తెలుగు చిత్ర పరిశ్రమని  కుదిపేస్తున్న  సినీ అండ్ టీవీ డ్యాన్సర్స్ అసోసియేషన్ (TFTDDA) వివాదం మళ్లీ మొదటికొచ్చింది. గడిచిన కొద్ది రోజులుగా జానీ మాస్టర్, శేఖర్ మాస్టర్ వివాదంతో పాటు యూనియన్ అంతర్గత రాజకీయం తీవ్ర సంచలనం సృష్టించిన విషయం తెలిసిందే. సాధారణ సర్వసభ్య సమావేశంలో బయటపడిన ఈ వివాదం, ఇప్పుడు లేబర్ కమిషనర్ కార్యాలయానికి చేరుకోవడమే కాకుండా న్యాయస్థానం మెట్లు ఎక్కే స్థాయికి చేరింది. ఫిల్మ్ ఇండస్ట్రీ ఎంప్లాయీస్ ఫెడరేషన్ (TFIEF) దాఖలు చేసిన ఫిర్యాదు ఆధారంగా ఇటీవల కార్మిక కమిషనర్ సమగ్ర విచారణ సమావేశాన్ని ఏర్పాటు చేశారు. అయితే, ఈ కీలక సమావేశానికి డ్యాన్సర్స్ అసోసియేషన్ నాయకత్వం గైర్హాజరు కావడం ఇప్పుడు చిత్రసీమలో తీవ్ర ఉత్కంఠని  పెంచింది.  

అసోసియేషన్ అధ్యక్షురాలు సుమలతా దేవి గతంలో అందించిన వినతిపత్రాన్ని పరిగణనలోకి తీసుకున్న కార్మిక కమిషనర్, వివాద పరిష్కారానికి ఇరువర్గాలను పిలిపించారు. కానీ, అసోసియేషన్ ప్రతినిధులు హాజరుకాకపోవడమే కాకుండా, ప్రస్తుతం ఈ వ్యవహారం హైకోర్టు పరిశీలనలో ఉన్నందున తుది తీర్పు వచ్చే వరకు ఎన్నికలు నిర్వహించవద్దంటూ ఒక ప్రత్యేక లేఖను సమర్పించారు. మరోవైపు, టాలీవుడ్‌లోని 24 విభాగాలకు చెందిన వేలాది మంది కార్మికుల ప్రయోజనాలను దృష్టిలో ఉంచుకుని, ఫెడరేషన్ ప్రతినిధులు సుదీర్ఘంగా చర్చించారు. ఎన్నికల ప్రక్రియ సుఫీడంగా పూర్తి కావడానికి రెండు కీలకమైన ప్రత్యామ్నాయ ప్రతిపాదనలను కార్మిక శాఖ కమిషనర్ ముందు ఉంచారు.  ఈ వివాదం వెనుక సుదీర్ఘమైన ఆర్థిక, పాలనాపరమైన కారణాలు ఉన్నాయి. గత కమిటీ హయాంలో నిధుల దుర్వినియోగం జరిగిందని, దాదాపు 10 మందికి పైగా కార్యవర్గ సభ్యులు రాజీనామా చేయడంతో వివాదం చెలరేగింది. ఖాళీ అయిన పదవులకే బై-ఎలక్షన్స్ నిర్వహించాలని అసోసియేషన్ వాదిస్తుండగా, మొత్తం కార్యవర్గాన్ని రద్దు చేసి కొత్తగా పూర్తిస్థాయి ఎన్నికలు జరపాలని ఫెడరేషన్ డిమాండ్ చేస్తోంది. గతంలో నిర్వహించిన ఒక అంతర్గత ఓటింగ్‌లో మొత్తం 78 మంది సభ్యులు పాల్గొనగా, అందులో 75 మంది బై-ఎలక్షన్స్‌కే మద్దతు తెలపడం విశేషం. అయితే ఫెడరేషన్ మాత్రం పూర్తి వర్గ ఎన్నికలకే మొగ్గు చూపుతూ, సహకరించకపోతే 'నాన్ కోఆపరేషన్' నిర్ణయాన్ని అమలు చేస్తామని హెచ్చరించడం పరిశ్రమలో ఆందోళన కలిగిస్తోంది.  డ్యాన్సర్ల సంక్షేమం పేరుతో తెరపైకి వచ్చిన ఈ పోరు వెనుక లక్షల రూపాయల ఆర్థిక లావాదేవీలు ఉన్నాయనే ఆరోపణలు వెల్లువెత్తుతున్నాయి.

Also read: 29 ఏళ్ళ ఏజ్ గ్యాప్ హీరోతో మీనాక్షి చౌదరి.. సినిమా సూపర్ హిట్ అవుతుందా!

 ఒక కొత్త డ్యాన్సర్ అసోసియేషన్ సభ్యత్వం పొందేందుకు సుమారు ₹6 లక్షల రూపాయల కార్డ్ ఫీజు వసూలు చేస్తున్నారనే విమర్శలు ఉన్నాయి. అదే సమయంలో, జానీ మాస్టర్ డ్యాన్సర్ల హెల్త్ ఇన్సూరెన్స్ ఫండ్ కోసం ₹18 లక్షల రూపాయల చెక్కును అందించారని క్లారిటీ ఇచ్చినప్పటికీ, రాజీనామాల వెనుక పెద్ద కుట్ర ఉందనే ప్రచారం కొనసాగుతూనే ఉంది. అసోసియేషన్ సుమారు 1.5 ఏళ్ల పదవీ కాలం ఇంకా మిగిలి ఉందని, నిధుల దుర్వినియోగాన్ని ప్రశ్నించినందుకే తమపై బురద జల్లుతున్నారని ప్రస్తుత నాయకత్వం స్పష్టం చేస్తోంది.  షూటింగ్‌లు ఆగిపోకుండా ఉండాలన్నా, వేలాది మంది సీనియర్, జూనియర్ డ్యాన్సర్ల ఉపాధి దెబ్బతినకుండా ఉండాలన్నా ఈ రగడకు త్వరగా ముగింపు పలకడం చాలా అవసరం. తెలుగు ఫిల్మ్ ఛాంబర్ ఆఫ్ కామర్స్ మరియు పెద్దలు ఈ విషయంలో జోక్యం చేసుకున్నప్పటికీ, చట్టపరమైన సమస్యలు పరిష్కారమయ్యే వరకు డ్యాన్సర్స్ అసోసియేషన్ రాజకీయాలు సద్దుమణిగేలా కనిపించడం లేదు. హైకోర్టు ఇవ్వబోయే ఆదేశాలు మరియు లేబర్ కమిషనర్ తీసుకోబోయే నిర్ణయంపైనే టాలీవుడ్ డ్యాన్సర్ల భవిష్యత్తు ఆధారపడి ఉంది.

Jani master, Sekhar master, Tollywood