టాలీవుడ్ సీనియర్ హీరో వడ్డే నవీన్ (Vadde Naveen) సరికొత్త లుక్‌తో, ఎంతో పవర్‌ఫుల్ పాత్రతో వెండితెరపైకి గ్రాండ్ కమ్‌బ్యాక్ ఇస్తున్నారు. ఆయన నటిస్తున్న తాజా యాక్షన్ డ్రామా చిత్రం 'ట్రాన్స్‌ఫర్ త్రిమూర్తులు' (Transfer Trimurthulu). తాజాగా విడుదలైన ఈ సినిమా అఫీషియల్ ట్రైలర్ ఇండస్ట్రీ వర్గాల్లోనూ, ప్రేక్షకుల్లోనూ విపరీతమైన క్యూరియాసిటీని పెంచుతోంది. ఒక వైవిధ్యమైన పోలీస్ కథాంశంతో, పొలిటికల్ క్రైమ్ ఎలిమెంట్స్ కలబోసి ఈ సినిమాను తెరకెక్కించినట్లు ట్రైలర్ చూస్తే స్పష్టమవుతోంది. ముఖ్యంగా వడ్డే నవీన్ ఇంటెన్స్ యాక్టింగ్, డైలాగ్ డెలివరీ ఈ ట్రైలర్‌కు ప్రధాన ఆకర్షణగా నిలిచాయి.

ట్రైలర్ ప్రారంభమే ఎంతో ఉత్కంఠభరితంగా సాగింది. రాష్ట్ర రాజకీయాలను కుదిపేసిన ఒక సంచలన కేసు, మరో వారం రోజుల్లో జరగబోయే సార్వత్రిక ఎన్నికలు, సీఎం పీఠం చుట్టూ తిరిగే కుట్రల నేపథ్యంలో కథ నడుస్తుందని మేకర్స్ హింట్ ఇచ్చారు. "నువ్వు ఏ ప్లాన్ అన్నా వేసుకో... ఐ వాంట్ యు మెట్ ఎనీ కాస్ట్" అంటూ సాగే పవర్‌ఫుల్ డైలాగ్స్ సినిమాలోని సీరియస్‌నెస్‌ను తెలియజేస్తున్నాయి. ఇలాంటి హై-ప్రొఫైల్ పొలిటికల్ కాన్స్పిరసీని ఒక సాధారణ కానిస్టేబుల్ ఎలా ఎదుర్కొన్నాడు, అసలు సీఎం రేంజ్ వ్యక్తులు భయపడేలా అతడు ఏం చేశాడు అనే ఆసక్తికరమైన పాయింట్‌తో కథను మలిచారు.

ఈ సినిమాలో హీరో క్యారెక్టరైజేషన్ చాలా విభిన్నంగా ఉంది. కేవలం 10 ఏళ్ల సర్వీసులోనే ఏకంగా 55 బదిలీలు (55 Transfers) పొందిన ఒక నిజాయితీ గల కానిస్టేబుల్ పాత్రలో వడ్డే నవీన్ కనిపిస్తున్నారు. 10 ఇయర్స్ ఆఫ్ సర్వీస్‌లో వరల్డ్ రికార్డ్ కొట్టేలా ఇన్ని బదిలీలు అయినా కూడా అతడు ఎక్కడా కాంప్రమైజ్ కాడు. "నన్ను ట్రాన్స్‌ఫర్లు చేస్తుంది తప్పులు చేస్తున్నందుకు కాదు సార్... తప్పులు బయట పెడుతున్నందుకు" అంటూ హీరో చెప్పే సంభాషణలు థియేటర్లలో ఈలలు వేయించేలా ఉన్నాయి. నిజాయితీగా డ్యూటీ చేయడం వల్ల ఇటు డిపార్ట్‌మెంట్‌లోనూ, అటు సొసైటీలోనూ అతడు ఎలాంటి ఇబ్బందులు పడ్డాడనేది ఎమోషనల్‌గా చూపించారు.

కథలో అసలు ట్విస్ట్ 20 ఏళ్ల క్రితం నాటి (20 Years Back) ఒక పాత కేసు చుట్టూ తిరుగుతుంది. ఆ కేసులోని నిజనిజాలను తెలుసుకోవడానికి, ఎవరికీ దొరకని ఆధారాలను వెతకడానికి ఈ కానిస్టేబుల్ రంగంలోకి దిగుతాడు. తాము రాజకీయాలు చేస్తూ, చూస్తూ, నడిపిస్తూ కట్టుకున్న సామ్రాజ్యం ఒక కానిస్టేబుల్ వల్ల కూలిపోతుందా అని విలన్ పక్షం వేసే ప్లాన్స్ కథను మరింత రసవత్తరంగా మార్చాయి. ఒక కానిస్టేబుల్‌ను అంతమొందించడానికి అఫీషియల్‌గా, అన్-అఫీషియల్‌గా శతవిధాలా ప్రయత్నిస్తుంటారు. "ఫ్యామిలీని, నిన్ను కలిపి కప్పెట్టేస్తా త్రిమూర్తి" అని విలన్ హెచ్చరించినప్పుడు వచ్చే సీన్స్ హై-వోల్టేజ్ యాక్షన్‌ను తలపిస్తున్నాయి.

సరిగ్గా ఎలక్షన్ల సమయానికి ఈ కానిస్టేబుల్ ఎక్కడున్నాడు, ఏం చేస్తున్నాడు అనేది పోలీస్ శాఖకు కూడా పెద్ద సవాలుగా మారుతుంది. తన భార్య, కూతురు, ప్రాణం కంటే కూడా తనకు ఈ కేసును ఛేదించడమే ముఖ్యమని హీరో భావిస్తాడు. రాశి సింగ్ ఈ చిత్రంలో కీలక పాత్రలో నటిస్తుండగా, భార్యాభర్తల మధ్య వచ్చే సెంటిమెంట్ సీన్స్ కూడా కథకు బలాన్నిచ్చేలా ఉన్నాయి. టెక్నికల్ వాల్యూస్, బ్యాక్‌గ్రౌండ్ స్కోర్, అద్భుతమైన విజువల్స్ ట్రైలర్ రేంజ్‌ను పెంచేశాయి. ఓవరాల్‌గా 'ట్రాన్స్‌ఫర్ త్రిమూర్తులు' ట్రైలర్ చూస్తుంటే, ఈ సినిమా వడ్డే నవీన్ కు పవర్‌ఫుల్ కమ్‌బ్యాక్ అయ్యేలా కనిపిస్తోంది.