మలయాళ సినీ పరిశ్రమలోనే కాకుండా టాలీవుడ్లోనూ సంచలన విజయాన్ని నమోదు చేసుకున్న క్యూట్ లవ్ స్టోరీ ‘ప్రేమలు’. బాక్సాఫీస్ వద్ద భారీ వసూళ్లతో పాటు కుర్రకారును విపరీతంగా ఆకట్టుకున్న ఈ చిత్రానికి సీక్వెల్ వస్తుందని అందరూ ఎంతగానో ఎదురుచూశారు. అయితే, సినిమా ప్రియులను తీవ్ర నిరాశకు గురిచేస్తూ ఈ ప్రాజెక్ట్ గురించి ఒక షాకింగ్ అప్డేట్ వెలుగులోకి వచ్చింది. చాలా కాలంగా చర్చల్లో ఉన్న ‘ప్రేమలు 2’ సినిమాను పూర్తిగా పక్కన పెట్టేసినట్లు తెలుస్తోంది.
ఈ మోస్ట్ అవేటెడ్ సీక్వెల్ రద్దయినట్లు స్వయంగా చిత్ర కథానాయకుడు నస్లీన్ అధికారికంగా ధృవీకరించారు. కేవలం మొదటి భాగం సాధించిన విజయాన్ని, క్రేజ్ని మాత్రమే నమ్ముకుని సినిమా ముందుకు తీసుకెళ్లలేమని ఆయన స్పష్టం చేశారు. సరైన స్క్రిప్ట్ లేకుండా కేవలం డబ్బు కోసమో, హైప్ కోసమో సీక్వెల్ తీస్తే ప్రేక్షకులను మెప్పించడం అసాధ్యమని చిత్ర బృందం భావించి ఈ నిర్ణయం తీసుకున్నట్లు సమాచారం.
దర్శకుడు మరియు రచయితల బృందం ఈ సీక్వెల్ కోసం కొన్ని నెలలుగా ఎంతో శ్రమించి స్క్రిప్ట్ సిద్ధం చేసినప్పటికీ, అది అనుకున్నంత బలంగా రాలేదని టాక్. ఆ రాసుకున్న కథ హీరో నస్లీన్కు కూడా పెద్దగా నచ్చలేదట. ఆ తర్వాత కూడా మరికొన్ని కొత్త వెర్షన్స్ రెడీ చేసినప్పటికీ, కథలో ఆ మ్యాజిక్ రిపీట్ కాలేదని హీరో వైపు నుంచి గ్రీన్ సిగ్నల్ రాలేదు. దీంతో బలవంతంగా సినిమాను లాగి చెడగొట్టడం కంటే, ఇక్కడితో ఆపేయడమే ఉత్తమమని మేకర్స్ భావించి ‘ప్రేమలు 2’ ప్రాజెక్టును షెల్వ్ చేసేశారు.
గత ఏడాది విడుదలైన ‘ప్రేమలు’ చిత్రం కేవలం రూ. 3 కోట్ల అత్యల్ప బడ్జెట్తో రూపొంది, దాదాపు రూ. 130 కోట్ల కలెక్షన్లతో ట్రేడ్ వర్గాలనే షాక్కు గురిచేసింది. గిరీష్ ఏడీ దర్శకత్వంలో వచ్చిన ఈ సినిమాతో హీరో నస్లీన్, బ్యూటిఫుల్ హీరోయిన్ మమితా బైజులకు ఓవర్ నైట్ స్టార్డమ్ వచ్చింది. తెలుగులోనూ ఎస్ఎస్ కార్తికేయ ఈ చిత్రాన్ని విడుదల చేయగా, ఇక్కడి ప్రేక్షకులు కూడా బ్రహ్మరథం పట్టారు.
ఈ సీక్వెల్ ఆగిపోయిందనే వార్త తెలియడంతో ‘ప్రేమలు’ అభిమానులు కాస్త నిరాశ చెందుతున్నారు. అయితే మరోవైపు, కేవలం బ్రాండ్ నేమ్ వాడుకుని నాసిరకం కథతో సినిమా తీయకుండా, కథ బాగోలేదని ప్రాజెక్ట్ను రద్దు చేసుకున్న మేకర్స్ నిజాయితీని సోషల్ మీడియాలో నెటిజన్లు మెచ్చుకుంటున్నారు. ఇకపోతే, ఈ ప్రాజెక్ట్ క్లోజ్ అవ్వడంతో హీరో నస్లీన్, హీరోయిన్ మమితా బైజు ప్రస్తుతం తమ తదుపరి వేర్వేరు ప్రాజెక్టులపై దృష్టి పెట్టనున్నారు.
