ఈ ఏడాది ఇప్పటికే 'వాల్తేరు వీరయ్య'తో బ్లాక్ బస్టర్ అందుకున్న మెగాస్టార్ చిరంజీవి మరో యాక్షన్ ఎంటర్టైనర్ తో అలరించడానికి సిద్ధమవుతున్నారు. అదే 'భోళా శంకర్'. తమిళ సినిమా 'వేదాళం'కు రీమేక్ గా రూపొందుతోన్న ఈ చిత్రానికి మెహర్ రమేష్ దర్శకత్వం వహిస్తున్నారు. ఏకే ఎంటర్‌టైన్‌మెంట్స్‌ నిర్మిస్తున్న ఈ చిత్రం ఆగస్టు 11న విడుదల కానుంది. ఇదిలా ఉంటే మెగాస్టార్ సినిమాకి పోటీగా ఓ కుర్ర హీరో తన సినిమాని విడుదల చేయనుండటం ఆసక్తికరంగా మారింది.

ప్రముఖ సంగీత దర్శకుడు ఎం.ఎం. కీరవాణి తనయుడు శ్రీ‌ సింహా కోడూరి 'మత్తు వదలరా' సినిమాతో హీరోగా పరిచయమై మొదటి సినిమాతోనే మంచి విజయాన్ని అందుకున్నారు. ఆ తర్వాత చేసిన 'తెల్లవారితే గురువారం', 'దొంగలున్నారు జాగ్రత్త' సినిమాలతో మాత్రం నిరాశపరిచారు. అయితే ఇప్పుడు ఆయన వరుస సినిమాలతో అలరించడానికి సిద్ధమవుతున్నారు. ఈ జూలై 7న 'భాగ్ సాలే'తో ప్రేక్షకులను పలకరించనున్నారు. అలాగే నెలరోజులకే ఆగస్టులో మరో సినిమాతో రానున్నారు. 

శ్రీ‌ సింహా, కావ్య కళ్యాణ్ రామ్ జంటగా ఫణిదీప్ దర్శకత్వంలో రూపొందుతోన్న చిత్రం 'ఉస్తాద్'. వారాహి చలన చిత్రం నిర్మిస్తున్న ఈ మూవీ టీజర్ ఇప్పటికే విడుదలై ఆకట్టుకుంది. ఎత్తు నుంచి కిందకు చూడలేని వ్యక్తి.. ఏకంగా పైలట్ అయ్యి విమానం నడిపే స్థాయికి ఎలా ఎదిగాడనే ఆసక్తికరమైన కథాంశంతో తెరకెక్కుతోన్న ఈ సినిమా, టీజర్ తో ప్రేక్షకుల దృష్టిని ఆకర్షించింది. ఇక ఈ సినిమాని ఆగస్టు 12న విడుదల చేయనున్నట్లు తాజాగా మేకర్స్ ప్రకటించారు. ఒక్కరోజు తేడాతో ఏకంగా మెగాస్టార్ సినిమాకి పోటీగా విడుదలవుతున్న ఈ 'ఉస్తాద్' చిత్రం ఎలాంటి ఫలితాన్ని అందుకుంటుందో చూడాలి.