• శివాజీ సంచలన ఇంటర్వ్యూ
• తెలుగు నటులకు అన్యాయం
• దండోరా విషయంలో అసంతృప్తి
• తప్పు చేసిన వాడికి శిక్ష పడాలి

నటుడిగా దశాబ్దాలుగా అలరిస్తూ, 'బిగ్ బాస్' రియాలిటీ షో తర్వాత ప్రతి ఇంటి మనిషిగా మారిపోయిన శివాజీ(Sivaji) ఇప్పుడు తన సెకండ్ ఇన్నింగ్స్‌లో మరింత జోరు చూపిస్తున్నారు. ఓటీటీలో '90s' వెబ్ సిరీస్ తో అదరగొట్టారు. 'కోర్టు', 'దండోరా' సినిమాలతో ఆకట్టుకున్నారు. ఇప్పుడు 'సాంప్రదాయిని సుప్పిని సుద్దపూసని'తో అలరించడానికి సిద్ధమవుతున్నారు. మార్చి 6న సినిమా విడుదలవుతున్న నేపథ్యంలో ప్రమోషన్స్ లో భాగంగా తాజాగా 'తెలుగువన్'కి ఇంటర్వ్యూ ఇచ్చారు. ఈ ఇంటర్వ్యూలో సినిమా విశేషాలను పంచుకోవడంతో పాటు, ప్రస్తుత రాజకీయాలపై తనదైన శైలిలో స్పందించారు. (Sampradayini Suppini Suddapoosani)

సరికొత్త వినోదం:
అప్పట్లో శివాజీ-లయ జోడీకి మంచి క్రేజ్ ఉంది. చాలా ఏళ్ల తర్వాత శివాజీ-లయ కలిసి 'సాంప్రదాయిని సుప్పిని సుద్దపూసని'లో నటించడం విశేషం. దాదాపు మూడున్నర కోట్ల బడ్జెట్‌తో, హార్స్‌లీ హిల్స్ నేపథ్యంలో 48 రోజుల పాటు చిత్రీకరణ జరుపుకున్న ఈ సినిమా, ప్రేక్షకులకు కావాల్సిన మంచి వినోదాన్ని, థ్రిల్‌ను అందిస్తుందని శివాజీ ధీమా వ్యక్తం చేశారు.

తెలుగు నటుల ఆత్మగౌరవం: 
తెలుగు ఇండస్ట్రీలో గొప్ప నటులు ఉన్నా, తరచుగా ఇతర భాషల నటుల వైపు మొగ్గు చూపడంపై శివాజీ తనదైన శైలిలో స్పందించారు. "నేను ఏ ఆర్టిస్ట్ కంటే తక్కువ కాదు. నేను ఏ పాత్రయినా చేస్తా." అని ఆయన మేకర్స్‌కు సవాల్ విసిరారు. నేను అనే కాదు, తెలుగులో ఎంతో మంది గొప్ప నటులు ఉన్నారు. 

మానవత్వం, సమాజం: 
సమాజం పట్ల శివాజీకి ఉన్న బాధ్యత పునర్విక పాప విషయంలో మరోసారి నిరూపితమైంది. ఆ పాప వైద్యం కోసం సహాయం చేయడానికి ఆయన స్వయంగా ప్రయత్నించారు. సాంకేతిక కారణాల వల్ల ఆ లావాదేవీ విఫలమైనప్పటికీ, ఆయన చూపిన చొరవ నిజంగా అభినందనీయం. ఇక తిరుపతి లడ్డూ వంటి వివాదాల విషయంలోనూ, "తప్పు చేసిన వాడికి శిక్ష పడాలి" అని ఆయన కుండబద్దలు కొట్టారు.

వ్యక్తిగత జీవితం, క్రమశిక్షణ: 
సినిమా షూటింగ్ లేని సమయంలో శివాజీ చాలా సాధారణంగా గడుపుతారు. క్రమం తప్పకుండా వ్యాయామం చేయడం, టీవీ చూస్తూ గడపడం ఆయన దినచర్యలో భాగం. స్క్రీన్ మీద ఫిట్‌గా కనిపించడం కోసం కఠినమైన డైట్ కూడా పాటిస్తారు.

లయతో మళ్ళీ నటించడం ఎలా అనిపించింది? 
కథ విన్నప్పుడే హీరోయిన్‌గా లయ అయితే బాగుంటుందని అనుకున్నాం. మా కాంబినేషన్‌కు ఒక క్రేజ్ ఉంది, అది ఈ సినిమాలో ఖచ్చితంగా కనిపిస్తుంది.

దండోరా విషయంలో అసంతృప్తి?
'దండోరా' సరైన సమయంలో థియేటర్ లో విడుదలయ్యుంటే.. 'కోర్టు' తరహాలో రూ.50 కోట్లు దాకా వసూలు చేసి ఉండేది. ముందు రోజు సాయంత్రం వరకు సెన్సార్ సర్టిఫికెట్ రాలేదు. దాంతో సరైన షోలు లభించలేదు. కొన్ని రోజులు ఆగి సినిమాను విడుదల చేసి ఉండాల్సింది. కానీ నిర్మాత ఓటీటీ డీల్ పోతుందనే భయంతో కంగారుగా విడుదల చేశారు. ఓటీటీలోకి వచ్చాక ఎన్టీఆర్ గారు ట్వీట్ చేయడం సంతోషాన్ని ఇచ్చింది. ఆయనను స్వయంగా కలిసి కృతఙ్ఞతలు తెలుపుతాను.

సోషల్ మీడియా పట్ల అభిప్రాయం? 
సోషల్ మీడియా అనేది ఒక విప్లవం లాంటిది, కానీ దానిని పునర్విక పాప వంటి మంచి కార్యాల కోసం వాడాలి. అదే సమయంలో ఇది సమాజానికి హాని చేసే ప్రమాదం కూడా ఉంది. అందుకే చిన్న పిల్లలకు దీనిని అందుబాటులో ఉంచకుండా జాగ్రత్త పడాలని నా అభిప్రాయం.

రాజకీయాల్లోకి మళ్ళీ వచ్చే ఆలోచన ఉందా? 
ప్రస్తుతం నా దృష్టి సినిమాలపైనే ఉంది. 2029 రాజకీయాల గురించి అప్పుడే మాట్లాడతాను, ప్రస్తుతానికి "గో విత్ ద ఫ్లో" అంతే.

తదుపరి చిత్రాలు? 
ప్రస్తుతం 'లెనిన్' మరియు 'ప్రేమకు నమస్కారం' వంటి సినిమాల్లో నటిస్తున్నాను. ముఖ్యంగా 'లెనిన్' చిత్రంలో దాదాపు 70% వరకు నా పాత్ర ఉంటుంది.

శివాజీ తన కెరీర్‌లో ఎన్ని ఒడిదుడుకులు ఎదుర్కొన్నా, తనకంటూ ఒక ప్రత్యేక స్థానాన్ని నిలబెట్టుకున్నారు. ముఖ్యంగా ఆయన మాటల్లోని స్పష్టత, నిజాయితీ ఎక్కువమందికి చేరువ చేశాయి. 'కోర్టు', 'దండోరా' తరువాత 'సాంప్రదాయిని సుప్పిని సుద్దపూసని'తో హ్యాట్రిక్ సిద్ధమవుతున్నారు.

పూర్తి ఇంటర్వ్యూ కోసం 'తెలుగువన్' యూట్యూబ్ ఛానెల్‌ని సందర్శించండి.