ఎన్టీఆర్‌, హృతిక్‌ రోషన్‌ హీరోలుగా తెరకెక్కిన ‘వార్‌2’ చిత్రంపై ప్రేక్షకుల్లో, అభిమానుల్లో భారీ అంచనాలు ఉన్నాయి. ఇప్పటికే రిలీజ్‌ అయిన ఈ ట్రైలర్‌ అందర్నీ ఆకట్టుకుంది. ఎన్టీఆర్‌ బాలీవుడ్‌ ఎంట్రీకి ఇది సరైన సినిమా అనే అభిప్రాయం ట్రేడ్‌ వర్గాల్లో ఉంది. ఆగస్ట్‌ 14న పాన్‌ ఇండియా మూవీగా ప్రపంచవ్యాప్తంగా రిలీజ్‌ కాబోతున్న ‘వార్‌2’ చిత్రానికి సంబంధించిన ప్రీ రిలీజ్‌ ఈవెంట్‌ ఆగస్ట్‌ 10న హైదరాబాద్‌లో భారీ ఎత్తున నిర్వహించారు. చిత్ర పరిశ్రమ నుంచి దిల్‌రాజు, త్రివిక్రమ్‌ హాజరయ్యారు. వేలాదిగా తరలి వచ్చిన అభిమానులతో ప్రీ రిలీజ్‌ ఫంక్షన్‌ ఎంతో సందడిగా జరిగింది. 

ఈ సినిమా ప్రీ రిలీజ్‌ ఈవెంట్‌కు ముంబాయి నుంచి వచ్చిన బాలీవుడ్‌ స్టార్‌ హీరో హృతిక్‌ రోషన్‌కు మాత్రం ఘోరమైన అవమానం జరిగింది. ఒక సంవత్సరం గ్యాప్‌లో ఎన్టీఆర్‌, హృతిక్‌రోషన్‌ హీరోలుగా తమ కెరీర్‌ను ప్రారంభించారు. అయితే నటుడుగా ఎన్టీఆర్‌ కంటే హృతిక్‌ రోషన్‌ 20 ఏళ్లు సీనియర్‌. 1980లో 16 ఏళ్ల వయసులోనే కెమెరా ముందుకు వచ్చాడు. ఆ తర్వాత తండ్రి రాకేష్‌ రోషన్‌ దర్శకత్వంలో వచ్చిన చాలా సినిమాలకు అసిస్టెంట్‌ డైరెక్టర్‌గా పనిచేశాడు. 2000 సంవత్సరంలో తండ్రి డైరెక్షన్‌లోనే వచ్చిన కహో నా ప్యార్‌ హై చిత్రంతో హీరోగా ఎంట్రీ ఇచ్చాడు. తొలి సినిమాలోనే డూయల్‌ రోల్‌ చేసి అందర్నీ మెప్పించాడు. హీరోగా 25 సంవత్సరాల తన కెరీర్‌లో ఎన్నో బ్లాక్‌బస్టర్స్‌లో నటించి మాచోస్టార్‌గా పేరు తెచ్చుకున్నాడు. 

ఇదిలా ఉంటే.. వార్‌2 ప్రీ రిలీజ్‌కి వచ్చిన హృతిక్‌.. తనకు తెలుగు వారంటే ఎంతో గౌరమని, వారి మర్యాదలు తాను మర్చిపోలేనని చెప్పాడు. దాదాపు 20 సంవత్సరాల క్రితం వచ్చిన క్రిష్‌ సినిమా షూటింగ్‌కి హైదరాబాద్‌ వచ్చానని గుర్తు చేసుకున్నాడు. కానీ, బాలీవుడ్‌ నుంచి ఇక్కడికి పిలిచిన ఒక స్టార్‌ హీరోకి ఇవ్వాల్సినంత గౌరవం మాత్రం మనవాళ్లు ఇవ్వలేదు. కార్యక్రమాన్ని నిర్వహిస్తున్న సుమ ఒక సమయంలో హృతిక్‌ రోషన్‌ 25 సంవత్సరాల సినీ ప్రయాణాన్ని ఒక వీడియో రూపంలో చూద్దాం అంటూ ఎనౌన్స్‌ చేసింది. ఆ వీడియో కోసం హృతిక్‌తోపాటు అందరూ 5 నిమిషాల పాటు ఎదురుచూశారు. కానీ, అది స్క్రీన్‌ మీద ప్రత్యక్షం కాలేదు. ఆ వీడియో వేయకపోవడానికి గల కారణాలు ఏమీ చెప్పకుండా వెంటనే ఎన్టీఆర్‌ 25 సంవత్సరాల కెరీర్‌కి సంబంధించిన వీడియోను వేశారు. ఆ తర్వాత కూడా దీనికి సంబంధించిన వివరణ ఎవరూ ఇవ్వలేదు. 

ఇక హృతిక్‌ రోషన్‌ అంటే ఇండియాలో తెలియని వారు ఉండరు. అందులోనూ చిత్ర పరిశ్రమకు చెందిన వారికి అతని గురించి పూర్తిగా తెలిసి ఉంటుంది. కానీ, టాలీవుడ్‌ అగ్ర నిర్మాత దిల్‌ రాజుకు మాత్రం ఈ విషయం అంతగా తెలిసినట్టు లేదు. హృతిక్‌ రోషన్‌ అనే పేరును రితిక్‌ రోషన్‌ అని మెన్షన్‌ చేయడం మొదలుపెట్టారు. అంతటితో ఆగకుండా.. ఇద్దరు హీరోలు ఎన్‌.టి.ఆర్‌., ఆర్‌.ఆర్‌.(అంటే రితిక్‌ రోషన్‌ అన్నమాట) నటించిన ఈ సినిమా తప్పకుండా పెద్ద విజయం సాధిస్తుందని అన్నారు. ఒక స్టార్‌ హీరో పేరుని కూడా సరిగ్గా ఉచ్ఛరించలేకపోవడంతో నెటిజన్లు అసహనం వ్యక్తం చేస్తున్నారు. హృతిక్‌ రోషన్‌ వీడియో వేయకపోవడం, అతని పేరును దిల్‌రాజు సరిగ్గా పలకకపోవడం పట్ల నెటిజన్లు తీవ్ర అసంతృప్తి వ్యక్తం చేస్తున్నారు. బాలీవుడ్‌ నుంచి పిలిపించి అవమానించడం సరైన పద్దతి కాదని సోషల్‌ మీడియాలో కామెంట్లు పెడుతున్నారు. 

Disclaimer: The news article is written based on information shared by various sources. The organisation is not responsible for the factual nature of them. While we do try to do thorough research at times people could misguide. So, we would encourage viewers' discretion before reacting to them.