గ్లోబల్ స్టార్ రామ్ చరణ్ (Ram Charan), డైరెక్టర్ బుచ్చిబాబు కలయికలో వస్తున్న మోస్ట్ అవేటెడ్ మూవీ 'పెద్ది' (Peddi). ఈ చిత్రంపై మెగా అభిమానులతో పాటు ఇండస్ట్రీ వర్గాల్లోనూ భారీ అంచనాలు ఉన్నాయి. ఈ క్రేజీ ప్రాజెక్ట్‌లో భాగమైన ప్రముఖ నటుడు కంచరపాలెం కిషోర్ తాజాగా 'తెలుగువన్' (TeluguOne) ఇంటర్వ్యూలో సినిమాకు సంబంధించిన పలు ఆసక్తికరమైన విషయాలను పంచుకున్నారు. (Kancharapalem Kishore Interview)

ఈ సినిమాలో తన పాత్ర గురించి కిషోర్ మాట్లాడుతూ, తాను స్క్రీన్ మీద కనిపించే దానికంటే తన వాయిస్ చాలా పవర్‌ఫుల్‌గా వినిపిస్తుందని తెలిపారు. సినిమాలో ఒక ముఖ్యమైన మరియు ఫుల్ లెంగ్త్ క్యారెక్టర్‌కు తాను డబ్బింగ్ చెప్పానని, ఆ సమయంలో కొన్ని సీన్స్ చూసి తాను తీవ్రమైన భావోద్వేగానికి లోనయ్యానని పేర్కొన్నారు. డబ్బింగ్ చెప్తున్నప్పుడే సినిమా రేంజ్ ఏంటో తనకు అర్థమైందని ఆయన అన్నారు.

దర్శకుడు బుచ్చిబాబు రైటింగ్ స్కిల్స్‌పై కిషోర్ ప్రశంసల వర్షం కురిపించారు. బుచ్చిబాబు ఎంత అద్భుతమైన కథా రచయితో ఈ సినిమాతో మరోసారి నిరూపితం కానుందని, ముఖ్యంగా ఈ చిత్రంలో డ్రామా మరియు ఎమోషనల్ సీన్స్ తారాస్థాయిలో ఉంటాయని చెప్పారు. సినిమా క్లైమాక్స్ మాత్రం నెక్స్ట్ లెవెల్‌లో ఉంటుందని, కథనంలో ఉన్న డెప్త్ ప్రేక్షకులను కట్టిపడేస్తుందని ధీమా వ్యక్తం చేశారు.

ఇక రామ్ చరణ్ నటన మరియు మేకోవర్ గురించి కిషోర్ వివరిస్తూ, ఈ చిత్రంలో చరణ్ నటన ఫైర్ లాంటిదని ప్రశంసించారు. ఒక నటుడిగా ఈ సినిమా కోసం ఆయన పడ్డ కష్టం, చూపించిన ట్రాన్స్‌ఫార్మేషన్ అద్భుతమని కొనియాడారు. స్పోర్ట్స్ లుక్ నుండి రస్టిక్ బాడీ బిల్డింగ్ వరకు చరణ్ చూపించిన వేరియేషన్స్ చూస్తే థియేటర్లలో అభిమానులకు పూనకాలు రావడం ఖాయమని అన్నారు.

ముఖ్యంగా ఎమోషనల్ సీన్లలో రామ్ చరణ్ నటన చూస్తుంటే సాక్షాత్తు మెగాస్టార్ చిరంజీవి గారిని చూసినట్లే అనిపించిందని కిషోర్ ఒక పెద్ద స్టేట్‌మెంట్ ఇచ్చారు. చరణ్ తన యాక్టింగ్‌తో ఈ సినిమాకు ప్రాణం పెట్టారని, ఈ చిత్రంలో ఆయన చేసిన నటనకు గాను భవిష్యత్తులో ఎన్ని అవార్డులు ఉంటే అన్ని అవార్డులను ఖచ్చితంగా సొంతం చేసుకుంటారని ఆకాశానికెత్తేశారు.

కేవలం 'పెద్ది' చిత్రమే కాకుండా రాబోయే రోజుల్లో తాను నటిస్తున్న ఇతర పెద్ద ప్రాజెక్టులైన రవితేజ 'ఇరుముడి', ప్రభాస్ 'ఫౌజీ', విజయ్ దేవరకొండ 'రణబాలి', గోపీచంద్ 'భరతవర్ష' చిత్రాల గురించి కూడా కిషోర్ ఈ ఇంటర్వ్యూలో పలు విశేషాలను పంచుకున్నారు. ప్రతి సినిమాలోనూ తన పాత్ర ఎంతో వైవిధ్యంగా ఉండబోతోందని చెప్పారు.

మొత్తానికి కంచరపాలెం కిషోర్ ఇచ్చిన ఈ హై-వోల్టేజ్ అప్‌డేట్స్‌తో 'పెద్ది' సినిమాపై అంచనాలు ఒక్కసారిగా ఆకాశాన్ని తాకాయి. రామ్ చరణ్ కెరీర్‌లోనే ఇదొక బెస్ట్ పవర్‌ఫుల్ పర్ఫార్మెన్స్ మూవీగా నిలిచిపోనుందని మెగా ఫ్యాన్స్ ఫుల్ ఖుషీ అవుతున్నారు. 'పెద్ది' సినిమా జూన్ 4న ప్రేక్షకుల ముందుకు రానుంది.