(మే 31 సూపర్‌స్టార్ కృష్ణ జయంతి సందర్భంగా..)

తెలుగు చలనచిత్ర పరిశ్రమలో 'సూపర్‌స్టార్' అనే పదానికి నిలువెత్తు రూపం ఘట్టమనేని కృష్ణ. సాహసాలకు మారుపేరైన ఆయన టాలీవుడ్‌లో సృష్టించిన రికార్డులు, టెక్నికల్ విప్లవాలు అన్నీ ఇన్నీ కావు. అయితే కేవలం సినిమాల పరంగానే కాకుండా, ఆయన తీసుకున్న కొన్ని సాహసోపేతమైన నిర్ణయాలు ఇండస్ట్రీ స్వరూపాన్నే మార్చేశాయి. అందులో ప్రధానంగా చెప్పుకోవాల్సింది అక్కినేని నాగేశ్వరరావు 'అన్నపూర్ణ స్టూడియోస్' స్థాపన వెనుక ఉన్న ఆసక్తికరమైన నేపథ్యం.

కృష్ణ తన కెరీర్‌లో ఎన్నో ప్రయోగాత్మక చిత్రాలు చేశారు. అందులో భాగంగా ఆయన 'కొత్త దేవదాసు' సినిమాను రూపొందించాలని నిర్ణయించుకున్నారు. అప్పటికే ఏఎన్నార్ 'దేవదాసు'గా ప్రేక్షకుల గుండెల్లో చెరిగిపోని ముద్ర వేసుకున్నారు. దీంతో ఈ కొత్త ప్రాజెక్ట్ ఇండస్ట్రీలో ఒక పెద్ద సంచలనంగా మారింది. కృష్ణ ఈ నిర్ణయం అప్పట్లో అక్కినేని నాగేశ్వరరావుతో పాటు ప్రముఖ నిర్మాణ సంస్థ నవయుగ వారికి మధ్య చిన్నపాటి వివాదానికి కారణమైంది. 

అప్పట్లో నవయుగ సంస్థకు చెందిన సారథి స్టూడియోస్ కృష్ణ  'కొత్త దేవదాసు' చిత్రంలో పెట్టుబడులు పెట్టింది. అదే సమయంలో ఏఎన్నార్ పాత దేవదాసు హక్కులను కొనుగోలు చేసి, కొత్త ప్రింట్లతో కృష్ణ సినిమా రిలీజ్ టైమ్‌లోనే పోటీగా విడుదల చేయడానికి ప్లాన్ చేశారు. నవయుగ సంస్థతో భాగస్వామ్యం ఉన్న ఏఎన్నార్, తమ పెట్టుబడి ఉన్న సినిమాకు పోటీగా రావడంపై సారథి స్టూడియోస్ అధినేతలు తీవ్రంగా నొచ్చుకున్నారు.

ఈ వివాదం ఎంతవరకు వెళ్లిందంటే, ఏఎన్నార్ సినిమాలకు ఇకపై సారథి స్టూడియోస్‌ను ఇవ్వకూడదని వారు నిర్ణయించుకున్నారు. ఆ సమయంలో ఏఎన్నార్ తన ప్రొడక్షన్‌లో ఉన్న సినిమాల షూటింగ్స్ కోసం బెంగళూరులోని కంటీరవ స్టూడియోస్‌కు వెళ్లాల్సి వచ్చింది. ఈ ఇబ్బందుల నుంచే సొంతంగా ఒక స్టూడియో ఉండాలనే ఆలోచన ఏఎన్నార్‌కు బలంగా కలిగింది. అలా యుద్ధప్రాతిపదికన హైదరాబాద్‌లో 'అన్నపూర్ణ స్టూడియోస్' రూపుదిద్దుకుంది. కృష్ణ కనుక ఆనాడు 'కొత్త దేవదాసు' నిర్ణయం తీసుకోకపోతే అన్నపూర్ణ స్టూడియోస్ అంత వేగంగా వచ్చేది కాదనేది ఇండస్ట్రీ టాక్.

ఇలాంటి వివాదాలు నడిచినప్పటికీ కృష్ణ ఎప్పుడూ వ్యక్తిగత బంధాలకు ప్రాధాన్యత ఇచ్చేవారు. ఆ తర్వాత కూడా ఏఎన్నార్‌తో కలిసి విజయనిర్మల గారి దర్శకత్వంలో 'హేమాహేమీలు' సినిమాలో నటించి తన పెద్దరికాన్ని చాటుకున్నారు. అలాగే ఎన్టీఆర్ రాజకీయాల్లో ఉన్నప్పుడు ఆయనకు వ్యతిరేకంగా సినిమాలు తీసినా, తన 300వ సినిమా ముహూర్తపు షాట్‌కు ఎన్టీఆర్‌తోనే క్లాప్ కొట్టించడం కృష్ణ ప్రత్యేకత.

మూడు తరాల హీరోలతో (ఎన్టీఆర్, ఏఎన్నార్ నుండి శోభన్ బాబు, కృష్ణంరాజు, ఆ తర్వాత చిరంజీవి, నాగార్జున వరకు) కలిసి అత్యధిక మల్టీస్టారర్ సినిమాలు చేసిన ఏకైక హీరో కృష్ణ. టెక్నీషియన్ల పట్ల ఆయన చూపించే ఆప్యాయత, మహాకవి శ్రీశ్రీ జాతీయ అవార్డును తాకట్టు పెట్టినప్పుడు దాన్ని విడిపించి అండగా నిలబడిన తీరు ఆయన వ్యక్తిత్వానికి నిదర్శనం. మే 31న వచ్చే ఆయన జయంతి సందర్భంగా అభిమానులు ఈ అరుదైన జ్ఞాపకాలను మరోసారి నెమరువేసుకుంటున్నారు.