ఒక‌వైపు ఫీల్ గుడ్ ఎంట‌ర్టైన‌ర్స్ లో అల‌రిస్తూనే.. మ‌రోవైపు యాక్ష‌న్ డ్రామాల్లోనూ ఆక‌ట్టుకునే ప్ర‌య‌త్నం చేస్తుంటాడు యువ క‌థానాయకుడు శ‌ర్వానంద్. జ‌యాప‌జ‌యాల‌తో సంబంధం లేకుండా న‌టుడిగా ఎప్ప‌టిక‌ప్పుడు మంచి మార్కులు కొట్టేస్తున్న శ‌ర్వా.. అన్నీ కుదిరితే ఈ ఫిబ్ర‌వ‌రిలో రెండు సినిమాల‌తో ప‌ల‌క‌రించే అవ‌కాశం ఉంది. ఆ చిత్రాలే.. `ఒకే ఒక జీవితం`, `ఆడవాళ్ళు మీకు జోహార్లు`. వీటిలో `ఆడవాళ్ళు మీకు జోహార్లు` ఫిబ్ర‌వ‌రి 25న విడుద‌ల‌ కానుండ‌గా.. `ఒకే ఒక జీవితం`కి ఇంకా రిలీజ్ డేట్ లాక్ కాలేదు.

ఇదిలా ఉంటే.. శ‌ర్వానంద్ కి, ఫిబ్ర‌వ‌రి నెలకి ఓ ఇంట్రెస్టింగ్ క‌నెక్ష‌న్ ఉంది. అదేమిటంటే.. గ‌తంలో ఈ నెల‌లో వ‌చ్చిన త‌న సినిమాలన్నీ కూడా ఫీల్ గుడ్ ఫ్యామిలీ అండ్ రొమాంటిక్ డ్రామాలే. స‌హ‌న‌టుడిగా క‌నిపించిన‌ `సంక్రాంతి` (2005)తో పాటు క‌థానాయ‌కుడిగా న‌టించిన‌ `గ‌మ్యం` (2008), `మ‌ళ్ళీ మ‌ళ్ళీ ఇది రాని రోజు` (2015), `జాను` (2020).. ఇలా ఈ ఫిబ్ర‌వ‌రి రిలీజెస్ అన్నీ కూడా `ఫీల్ గుడ్` ఫార్ములాతోనే సాగాయి. అవ‌న్నీ కూడా శ‌ర్వాకి న‌టుడిగా మంచి గుర్తింపుని తీసుకువ‌చ్చాయి. ఇక ఇదే నెల‌లో ఇప్పుడు విడుద‌ల‌కు సిద్ధ‌మైన `ఒకే ఒక జీవితం`, `ఆడ‌వాళ్ళు మీకు జోహార్లు` కూడా ఒక‌ర‌కంగా ఆ త‌ర‌హా సినిమాలేన‌ని ప్ర‌చార చిత్రాల‌ని బ‌ట్టి స్ప‌ష్ట‌మ‌వుతోంది. మ‌రి.. ఈ రెండు సినిమాల‌తో శ‌ర్వానంద్ ఎలాంటి ఫ‌లితాల‌ను అందుకుంటాడో చూడాలి.