టాలీవుడ్ లో ప్రస్తుతం మైథలాజికల్ అండ్ అడ్వెంచర్ సినిమాలకు ఉన్న క్రేజ్ అంతా ఇంతా కాదు. ఈ తరుణంలోనే టాలీవుడ్లో సరికొత్త సంచలనం సృష్టించడానికి సిద్ధమవుతోంది "నాగబంధం" (Nagabandham) అనే భారీ పాన్ ఇండియా చిత్రం. విరాట్ కర్ణ హీరోగా అభిషేక్ నామా దర్శకత్వంలో తెరకెక్కిన ఈ సినిమాను నిశిత నాగిరెడ్డి, కిషోర్ సంయుక్తంగా నిర్మించారు. జూలై 3న సినిమా థియేటర్లలో అడుగు పెట్టనుంది. ఈ నేపథ్యంలో తాజాగా 'తెలుగువన్'కి ఇచ్చిన ఒక ప్రత్యేక ఇంటర్వ్యూలో ఈ చిత్ర నిర్మాతలు సినిమాకు సంబంధించిన ఆసక్తికరమైన విషయాలను, తమ ప్రయాణాన్ని పంచుకున్నారు. ఈ సినిమా కేవలం ఒక సాధారణ కథ కాదు, ప్రేక్షకులు ఇప్పటివరకు వెండితెరపై చూడని ఒక సరికొత్త దృశ్యకావ్యం అని వారు నమ్మకంగా చెప్తున్నారు.
ఇంటర్వ్యూలో నిర్మాతలు మాట్లాడుతూ, 'నాగబంధం' అనే టైటిల్లోనే సక్సెస్ వైబ్స్ ఉన్నాయని నమ్ముతున్నట్లు తెలిపారు. ఇండస్ట్రీ సెంటిమెంట్ ప్రకారం పాముల నేపథ్యంలో వచ్చే సినిమాలు ఎప్పుడూ నిరాశపరచలేదని గుర్తుచేశారు. ఈ సినిమాలో గ్రాఫిక్స్ మరియు రియల్ కాంబినేషన్లో దాదాపు 100 నుండి 200 పాములను చూపించబోతున్నామని, ముఖ్యంగా పిల్లలకు సరికొత్త థ్రిల్ ఇచ్చేలా ఇంతవరకు ఎవరూ చూడని ఒక విలక్షణమైన పామును కూడా ఇందులో చూపించబోతున్నట్లు వెల్లడించారు.
మొదట ఈ సినిమాను సుమారు రూ. 40 కోట్ల పరిధిలో నిర్మించాలని భావించినప్పటికీ, కథ డిమాండ్ మేరకు మరియు విజువల్ క్వాలిటీ కోసం బడ్జెట్ భారీగా పెరిగిపోయిందని నిర్మాతలు అంగీకరించారు. అయితే ఔట్పుట్ ఎంతో అద్భుతంగా రావడం వల్ల ఖర్చు గురించి తామేమీ బాధపడటం లేదని స్పష్టం చేశారు. మెగాస్టార్ చిరంజీవి గారితో ప్రాజెక్ట్ ప్రారంభం కావడం, ఆ తర్వాత సూపర్ స్టార్ మహేష్ బాబు గారు టీజర్ లాంచ్ చేయడంతో సినిమాపై అంచనాలు నెక్స్ట్ లెవెల్కు వెళ్లాయని చెప్పారు.
తమకు సినిమా ఇండస్ట్రీలో ఎటువంటి అనుభవం లేకపోయినా, ఒక భారీ సాఫ్ట్వేర్ కంపెనీని నిర్మించి విజయవంతంగా నడిపిన అనుభవం ఇక్కడ ఎంతో ఉపయోగపడిందని నిర్మాతలు తెలిపారు. సాఫ్ట్వేర్ రంగంలో సమస్యలను ముందే పసిగట్టి ఎలా డీ-రిస్క్ చేస్తామో, ఇక్కడ కూడా అలాగే చేశామన్నారు. సినిమా షూటింగ్ ఆలస్యమైతే కాస్ట్ ఆఫ్ డిలే చాలా ఎక్కువగా ఉంటుందని గ్రహించి, ఫైనాన్షియల్ కంట్రోల్స్ కోసం ప్రత్యేకంగా ఒక సాఫ్ట్వేర్ను క్రియేట్ చేసి ఆడిట్ టీమ్స్ సాయంతో ప్రతి రూపాయిని ట్రాక్ చేశామని వారి మేనేజ్మెంట్ సీక్రెట్ను బయటపెట్టారు.
హీరో విరాట్ కర్ణ అంకితభావం గురించి నిర్మాతలు ప్రత్యేకంగా ప్రశంసించారు. డిసెంబర్, జనవరి తీవ్రమైన చలి వాతావరణంలో, క్లైమాక్స్ యాక్షన్ ఎపిసోడ్స్ కోసం రోప్స్ సాయంతో దాదాపు 40 రోజుల పాటు విరాట్ షర్ట్లెస్ గా నటించారని గుర్తుచేసుకున్నారు. ఒంటిపై గాయాలవుతున్నా లెక్కచేయకుండా రాత్రింబగళ్లు ఆయన పడ్డ కష్టం సినిమాకు హైలైట్గా నిలుస్తుందన్నారు. అలాగే ఈ సినిమాలో తమ కుమార్తె ఐరా ఒక చిన్న పాత్రలో కనిపించబోతుందని, అయితే తమకు చదువే ప్రథమ ప్రాధాన్యమని, భవిష్యత్తులో ఆక్టింగ్ను కెరీర్గా ఎంచుకునే ఉద్దేశం ప్రస్తుతానికి లేదని నిశిత స్పష్టం చేశారు.
సినిమాలో 1700ల కాలంలో జరిగిన ఒక భారీ యుద్ధ సన్నివేశాన్ని చూపించబోతున్నామని, హాలీవుడ్ చిత్రం '300' చూసినప్పుడు ప్రేక్షకులకు ఎలాంటి గూస్బంప్స్ వస్తాయో, అలాంటి అనుభూతిని నాగబంధం అందిస్తుందని చెప్పారు. అనంత పద్మనాభస్వామి ఆలయ నేపథ్యంలో ఉండే ఈ సినిమా క్లైమాక్స్ ప్రేక్షకులకు ఒక ఊహించని థ్రిల్ను ఇస్తుందని, అనంత పద్మనాభస్వామి టెంపుల్ సెట్ కంటే 5 రెట్లు పెద్ద స్కేల్లో దీనిని డిజైన్ చేశామని నిర్మాతలు గర్వంగా చెప్తున్నారు. ప్రేక్షకులు ఇప్పటివరకు కేవలం 1 శాతం విజువల్స్ మాత్రమే చూశారని, మిగిలిన 99 శాతం అద్భుతాన్ని వెండితెరపైనే ఆస్వాదించాలని కోరుతూ ఇంటర్వ్యూను ముగించారు.
