తెలంగాణ మట్టి వాసనలు, గ్రామీణ సంస్కృతి-సంప్రదాయాలను ప్రతిబింబించేలా కొత్త చిత్రాలు నిరంతరం ప్రేక్షకుల ముందుకు వస్తూనే ఉన్నాయి. అదే బాటలో మన పల్లెటూరి అనుబంధాల నేపథ్యంలో తెరకెక్కనున్న సరికొత్త చిత్రం ‘శ‌నార్తి’. 'రాజు వెడ్స్ రాంబాయి' ఫేమ్ అఖిల్ రాజ్ కథానాయకుడిగా ఈ సినిమాను అఫీషియల్‌గా ప్రకటించారు.

ఈ చిత్రాన్ని ప్రముఖ దర్శకుడు సంపత్ నంది తన సొంత బ్యానర్ 'సంపత్ నంది టీమ్‌వర్క్స్', 'శ్రీ ధనలక్ష్మి ప్రొడక్షన్స్' కాంబినేషన్‌లో నిర్మిస్తున్నారు. కె.వి. శ్రీధర్ రెడ్డి ఈ చిత్రానికి నిర్మాతగా వ్యవహరిస్తుండగా, ఆదిత్య మూవీస్ సమర్పిస్తోంది. హైదరాబాద్‌లోని రామానాయుడు స్టూడియోస్‌లో సినీ ప్రముఖుల నడుమ ఈ సినిమా పూజా కార్యక్రమాలు అత్యంత ఘనంగా జరిగాయి.

సంపత్ నంది వద్ద సుదీర్ఘకాలం పనిచేసిన శిష్యుడు రాజ్ గణేష్ ఉప్పునూటి ఈ చిత్రంతో దర్శకుడిగా పరిచయం అవుతున్నారు. ‘శ‌నార్తి’ అనే పదం తెలంగాణ పల్లెల్లో ఎంతో ఆప్యాయంగా పలకరించుకునే మాట. ఆ మాటనే టైటిల్‌గా ఎంచుకోవడంతో సినిమాపై మొదటి నుంచే మంచి పాజిటివ్ వైబ్ క్రియేట్ అయింది. ఇక విడుదల చేసిన టైటిల్ పోస్టర్‌కి కూడా సోషల్ మీడియాలో విశేష స్పందన లభిస్తోంది.

ఈ సినిమాలో అఖిల్ రాజ్ సరసన తెలంగాణ జానపద గీతాల ద్వారా సుపరిచితురాలైన నాగ దుర్గ హీరోయిన్‌గా అడుగుపెడుతోంది. తన పాటలతో ఆకట్టుకున్న నాగ దుర్గకు నటిగా ఇది మొదటి చిత్రం కావడం విశేషం. ఆమె నటించడం ఈ కథకు మరింత నేచురల్ లుక్ తీసుకొస్తుందని టాలీవుడ్ వర్గాలు భావిస్తున్నాయి. ఈ గ్రామీణ కథకు సురేష్ బొబ్బిలి సంగీతాన్ని అందిస్తున్నారు.

మాస్ అండ్ కమర్షియల్ చిత్రాల దర్శకుడిగా పేరు తెచ్చుకున్న సంపత్ నంది, గతంలో 'రచ్చ', 'బెంగాల్ టైగర్', 'సీటీమార్' వంటి సక్సెస్‌ఫుల్ సినిమాలను అందించారు. కేవలం దర్శకత్వానికే పరిమితం కాకుండా 'పేపర్ బాయ్', ఓటీటీ సన్సేషన్ 'ఓదెల రైల్వేస్టేషన్' వంటి విభిన్న కాన్సెప్ట్ చిత్రాలను నిర్మించి ప్రొడ్యూసర్‌గానూ తన మార్క్ చూపిస్తున్నారు. ఇప్పుడు ఆయన సపోర్ట్‌తో రాబోతున్న ‘శ‌నార్తి’ ప్రాజెక్ట్ పై కూడా మంచి అంచనాలు ఏర్పడ్డాయి.

ప్రస్తుతం సోషల్ మీడియాలో ‘శ‌నార్తి’ పోస్టర్ వైరల్ అవుతుండగా, నెటిజన్లు మరియు సినిమా ప్రేమికులు చిత్ర బృందానికి శుభాకాంక్షలు తెలుపుతున్నారు. తెలంగాణ పల్లె వాతావరణాన్ని ప్రతిబింబించే సినిమాలకు ఇటీవల మంచి క్రేజ్ ఉండటంతో ఈ సినిమా కూడా కచ్చితంగా ఆకట్టుకుంటుందని ట్రేడ్ వర్గాల్లో చర్చ నడుస్తోంది.

త్వరలోనే ఈ సినిమా రెగ్యులర్ షూటింగ్ ప్రారంభం కానుంది. గ్రామీణ బంధాలు, ఎమోషన్స్ ప్రధానంగా రాబోతున్న ఈ ‘శ‌నార్తి’ చిత్రం ఏ స్థాయిలో మెప్పిస్తుందో వేచి చూడాలి.

Shanarthi Movie, Akhil Raj, Sampath Nandi, Naga Durga