భారతీయ చలనచిత్ర పరిశ్రమలో అత్యంత విజయవంతమైన హారర్-కామెడీ ఫ్రాంచైజీగా 'ముని' సిరీస్‌కు ఒక ప్రత్యేక స్థానం ఉంది. కొరియోగ్రాఫర్, నటుడు, దర్శకుడు రాఘవ లారెన్స్ ఈ సిరీస్‌తో బాక్సాఫీస్ వద్ద కాసుల వర్షం కురిపించారు. తాజాగా ఈ మోస్ట్ సక్సెస్‌ఫుల్ సిరీస్‌లో భాగంగా వస్తున్న 'కాంచన-4' చిత్రం గురించి ఒక సంచలన వార్త ఫిలిం నగర్ సర్కిల్స్‌లో జోరుగా చక్కర్లు కొడుతోంది. ఈ సినిమాలో ఒక పవర్‌ఫుల్ పాత్ర కోసం సౌత్ లేడీ సూపర్ స్టార్ నయనతార రంగంలోకి దిగినట్లు సమాచారం.

దర్శకుడు రాఘవ లారెన్స్ ఈ తాజా పార్ట్ కోసం అదిరిపోయే స్కెచ్ వేశారని తెలుస్తోంది. సినిమాలో అత్యంత కీలకమైన, కథను మలుపు తిప్పే ఒక ప్రత్యేకమైన పాత్ర కోసం నయనతారను సంప్రదించగా.. ఆమెకు స్క్రిప్ట్ తో పాటు తన క్యారెక్టరైజేషన్ బాగా నచ్చడంతో వెంటనే ఈ ప్రాజెక్ట్‌కు గ్రీన్ సిగ్నల్ ఇచ్చేసిందని టాక్ వినిపిస్తోంది. ఒకవేళ ఇదే నిజమైతే ఈ హారర్ డ్రామాకు నెక్స్ట్ లెవెల్ క్రేజ్ రావడం ఖాయం.

ఈ ప్రతిష్టాత్మక హారర్ ఎంటర్‌టైనర్‌లో గ్లామర్ డోస్ పెంచేందుకు లారెన్స్ ఇప్పటికే ఇద్దరు క్రేజీ హీరోయిన్లను సెట్ చేశారు. బుట్టబొమ్మ పూజా హెగ్డేతో పాటు బాలీవుడ్ హాట్ బ్యూటీ నోరా ఫతేహి ఈ చిత్రంలో ప్రధాన కథానాయికలుగా నటిస్తున్నారు. ఇప్పుడు వీరికి తోడుగా లేడీ సూపర్ స్టార్ నయనతార కూడా తోడవడంతో ఈ చిత్రంపై అంచనాలు ఆకాశాన్ని తాకుతున్నాయి.

గతంలో లారెన్స్ తెరకెక్కించిన 'ముని', 'కాంచన', 'గంగ' వంటి చిత్రాలు కమర్షియల్‌గా భారీ విజయాలను అందుకున్నాయి. ఈ సిరీస్‌కు ప్రధాన బలమైన సీనియర్ నటి కోవై సరళ, దేవదర్శిని, శ్రీమాన్ ఈ నాలుగో భాగంలోనూ నవ్వులు పూయించడానికి రెడీ అవుతున్నారు. వీరికి తోడుగా రీసెంట్ టైమ్స్‌లో తన కామెడీ టైమింగ్‌తో ఆకట్టుకుంటున్న నటుడు రెడిన్ కింగ్స్లీ కూడా ఈ క్రేజీ ప్రాజెక్ట్‌లో జాయిన్ అయ్యారు.

ఈ మోస్ట్ అవైటెడ్ మూవీకి సంబంధించిన స్క్రిప్ట్ వర్క్ ఇప్పటికే పూర్తయింది. రాఘవ లారెన్స్ స్వయంగా భారీ బడ్జెట్‌తో ప్రతిష్టాత్మకంగా ఈ చిత్రాన్ని నిర్మించనున్నారు. నయనతార ఎంట్రీ గురించిన లీకులు రావడంతో సోషల్ మీడియాలో నెటిజన్లు, ఫ్యాన్స్ తెగ ఖుషీ అవుతున్నారు. ఇంత పెద్ద స్టార్ కాస్టింగ్‌తో లారెన్స్ ఎలాంటి హారర్ విందును అందిస్తాడోనని ఆసక్తిగా చర్చించుకుంటున్నారు.

ప్రస్తుతం ప్రీ-ప్రొడక్షన్ పనులను శరవేగంగా జరుపుకుంటున్న ఈ చిత్రం త్వరలోనే అధికారికంగా సెట్స్ పైకి వెళ్లనుంది. నయనతార నటిస్తున్న విషయంపై చిత్ర బృందం నుండి త్వరలోనే ఒక అఫీషియల్ అనౌన్స్‌మెంట్ వచ్చే అవకాశం ఉంది. ఈ హారర్ కామెడీ సెన్సేషన్ వచ్చే ఏడాది ప్రేక్షకుల ముందుకు వచ్చేందుకు సిద్ధమవుతోంది.