తెలుగు చలనచిత్ర పరిశ్రమలో సెంటిమెంట్, కుటుంబ విలువల నేపథ్యంలో వచ్చిన చిత్రాలకు ఒక ప్రత్యేకమైన స్థానం ఉంది. ముఖ్యంగా ఉమ్మడి కుటుంబాల మధ్య ఉండే అనుబంధాలు, ఆ తర్వాత వచ్చే చిన్న చిన్న మనస్పర్థల వల్ల ఆ ఇల్లు ఎలా ముక్కలవుతుందో చూపించే భావోద్వేగ సన్నివేశాలు ప్రేక్షకులను కన్నీరు పెట్టిస్తుంటాయి. అలాంటి ఒక హృదయవిదారకమైన సన్నివేశం 'పంచపాండవుల నిలయం' లాంటి ఒక ఆదర్శ కుటుంబంలో చోటుచేసుకుంది. అన్నదమ్ముల అనుబంధానికి ప్రతీకగా నిలిచిన ఆ ఇంట్లోకి చిన్నకోడలు అడుగుపెట్టిన తర్వాత పరిస్థితులు పూర్తిగా మారిపోయాయి. అంతవరకు అందరూ కలిసికట్టుగా, ఒకే తాటిపై నడిచిన ఆ కుటుంబంలో స్వార్థం, అసూయ అనే బీజాలు పడటంతో ఉమ్మడి కుటుంబం కాస్తా ముక్కలైపోయే పరిస్థితికి వచ్చింది.

ఈ కథలో పెద్దన్నయ్య అందరినీ ఎంతో క్రమశిక్షణతో, ప్రేమతో పెంచి పెద్ద చేశాడు. తమ్ముళ్లను లాయర్లుగా, డాక్టర్లుగా, ఇంజనీర్లుగా ప్రయోజకులను చేసి సమాజంలో ఒక గౌరవప్రదమైన స్థానాన్ని కల్పించాడు. కానీ, ఇంట్లోని చిన్నకోడలు రావడంతోనే ఆ ఇంట్లో శాంతి కరువైంది. ప్రతి చిన్న విషయానికి గొడవపడటం, పిల్లల పెంపకం దగ్గర నుంచి ఇంట్లోని ఖర్చుల వరకు ప్రతిదానికీ లెక్కలు అడగటం మొదలుపెట్టింది. పాలు కావాలన్నా, పిల్లల స్కూల్ ఫీజులు కట్టాలన్నా ఇంట్లో అనుమతులు తీసుకోవాల్సి వస్తోందని, తన భర్త కష్టపడి సంపాదించే డబ్బులన్నీ ఎటో పోతున్నాయంటూ ఆరోపణలు చేయడం ప్రారంభించింది. ఈ గొడవలు కాస్తా ముదిరి, చివరకు ఇల్లు విడిచి వెళ్ళిపోతానని భర్తను నిలదీసే స్థాయికి చేరాయి. భర్త ఎంత నచ్చజెప్పాలని చూసినా, ఆ చిన్నకోడలు మాత్రం వినకుండా, "ఇలాంటి నరకప్రాయమైన ఇంట్లో నేను ఒక్క క్షణం కూడా ఉండలేను, నన్ను మీతో పాటే తీసుకువెళ్ళిపోండి" అంటూ మొండికేసింది.

ఈ గొడవలను చూసి తట్టుకోలేకపోయిన లాయర్ అయిన ప్రసాద్ ఉగ్రుడవుతాడు. "ఎవరా మాట అంది? ఈ ఇంట్లో మనం బతికినా ఇక్కడే బతకాలి, చచ్చినా ఇక్కడే చావాలి! అంతేకానీ బయటకు మాత్రం పోవడానికి వీల్లేదు" అంటూ గంభీరంగా హెచ్చరిస్తాడు. ఆ ఇల్లు పంచపాండవుల నిలయమని, దాన్ని ముక్కలు చేయడానికి ఎవరికీ హక్కు లేదని బల్లగుద్ది చెప్తాడు. అయితే, చిన్నకోడలి తరఫు బంధువులు మాత్రం ఈ గొడవను మరింత పెద్దది చేయడానికి ప్రయత్నిస్తూ, విడిపోవడమే అందరికీ శ్రేయస్కరమంటూ సలహాలు ఇస్తారు. "విడిగా ఉంటే కనీసం మమకారాలైనా మిగులుతాయి, ఎవరి ఏడుపు వాళ్ళు ఏడిస్తే ఒకరి కన్నీళ్లు ఒకరు తుడుచుకునే అవకాశమైనా ఉంటుంది" అంటూ విచిత్రమైన తర్కాలు తెరపైకి తెస్తారు. ఈ మాటలకు చిన్నకోడలు కూడా మద్దతు పలుకుతూ, ఆస్తి పంపకాలు జరగాల్సిందేనని, లేదంటే తాను కొంగుతో ఉరేసుకుని చనిపోతానని బెదిరిస్తుంది.

చివరకు పెద్దన్నయ్య ఎంతో ఆవేదనతో, కన్నీరు మున్నీరవుతూ తన తమ్ముళ్లను అడుగుతాడు. "ఒరేయ్ గణపతి, నిన్ను ఇంజనీర్‌ని చేశాను కదరా.. పాయలు పాయలుగా విడిపోతున్న ఈ ఇంటికి ఆనకట్ట కట్టలేవా? నాయనా కార్తీక్, నువ్వు డాక్టర్వయ్యావు కదా.. మన కుటుంబానికి పట్టిన ఈ రోగాన్ని కుదిర్చే మందు నీ దగ్గర లేదా? బాబు ప్రసాద్, నువ్వు లాయర్‌వి కదా.. ఎన్నో కుటుంబాలను కలిపావు, ఇవాళ మన కుటుంబం ముక్కలైపోతుంటే నువ్వేమీ చేయలేవా?" అంటూ ఆయన అడిగిన ప్రశ్నలు ప్రతి ఒక్కరినీ కదిలిస్తాయి. నూటికి నూరు శాతం భావోద్వేగాలతో నిండిన ఈ సెంటిమెంట్ దృశ్యం, ఉమ్మడి కుటుంబాలు విడిపోతున్న నేటి సమాజపు నిజమైన చిత్రణను కళ్ళకు కట్టినట్లు చూపిస్తుంది. ఇలాంటి సెంటిమెంట‌ల్ వీడియోల కోసం మా Teluguone youtube channelను Subscribe చేసుకోండి.