టాలీవుడ్ వెండితెరపై రైలు ప్రయాణాల నేపథ్యానికి, కామెడీ సీక్వెన్సులకు ఎప్పుడూ ఒక ప్రత్యేకమైన క్రేజ్ ఉంటుంది. ముఖ్యంగా రవితేజ కథానాయకుడిగా, దర్శకుడు శ్రీనువైట్ల కాంబినేషన్లో వచ్చిన ‘వెంకీ’ చిత్రంలోని ట్రైన్ కామెడీ ఎపిసోడ్ ఇప్పటికీ తెలుగు ప్రేక్షకుల ఆల్ టైమ్ ఫేవరెట్ అని చెప్పవచ్చు. ఆ సినిమాలో రైలు ప్రయాణంలో సాగే హిలేరియస్ సీన్లు, ఆ పండించిన నవ్వులు, పేలిన డైలాగులు ప్రేక్షకుల మనసుల్లో అలా నాటుకుపోయాయి.
ఆ తర్వాత టాలీవుడ్లో ఎంతోమంది దర్శకులు అదే తరహాలో ట్రైన్ జర్నీ ఆధారంగా కామెడీ పండించాలని గట్టి ప్రయత్నాలే చేశారు. కానీ, ఏ ఒక్కరూ కూడా ఆ ‘వెంకీ’ సినిమా రేంజ్ వినోదాన్ని మళ్లీ రీక్రియేట్ చేయలేకపోయారనేది అక్షరసత్యం. ఈ మధ్య కాలంలో వింటేజ్ తరహా కామెడీని మళ్లీ రుచి చూపిస్తామంటూ హడావుడి చేసిన మేకర్స్ ఎవరూ కూడా ప్రేక్షకులను ఆ స్థాయిలో మెప్పించలేకపోయారు.
గతంలో సూపర్ స్టార్ మహేష్ బాబు హీరోగా వచ్చిన ‘సరిలేరు నీకెవ్వరు’ సినిమాలో దర్శకుడు అనిల్ రావిపూడి ఒక భారీ ట్రైన్ ఎపిసోడ్ను డిజైన్ చేసిన సంగతి తెలిసిందే. రావు రమేష్, మహేష్ బాబు, రాజేంద్రప్రసాద్, రష్మిక మందన్న లాంటి క్రేజీ క్యారెక్టర్ల మధ్య నడిపించిన ఈ ఎపిసోడ్ థియేటర్లలో సందడి చేసినప్పటికీ, ఆశించిన స్థాయిలో విమర్శకుల ప్రశంసలు అందుకోలేకపోయింది. అంచనాలకు తగ్గట్టుగా ఆ సీన్ రాలేదని అభిమానుల నుంచి కామెంట్స్ వచ్చాయి.
ఇక ఈ తరహా కామెడీ జోనర్కు కేరాఫ్ అడ్రస్ అయిన దర్శకుడు శ్రీనువైట్ల కూడా ఆ మధ్య గోపిచంద్తో తెరకెక్కించిన ‘విశ్వం’ సినిమాలో ఒక సుదీర్ఘమైన ట్రైన్ జర్నీ ఎంటర్టైన్మెంట్ను ప్లాన్ చేశారు. తన పాత వింటేజ్ కామెడీ రోజులను గుర్తు చేయాలని ఆయన గట్టిగానే ట్రై చేసినప్పటికీ, అసలు ఆ సినిమానే బాక్సాఫీస్ దగ్గర బోల్తా కొట్టడంతో ఆ సినిమాలో ఉన్న ట్రైన్ ఎపిసోడ్ గురించి జనాలు పెద్దగా పట్టించుకోలేదు.
ఇలాంటి తరుణంలో ఇప్పుడు అందరి చూపు త్రివిక్రమ్ శ్రీనివాస్ వైపు మళ్లింది. విక్టరీ వెంకటేష్ కథానాయకుడిగా త్రివిక్రమ్ దర్శకత్వంలో తెరకెక్కుతున్న లేటెస్ట్ క్రేజీ మూవీ ‘ఆదర్శ కుటుంబం’. ఈ సినిమాలో దాదాపు 20 నిమిషాల పాటు సాగే ఒక మైండ్ బ్లోయింగ్ ట్రైన్ సీక్వెన్స్ ఉండబోతోందని ఇండస్ట్రీ వర్గాల్లో ఇప్పుడు ఒక రేంజ్లో హడావుడి మొదలైంది. అయితే ఈ మధ్య కాలంలో త్రివిక్రమ్ రైటింగ్ స్టైల్, ఆయన మార్క్ కామెడీ సీన్స్ థియేటర్లలో మునుపటిలా పడట్లేదనే ఒక టాక్ ఉంది. ఆయన గత చిత్రాల్లో కేవలం ప్రాసల మీద పెట్టిన శ్రద్ధ, సిట్యువేషనల్ ఫన్ మీద పెట్టట్లేదనే విమర్శలు కూడా వచ్చాయి.
కానీ, విక్టరీ వెంకటేష్ కామెడీ టైమింగ్పై తెలుగు ఆడియన్స్లో ఎప్పుడూ ఒక భారీ స్థాయి అంచనాలు ఉంటాయి. గతంలో ‘నువ్వు నాకు నచ్చావ్’, ‘మల్లీశ్వరి’ లాంటి ఆల్-టైమ్ క్లాసిక్ చిత్రాలకు త్రివిక్రమ్ అద్భుతమైన మాటలు రాస్తే, వాటిని తనదైన బాడీ లాంగ్వేజ్, టైమింగ్తో నెక్స్ట్ లెవెల్కు తీసుకెళ్లి స్క్రీన్ పై పండించింది వెంకటేష్ మాత్రమే. ఇప్పుడు చాలా ఏళ్ల తర్వాత మళ్లీ వీళ్ళిద్దరి కాంబినేషన్ లో సినిమా వస్తుండటం, అందునా ఈ సినిమాలో 20 నిమిషాల ట్రైన్ ఎపిసోడ్ హైలైట్గా నిలవబోతోందని వార్తలు రావడంతో ఫ్యాన్స్ మళ్లీ భారీగా ఆశలు పెట్టుకున్నారు. ఈసారి త్రివిక్రమ్ మార్క్ పదునైన పంచ్ లతో పాటు, ఆ వింటేజ్ ఫన్ ఖచ్చితంగా రిపీట్ అవుతుందని నమ్ముతున్నారు. ఈ అక్టోబర్లో విడుదల కాబోతున్న ఈ ‘ఆదర్శ కుటుంబం’ ఎలాంటి మ్యాజిక్ సృష్టిస్తుందో చూడాలి.
