లేపరా నీ జాతి
        లావు చేవలు మెరయ
        కొట్టరా చీనీల
        గట్టు కావలిదాక!                                                                  ||మేలుకో||

                                                                    *  *  *  *