మెగా పవర్ స్టార్ రామ్ చరణ్ (Ram Charan) మోస్ట్ అవైటెడ్ పాన్-ఇండియా ప్రాజెక్ట్ 'పెద్ది' (Peddi). 'ఉప్పెన' ఫేమ్ డైరెక్టర్ బుచ్చిబాబు ఈ ప్రతిష్టాత్మక చిత్రాన్ని తెరకెక్కిస్తున్నారు. వృద్ధి సినిమాస్ దాదాపు 300 కోట్ల భారీ బడ్జెట్‌తో నిర్మిస్తున్న ఈ చిత్రంపై ఇప్పటికే ట్రేడ్ వర్గాల్లో, ప్రేక్షకుల్లో ఆకాశాన్నంటే అంచనాలు ఉన్నాయి. జూన్ 4న థియేటర్లలోకి రాబోతున్న ఈ సినిమా ప్రమోషన్స్ ప్రస్తుతం ఫుల్ స్పీడ్‌తో దూసుకుపోతున్నాయి. ఈ నేపథ్యంలో దర్శకుడు బుచ్చిబాబు సినిమా క్లైమాక్స్, కథాంశంపై చేసిన కొన్ని సంచలన వ్యాఖ్యలు ఇప్పుడు సోషల్ మీడియాలో విపరీతంగా ట్రెండ్ అవుతున్నాయి.

ఈ చిత్రం 1980ల నాటి రూరల్ ఆంధ్రప్రదేశ్ బ్యాక్‌డ్రాప్‌లో సాగే ఒక పవర్‌ఫుల్ విలేజ్ స్పోర్ట్స్ అండ్ ఎమోషనల్ యాక్షన్ డ్రామాగా రూపొందుతోంది. తాజా ఇంటర్వ్యూలో బుచ్చిబాబు మాట్లాడుతూ, 'పెద్ది' చిత్రంలో రామ్ చరణ్ వన్ మ్యాన్ షో థియేటర్లలో ప్రేక్షకులకు సరికొత్త అనుభూతిని ఇస్తుందని నమ్మకంగా చెప్పారు. ముఖ్యంగా ఈ సినిమా చివరి 50 నిమిషాలు హై వోల్టేజ్ ఎమోషన్స్‌తో సాగుతుందని, ఆ ఎపిసోడ్స్ ప్రేక్షకులను తీవ్రంగా కదిలించడమే కాకుండా మైండ్ బ్లాక్ అయ్యేలా షాకింగ్‌గా ఉంటాయని రివీల్ చేశారు.

సినిమాలో ఉండే రా యాక్షన్ ఎపిసోడ్స్, మూడు అద్భుతమైన డాన్స్ నంబర్స్, ఆస్కార్ విజేత ఏఆర్ రెహమాన్ అందించిన బ్యాక్‌గ్రౌండ్ స్కోర్ థియేటర్లలో పూనకాలు తెప్పించడం ఖాయంగా కనిపిస్తోంది. ఈ సినిమాలో పెద్ది పహిల్వాన్ పాత్ర కోసం రామ్ చరణ్ చేసిన మేకోవర్, బాడీ ట్రాన్స్‌ఫార్మేషన్ అంతా ఇంతా కాదు. కుస్తీ వీరుడిగా కనిపించడం కోసం ఆయన విపరీతంగా బరువు పెరిగి, కఠినమైన వర్కవుట్స్ చేశారు. ఆ సమయంలో ఆయన ఎంతగా అలసిపోయారంటే, ఇంటికి వెళ్ళిన తర్వాత కనీసం తన కుమార్తె క్లిన్ కారాను కూడా చేతుల్లోకి ఎత్తుకోలేనంతగా కండరాల నొప్పితో బాధపడ్డారని చిత్ర యూనిట్ వర్గాలు తెలిపాయి. చరణ్ పడిన ఈ కష్టం విజువల్స్‌లో స్పష్టంగా కనిపిస్తుందని, ఆయన కెరీర్‌లోనే ఇదొక మైలురాయి లాంటి పాత్ర అవుతుందని ఫ్యాన్స్ ఖచ్చితంగా నమ్ముతున్నారు.

ఈ చిత్రంలో బాలీవుడ్ బ్యూటీ జాన్వీ కపూర్ హీరోయిన్‌గా నటిస్తుండటంతో నార్త్ బెల్ట్‌లో కూడా ఈ ప్రాజెక్ట్‌పై విపరీతమైన హైప్ క్రియేట్ అయింది. దానికి తగ్గట్టే ఓవర్సీస్ మార్కెట్‌లో కూడా 'పెద్ది' చిత్రం అఫీషియల్ రిలీజ్‌కు ముందే సరికొత్త రికార్డుల వేటను ప్రారంభించింది. కేవలం నార్త్ అమెరికా అడ్వాన్స్ బుకింగ్స్ ద్వారానే ఇప్పటికే 300K డాలర్ల మార్కును దాటేసి బాక్సాఫీస్ వద్ద తన సత్తా చాటుతోంది. థియేట్రికల్ రన్ ముగిసేసరికి ఈ సినిమా సరికొత్త రికార్డులను తిరగరాయడం ఖాయమని ట్రేడ్ విశ్లేషకులు అంచనా వేస్తున్నారు. బుచ్చిబాబు మార్క్ విలేజ్ డ్రామాకు రామ్ చరణ్ మాస్ ఇమేజ్ తోడవ్వడంతో జూన్ 4న థియేటర్ల వద్ద మెగా పండగ వాతావరణం కనిపించనుంది.