కన్నడ రాకింగ్ స్టార్ యాష్ హీరోగా తెరకెక్కిన భారీ యాక్షన్ ఎంటర్‌టైనర్ 'టాక్సిక్' (Toxic) మూవీ విడుదల తేదీ నాటికి బాక్సాఫీస్ వద్ద భారీ అంచనాలను నెలకొల్పుతోంది. ఈ నేపథ్యంలో సినిమా ప్రదర్శనకు సంబంధించి తెలంగాణ ప్రభుత్వం తాజాగా అత్యంత కీలకమైన నిర్ణయం తీసుకుంది. రాష్ట్రవ్యాప్తంగా థియేటర్లలో 'టాక్సిక్' సినిమా టికెట్ ధరలను పెంచుకునేందుకు వెసులుబాటు కల్పిస్తూ ఉత్తర్వులు విడుదల చేసింది.

హోమ్ (జనరల్) శాఖ జారీ చేసిన మెమో (No. 38/General2/2026) ప్రకారం, సింగిల్ స్క్రీన్స్ అలాగే మల్టీప్లెక్స్‌లలో మొదటి 10 రోజుల పాటు టికెట్ రేట్ల పెంపును అమల్లోకి తీసుకొచ్చేందుకు అనుమతించింది.

ప్రభుత్వ ఆదేశాల ప్రకారం, అన్ని రకాల థియేటర్లలోనూ వర్తించేలా సవరించిన ధరల వివరాలు ఇలా ఉన్నాయి:

సింగిల్ స్క్రీన్స్: రూ.50/- చొప్పున పెంపు (GSTతో కలిపి).

మల్టీప్లెక్స్‌లు / స్పెషల్ థియేటర్లు: రూ.100/- చొప్పున పెంపు (GSTతో కలిపి).

వర్తించే సమయం: రోజుకు 5 ఆమోదిత షోల ప్రాతిపదికన 10 రోజుల పాటు (26.08.2026 నుండి 04.09.2026 వరకు) ఈ పెరిగిన ధరలు అమలులో ఉంటాయి.

టికెట్ రేట్ల పెంపుతో పాటు చిత్ర నిర్మాణ సంస్థ కేవీఎన్ - మోన్‌స్టర్ మైండ్ క్రియేషన్స్ ఎల్‌ఎల్‌పీ (KVN - MONSTER MIND CREATIONS LLP) కి ప్రభుత్వం ఒక కీలక షరతు విధించింది. ఫిలిం డెవలప్‌మెంట్ కార్పొరేషన్ (FDC) నిర్వహిస్తున్న "తెలుగు ఫిలిం ఇండస్ట్రీ ఎంప్లాయీస్ వెల్ఫేర్ కమిటీ" ఖాతాకి రూ.1,00,00,000/- (ఒక కోటి రూపాయలు) నిర్బంధంగా విరాళంగా ఇవ్వాలని ఆదేశించింది. ఈ నిధిని సినిమా పరిశ్రమలో పనిచేసే కార్మికులు, ఉద్యోగుల సంక్షేమం కోసం వినియోగిస్తారు.

అంతేకాకుండా, సమాజంలో డ్రగ్స్, మత్తు పదార్థాలు మరియు సైబర్ క్రైమ్స్ వల్ల కలిగే అనర్థాలపై అవగాహన కల్పించే అడ్వర్టైజ్‌మెంట్లను షోల సమయంలో ప్రదర్శించాలని జీఓలో స్పష్టం చేశారు. రాష్ట్రవ్యాప్తంగా ఉన్న జిల్లా కలెక్టర్లు, పోలీస్ కమిషనర్లు ఈ నిబంధనలు సరిగ్గా అమలయ్యేలా చూడాలని ప్రభుత్వం స్పష్టం చేసింది.

'కె.జి.యఫ్' సిరీస్ తర్వాత యాష్ నటిస్తున్న ఈ పాన్-ఇండియా చిత్రం కావడంతో తెలుగు రాష్ట్రాల్లో ఈ సినిమా పై విపరీతమైన బిజినెస్ అంచనాలు ఉన్నాయి. గీతూ మోహన్‌దాస్ దర్శకత్వం వహించిన ఈ యాక్షన్ డ్రామాలో నయనతార, కియారా అద్వానీ ముఖ్య పాత్రల్లో నటిస్తున్నారు.

ఆగస్టు 26 నుండి ప్రపంచవ్యాప్తంగా థియేటర్లలోకి వస్తున్న ఈ చిత్రం బాక్సాఫీస్ వద్ద ఎలాంటి వసూళ్ల రికార్డులను సృష్టిస్తుందో వేచి చూడాలి.