టాలీవుడ్ లో చైల్డ్ ఆర్టిస్ట్ గా అడుగుపెట్టి తనదైన నటనతో అలరించిన విక్రమ్ సహదేవ్, ఇప్పుడు 'అనకాపల్లి' సినిమాతో హీరోగా ప్రేక్షకుల ముందుకు వస్తున్నారు. ప్రముఖ నిర్మాత లగడపాటి శ్రీధర్ తనయుడైన విక్రమ్ సహదేవ్, చిన్నతనంలోనే దాదాపు 11కి పైగా చిత్రాల్లో నటించి బాలనటుడిగా మంచి గుర్తింపు తెచ్చుకున్నారు. ముఖ్యంగా అల్లు అర్జున్ నటించిన 'రేసుగుర్రం' సినిమాలో చిన్నప్పటి క్యారెక్టర్లో అలాగే 'పటాస్' చిత్రంలో నందమూరి కల్యాణ్ రామ్ చిన్నప్పటి పాత్రలో నటించి ఆకట్టుకున్నారు. బాలనటుడిగా సంపాదించుకున్న ఆ అనుభవమే ఇప్పుడు కెమెరా ముందుకు వచ్చినప్పుడు భయం లేకుండా స్వేచ్ఛగా నటించడానికి తనకు ఎంతో దోహదపడిందని విక్రమ్ తెలిపారు.
తన సినిమా ప్రయాణం గురించి మాట్లాడిన విక్రమ్, అల్లు అర్జున్తో ఉన్న ప్రత్యేక అనుబంధాన్ని పంచుకున్నారు. 'నా పేరు సూర్య నా ఇల్లు ఇండియా' చిత్రంలో అల్లు అర్జున్ సరసన ప్రాధాన్యత ఉన్న పాత్రలో నటించిన ఆయన, ప్రతి ఏటా బన్నీ పుట్టినరోజున ఆయన ఇంటికి వెళ్తుంటానని వెల్లడించారు. 'నా పేరు సూర్య' సెట్స్లో అల్లు అర్జున్ పని చేసే విధానం, డైలాగ్ డెలివరీ కోసం పడే తపన తనను ఎంతో ప్రభావితం చేశాయని గుర్తుచేసుకున్నారు. ఒక షాట్ తీయడానికి ముందే అల్లు అర్జున్ ఎంతో ప్రాక్టీస్ చేసి సింగిల్ టేక్లో షాట్ పూర్తి చేసే విధానం చూసి తాను ఆశ్చర్యపోయానని విక్రమ్ చెప్పారు. అదేవిధంగా గుణశేఖర్ దర్శకత్వంలో వచ్చిన 'రుద్రమదేవి' చిత్రంలో అవకాశం రావడానికి కూడా అల్లు అర్జున్ సూచనే కారణమని విక్రమ్ ఈ సందర్భంగా వెల్లడించారు.
ఇక తన కొత్త చిత్రం 'అనకాపల్లి' ఆగస్టు 7న థియేటర్లలో విడుదల కానుంది. ఈ చిత్రాన్ని దాదాపు 80 శాతం పైగా అసలైన లొకేషన్లలో, అనకాపల్లి పరిసర ప్రాంతాలలోనే చిత్రీకరించడం విశేషం. దాదాపు 85 రోజుల పాటు అనకాపల్లిలోనే ఉంటూ అక్కడి వాతావరణంలో షూటింగ్ పూర్తిచేశారు. ఈ సినిమాలో సీనియర్ నటి ఇంద్రజ ప్రధాన పాత్రలో నటించగా, దర్శకుడు త్రినాథరావు నక్కా హీరో తండ్రి పాత్రలో నటుడిగా కనిపించనుండటం విశేషం. మంచి ఆర్టిస్ట్గా గుర్తింపు తెచ్చుకోవడమే తన ప్రధాన లక్ష్యమని విక్రమ్ స్పష్టం చేశారు.
Anakapalli Movie, Vikram Sahidev, Interview, TeluguOne
